Read Te Tusi Tapu I Te Gana Tuvalu Lomiga Lua FAATAOTO 25 Bible Online

FAATAOTO 25 - Te Tusi Tapu I Te Gana Tuvalu Lomiga Lua bible

FAATAOTO 25

¹Konei a nisi faataoto a Solomona kola ne laga ne tagata i te potu fono a Hesekia, te tupu o Iuta.

²E fakaaloalo ne tatou te Atua ona ko mea e funa ne ia; e fakaaloalo ne tatou a tupu ona ko mea e fakamalamalama ne latou.

³E se mafai o iloa ne tatou a mea e mafaufau ki ei te tupu; a ona mafaufauga e faigata o oko ki ei o'tou mafaufauga, e pela eiloa te maluga mo te lagi, kae poko pela mo te moana.

⁴Ko mafai o faite ne te tagata poto i faitega o mea ki siliva, se mea gali mai i te siliva manafai ko oti ne ave keatea a te mea se lei mai i ei.

⁵Taumafai o fakamao keatea a tino fai manatu fesoasoani masei mai i te tupu, kae ka takutakua te malo tena i te faimeatonu.

⁶ Kafai e tu koe i mua o te tupu, sa taumafai o fai pela i a koe ko oko eiloa i te taua.

⁷E sili atu manafai e vau se tino o fai mai ki a koe ke fano koe ki se tulaga maluga, i lo te vau o fai mai me e isi se tagata tai maluga tenei ka vau o sui koe i te tulaga tena e nofo koe i ei.

⁸Sa to fakavavave o fano ki te fono tulafono e uiga ki se mea se lei ne lavea ne koe. Kafai e isi se molimau fakamuli e fakaasi mai ne ia i a koe e se, se a la tau mea ka fai?

⁹Kafai e isi se mea e finau ei koulua mo tou tuakoi, taumafai o teu i te va eiloa o koulua, kae ke mo a e sae aka i ei ne mea funa.

¹⁰Kafai e fakaasi ne koe ne mea funa, ko tena uiga ka iloa ne tino me e se mafai ne koe o tausi a mea funa, tena la, ka se mafai ei o gata tou masiasi.

¹¹A te manatu tela ne gali te fakaasiga, e pela me se mea ne faite ki aulo mo siliva.

¹²A te muna akoako tela e fai ne se tino atamai ki se tino tela e toka o fakalogo, e taua atu i lo mama aulo io me ko mea ne faite ki te tina aulo.

¹³A te avefekau tela e fakatuagagina e fakafiafia ki te tino tela ne uga mai ne ia ke fano o ave tena fekau, e pela me se vai moko i te taimi vela o te katiga o te taukai.

¹⁴A tino kola e se mafai o fakataunu a mea ne tauto latou ki ei, e pela me ne kaumana mo matagi kola e seai ne vaiua e aumai ne latou.

¹⁵Kafai e tukituki atu koe mo te loto kufaki kae ka mafai o maua ne koe a tino loto makeke eiloa, ka mafai foki eiloa ne koe o lou mai a tino pule ki te mea e mafaufau koe ki ei.

¹⁶Sa to kai malosi ki te hani; kafai e to uke au hani e kai kae ka lua koe.

¹⁷Sa to fano soko ki tou tuakoi i te mea ma fiu i a koe ko se fiafia ei ki a koe.

¹⁸A te molimau pelo e pau eiloa i te fakamataku mo te pelu, te pago mo te matasana mata'kai.

¹⁹Kafai koe e fakatuaga ki te tino tela e se fakatalitonugina i taimi o fakalavelave, e pela eiloa manafai e taumafai koe o kai mo tou nifo e matagataga io me sasale i tou vae masei.

²⁰A te usu o se pese ki se tino fanoanoa, e pela eiloa manafai e tapale keatea ona gatu i se aso moko, io me e pela mo se pakiaga e nani ki masima.

²¹ Kafai e fiakai tou fili, fagaigina; kafai e fiainu, fainugina.

²²Ka masiasi a ia, kae ka aumai ne te Aliki se taui lei ki a koe.

²³A te gutu fatufatu e fai ne ia te tino ke kaitaua, a te mea tena se mea mautinoa tonu eiloa, e pela eiloa mo te mautinoa ne tatou i te matagi mai i matu e aumai ne ia te vaiua.

²⁴E sili atu te nofo i te tuafale o se fale, i lo te nofo tasi mo te avaga gutu kotekote.

²⁵Kafai ko fatoa toe lagona eiloa ne koe se tala gali mai i se fenua mao, e pela eiloa me ko inu koe ki se vai moko i te taimi e fiainu ei koe.

²⁶A te tino amio lei tela e talia ne ia a manatu o te tino amio masei e pela me se vaitafe foliki ko kefu, io me e pela me se vaikeli ko poisini.

²⁷E se lei manafai e to lasi te hani e kai ne koe, e se lei foki manafai e to lasi tou manako ki ne vikiga e uke.

²⁸Kafai e se mafai ne koe o taofi tou kaitaua, ko tena uiga ko se mafai ne koe o fai se mea, e pela eiloa mo se fa'kai ko seai ne pui, tela ko faigofie fua o taua mai ki ei se kautau.