Read Te Tusi Tapu I Te Gana Tuvalu Lomiga Lua FAATAOTO 28 Bible Online

FAATAOTO 28 - Te Tusi Tapu I Te Gana Tuvalu Lomiga Lua bible

FAATAOTO 28

¹A tino amio masei e tele kae seai se tino e fanatu o afuli latou, ka ko te tino fakamaoni e toa eiloa pela me se leona.

²Kafai e agasala se malo, kae ka suisui faeloa ona takitaki, ka ko te malo tela e pule ne tino atamai ka tumau tena malosi mo te takutakua.

³A te tino maluga tela e fakapuapuaga ne ia a tino mativa, e pela me se vaiua lotu tela e fakamasei ne ia a lakau kaina.

⁴Kafai e se ava koe ki te tulafono, ko tena uiga a koe e kau i tino amio masei. Kafai e fakalogo koe ki te tulafono, ko tena uiga ko se kau koe i tino amio masei.

⁵A tino amio masei e se iloa ne latou te mea tonu, ka ko tino kola e tapuaki ki te Aliki e malamalama fakalei eiloa i ei.

⁶E lei atu manafai e mativa koe kae fakamaoni i lo te maumea kae se fakamaoni.

⁷A te tamataene tela e fakalogo ki te tulafono e atamai. A te tamataene tela e takaga ki tino se aoga e fakamasiasi fua ne ia tena tamana.

⁸Kafai ne maumea koe me ne lasi te pasene ne fakaaoga ne koe ki tino, kae ne fakatogafiti foki ne koe a tino, ko tena uiga, a tou koloa ka maua ne se tino tela e alofa ki tino mativa.

⁹Kafai e se fakalogo koe ki te tulafono, ko tena uiga ka se fakalogo te Atua ki au 'talo.

¹⁰Kafai e fakatogafiti ne koe se tino fakamaoni ke fai ne ia se amioga masei, ko koe foki eiloa ka lavelavea i tau togafiti ne fai. A tino amiotonu e maua eiloa se lotou taui lei.

¹¹A tino maumea e mafaufau faeloa pela i a latou e poto, ka ko te tino mativa tela e isi sena mainaga i uiga o tino, e lasi atu tena mea e iloa.

¹²Kafai ko fakamasiki aka a tino amio lei ki ne tulaga maluga, a tino katoa e fiafia, kae kafai ko pule a tino masei, a tino e olo fua o muni.

¹³E se mafai koe o manuia i te olaga nei manafai e taumafai faeloa koe o funa au agasala. Fakaasi au agasala, kae sa toe fai, kae ka alofa atu te Atua ki a koe.

¹⁴Fakalogo faeloa ki te Aliki kae ka fiafia koe. Kafai koe e lotomakeke ka se aoga eiloa koe.

¹⁵A tino mativa e fakaalofa manafai te pule se tagata amio masei. A te pule amio masei tena e pela eiloa me se leona io me se ulosa i te fakamataku.

¹⁶A te takitaki tela e seai se mafaufau, se takitaki amio fakasaua. A te takitaki tela e fiafia ki te fakamaoni e tumau tena pulega i se taimi leva.

¹⁷A te tino tela e agasala i te tatino e keli fakavave fua ne ia tena tanuga. Sa taumafai o taofi tena mea tena e fai.

¹⁸Taumafai ke maua ne koe te loto fakamaoni, kae ka saogalemu koe. Kafai e se fakamaoni koe, ko koe ka malaia fakavave eiloa.

¹⁹A te tagata toki lakau tela e galue malosi e uke ana mea mo ona kai. A tino kola e fakamaumau taimi e tumau faeloa te lotou mativa.

²⁰A tino fakamaoni e maua ne latou se olaga gali kae fiafia; kae kafai koe e taumafai ke maumea fakavave koe, e iku koe ki te fakasala.

²¹Te fapito se mea masei. Kae e isi eiloa ne famasino kola e talia ne latou o fai te mea se ke maua ne mu tupe ma latou.

²²A tino kaiū ko oko eiloa i te manako ke na maumea fakavave latou, kae se iloa ne latou i te mativa ko pili eiloa o oko atu ki a latou.

²³Kafai ne fakatonu ne koe te mea se a se tino ne fai, fakamuli ifo ka fiafia atu a ia ki tau mea ne fai i lo muna takolekole.

²⁴A te tino tela e mafaufau pela me e se se mea masei te kaisoa i mea a ona matua, e pau eiloa a ia mo te tina tino kaisoa.

²⁵A te kaiū e fakatupu fua ne ia a fakalavelave. E sili atu tou manuia manafai e fakatuaga koe ki te Aliki.

²⁶Se mea valea o tautali i ou mafaufauga. Tautali i akoakoga a tino e poto atu i a koe, kae ka saogalemu tou olaga.

²⁷Ke kaimalie koe ki tino mativa kae ka se mafai koe o mativa. Kafai e se saga koe ki tino mativa, kae ka muna maseigina koe ne tino.

²⁸A tino e olo o muni manafai ko pule a tino amio masei. Kafai ko oti atu te lotou pulega, kae ka toe 'mai a tino amiotonu o fai mo pule.