Read Te Tusi Tapu I Te Gana Tuvalu Lomiga Lua FAATAOTO 26 Bible Online

FAATAOTO 26 - Te Tusi Tapu I Te Gana Tuvalu Lomiga Lua bible

FAATAOTO 26

¹E se mata tau manafai e tavae ne se tino a te tino valea, e pela eiloa me se kiona i te tau vela, io me ko vaiua i te taimi o te taukai.

²A muna fakamalaia e se mae koe i ei manafai e seai sau mea se ne fai. E pela eiloa me ne manu eva kola e eva fakasili kae se tu lele eiloa.

³A te solofanua e takitaki ki te kini, te asini ki te fagutu ka ko te valea e takitaki foki ki te kini.

⁴Kafai e tali ne koe se fesili valea, ko pau eiloa koulua i te valea mo te tino ne fesili ne ia te fesili.

⁵Kafai e avatu ne koe se tali valea ki se fesili valea, kae ka iloa ne te tino ne fai tena fesili i a ia e se poto malosi pela mo ona mafaufauga.

⁶Kafai e talia ne koe te vale ke fano o ave tau fekau, e pau eiloa me ko kati keatea ne koe ou vae. A koe e salasala fua ki se fakalavelave.

⁷A te faataoto, i gutu o te tino valea, e pau eiloa te se aoga mo te tino tela ko pili ona vae.

⁸A te tavae o se tino valea e pau eiloa mo te fakalavega o te fatu ki te sana fatu.

⁹A te tino valea tela e taumafai o faipati ki fataoto, e pau eiloa mo te tino konā tela e taumafai o unu te mea e sulufia i tena lima.

¹⁰A te pule tela e fakagalue ne ia so se tino valea tela e vau i te auala, e fakamae fua ne ia a tino galue katoa.

¹¹ A te tino valea e fai fakalua ne ia se mea se lei, e pela eiloa mo te kuli tela ko toe foki ki ana luaga.

¹²A te tino tafasili eiloa i te valea e lei atu i te tino tela e mafaufau pela i a ia e poto, kae tela la, ko te valea faeloa.

¹³Ai a e se mafai ei ne te tagata paie o fano ki tua mo te fale? Se a te mea e mataku ei a ia? Se leona?

¹⁴A te tagata paie e takafilifili eiloa i luga i tena moega, e pela eiloa mo te mataloa tela e lave ki inisisi o ia.

¹⁵A nisi tino ko oko eiloa i te paie ko se maua eiloa o tuku meakai ki olotou gutu.

¹⁶A te tagata paie e mafaufau pela i a ia e poto atu i tagata e tokofitu kola e mafai o taku mai ne pogai lei e uiga ki olotou manatu.

¹⁷A te sona fano o koe o kau i se finauga tela e seai sau fekau i ei, e pela eiloa mo te fano o koe ki te auala o sau te kuli i ana taliga.

¹⁸A te tino e 'taki se ne ia te sua tino, kae fai pela i a ia e fakakatakata fua, e pela eiloa me se tino fakavalevale tela e tafao ki se meatau fakamataku.

²⁰A te afi e mate manafai e seai ne fafie; ka seai se gutu fatufatu, kae gata foki a finauga.

²¹A te fatu Kala e fakatumau eiloa ne ia a te vela o te afi, a te fafie e fakatumau ne ia te ka o te afi, ka ko tino fakatupu fakalavelave e fakatumau foki eiloa ne latou a finauga.

²²A te fatufatu e logotonu! Tatou e manako katoa ki ei!

²³A muna gali[29] e mafai o funa ne ia a te loto masei,[30] e pela eiloa mo te tia kele taumama tela e ufi ki se mea gali.

²⁴A te tino pelo e funa tena takalialia i muna takolekole.

²⁵E mafai o logomalie i te fakalogo, kae mo a eiloa e talitonu koe ki ei, me i tena loto ko fonu eiloa i te takalialia.

²⁶E mafai ne ia o funa tena se fiafia, kae ka matea eiloa ne tino katoa ana amioga masei ka fai.

²⁷A tino kola e tao a malei mō nisi tino, e lave foki eiloa latou i olotou malei ne 'tao. A tino e fakamafua ne latou te matoli o mauga, e muamua foki eiloa o taotaomaki.

²⁸E tau o takalialia mua koe ki se tino, ko fatoa mafai ei ne koe o fakamae ki au muna loi. A muna takolekole e aumai fua ne ia te masei.