Read Te Tusi Tapu I Te Gana Tuvalu Lomiga Lua FAATAOTO 27 Bible Online

FAATAOTO 27 - Te Tusi Tapu I Te Gana Tuvalu Lomiga Lua bible

FAATAOTO 27

¹ Ke mo a eiloa koe e fakamatamata e uiga mō te aso taeao. E se mafai o iloa ne koe te mea ka tupu mai i te taimi nei ke oko ki te aso taeao.

²Tuku ei ke tavae koe ne tino, pela foki tino fakaatea, kae ke mo a eiloa e tavae koe ne koe eiloa.

³A te mafa o fatu mo one e se taitai o pau mo te mafa o fakalavelave kola e fakatupu ne tino valea.

⁴A te kaitaua e se alofa kae e ofa mea, kae e se taitai o pau mo te masei o te masalosalo.

⁵E lei atu manafai e fakaasi fakalei ne koe te mea 'se a te tino, i lo te tuku fua ne koe pela ke leaka nei i a koe e se saga atu ki a ia.

⁶A te taugasoa e lei, faitalia foki eiloa manafai ne fakamae ne ia koe. Kae ke fakaeteete eiloa koe manafai e na atu a lima o tou fili ki tou tuauma!

⁷Kafai koe ko makona, ko se manako koe ki te hani, kae kafai koe e likiliki, ko talia fua ne koe a meakai 'kona.

⁸A te tagata tela e mao mai i tena fale, e pela me se manu eva tela e mao mai i tena ofaga.

⁹A sausau mo sinu manogi e fai ne ia koe ke fiafia, ka ko fakalavelave e fakafita ne ia tou mafaufau.

¹⁰Sa fakapuli eiloa ne koe ou taugasoa mo taugasoa o tou tamana. Kafai e maua koe ne se fakalavelave, sa kalaga ki tou taina mo se fesoasoani. E vave atu manafai e vau tou tuakoi o fesoasoani atu ki a koe, i lo tou taina tela e nofo mao.

¹¹Taku tama, a koe ke atamai kae ka fiafia malosi eiloa au. Ka isi se tali e mafai o avatu ne au ki so se tino tela e fakamasei ne ia au.

¹²A tino mafaufau e mafai o iloa ne latou manafai ko pili mai a fakalavelave, tela la, e mafai foki ei ne latou o kalo keatea mai i fakalavelave kona. Ka ko tino se mafaufau e ulu tonu atu eiloa ki loto i te fakalavelave, kae fakamuli ko salamō ei.

¹³A te tino tela e tauto ke togi ne ia a te kaitalafu a te sua tino,[31] se tino valea fua, e tau o puke mai sena kope mō togi ki ei te kaitalafu.

¹⁴Kafai koe e kalaga malosi atu ki tou taugasoa i te taeao malu eiloa, o fakatalofa atu ki ei, e pau eiloa me ko muna masei atu koe ki a ia.

¹⁵A te avaga gutu kotekote e pela eiloa me se motimotiga o vai i te aso e to ei vaiua.

¹⁶E mafai pefea ne koe o fai a ia ke filemu? Kai taumafai eiloa koe o fakagata te matagi io me fakafonu ou lima ki sinu kae taofi eiloa ke mo a e sali ki tua?

¹⁷A tino e tauloto ne latou te poto mai i nisi tino, e pela mo te fiti e fakamata foki eiloa ki te fiti.

¹⁸Tausi fakalei te lakau ko te mati, ka maua mai i ei ne au fuaga mati mo ou kai. A te tavini tela e tausi fakalei ne ia tena matai e fakaaloalogina.

¹⁹Kafai koe e kilo ki te vai, ko ou foliga eiloa kona e lavea ne koe. Kafai e kilo koe ki tou loto, ko koe foki eiloa tena e lavea ne koe i ei.

²⁰A manakoga o te tagata e pela mo te lalolagi o tino mate — e se mafai o malie.

²¹A te aulo mo te siliva e tofotofo i te afi; a te tagata e mafai foki o tofotofo me lei io me e se lei.

²²Kafai e kini ne koe te tino valea ke tai mate, kae e se mafai eiloa o gata tena valea.

²³Tausi fakalei au mamoe mo pulumakau,

²⁴me i te maumea e se tumau. Ke oko foki eiloa ki malo e se tumau te lotou malosi ki te se gata mai.

²⁵E kati ne koe te mouku ma solofanua, ka oti ko kati ei ne koe a mouku i kautafa o mauga ka ko te sua vaega o te mouku ma solofanua ko toetupu ake foki.

²⁶E mafai ne koe o faite a gatu mai i te vulu o au mamoe, kae togi a manafa mai i te tupe tela ne maua ne koe i te togiatuga o nisi o au kouti.

²⁷A te toega o au kouti e maua ei te susu ma koe mo tou kaiga, pela foki au tavini fafine.