Read Te Tusi Tapu I Te Gana Tuvalu Lomiga Lua FAATAOTO 3 Bible Online

FAATAOTO 3 - Te Tusi Tapu I Te Gana Tuvalu Lomiga Lua bible

FAATAOTO 3

¹Taku tama, sa puli aku akoakoga konei e fai atu ki a koe. Ke masaua faeloa ne koe a mea e fakatonu atu ne au ke fai ne koe.

²Aku akoakoga ka fai ne ia koe ke ola i se olaga loa kae maumea.

³Sa tiaki eiloa ne koe te alofa mo te fakamaoni. Puke o sai ki tou ua, kae tusi ki tou loto.

⁴ Kafai e fai ne koe te mea tena, kae ka alofagia koe ne te Atua mo tagata.

⁵Talitonu ki te Aliki mo tou loto katoa. Sa fakalagolago lele eiloa ki tou iloa.

⁶Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.

⁷ Ke mo a eiloa e talia ne koe ne ou mafaufauga e fai pela i a koe ko gasolo aka o poto; e tasi eiloa te mea e tau o fai ne koe, fakalogo ki te Aliki kae sa fai te mea se.

⁸Kafai e fai ne koe te mea tena, kae ka pela me se vailakau lei, tela e fakalei ne ia ou pakiaga kae fakalei ne ia tou mae.

⁹Avatu ki te Aliki te fua tafasili i te lei o au fatoaga, ko te taulaga tena a koe ki a ia, e fakaaloalo atu ei koe ki a ia.

¹⁰Kafai e fai ne koe pena, kae ka fonu ou fale teu saito i saito, kae ka se maua o fai te uke o au uaina ko se maua ne koe o teu fakalei.

¹¹ Taku tama, kafai e fakatonu ne te Aliki se mea se a koe ne fai, e tau mo koe o saga tonu ki ana muna e fai atu, kae tausi ki ei ke fai mo akoakoga ki a koe.

¹² A te Aliki e fakatonu ne ia a mea se a latou kola e alofa a ia ki ei, e pela me se tamana e fakatonu ne ia tena tama tagata tela e fakamatamata a ia ki ei.

¹³Amutia te tagata e maua ne ia te poto mo te malamalama.

¹⁴E lasi atu te lei e maua ne koe i te poto i lo siliva; e lasi atu te aoga o te poto ki a koe i lo te aulo.

¹⁵A te poto e taua atu i fatu taua; e seai se mea taua i tou loto e mafai o fakatusa ki ei.

¹⁶A te poto e avatu ne ia ki a koe te ola loa, pela foki te maumea mo te fakaaloalogina.

¹⁷A te poto e mafai o fai ne ia tou olaga ke tokagamalie, kae saogalemu.

¹⁸A latou kola e maua ne latou te poto e fiafia; kae maua foki ne latou te ola.

¹⁹A te lalolagi ne faite ne ta Aliki ki tena poto; Ne fakatulaga ne ia te lagi ki tena malamalama.

²⁰Ko tena poto ne ala ei o tafe a vaitafe kae to mai a vaiua mai i kaumana ki te lalolagi.

²¹Taku tama, taofi mau ki tou poto mo tou atamai. Ke mo a eiloa e galo keatea mai i a koe.

²²Ka avatu ne te poto ki a koe a te ola, se olaga gali kae fiafia.

²³Ka fanofano lei eiloa koe i tou auala se mafai koe o siga.

²⁴Ka se mataku foki koe manafai ko fano koe o moe, kae ka moe lei eiloa koe i te po katoa.

²⁵Ka se manavase foki koe ki ne puapuaga fafuasei kola e oko sale fua ki tino amio masei, pela me ne kautaufa.

²⁶Ka fakasaosao tou ola ne te Aliki, kae ka tausi ne Ia koe ke mo a koe e lave i se malei.

²⁷Fai a faiga lei ki tino fakaalofa i so se taimi e toka ei koe.

²⁸Ke mo a eiloa e fai koe ki sou tuakoi ke fakatali ki te aso taeao, manafai e mafai ne koe o fesoasoani ki ei i te taimi nei.

²⁹Ke mo a eiloa e mafaufau koe o fai se mea masei ki tou tuakoi; a ia e nofo i ou tafa, kae talitonu ki a koe.

³⁰Sa sona fakakinau mo so se tino manafai e seki ai eiloa se mea masei kai fai ne ia ki a koe.

³¹Sa kaisano ki tino amio fakasaua io me mafaufau koe o amio pela mo latou,

³²me i te Aliki e takalialia ki tino fai amioga masei, kae e fiafia ki tino amiotonu.

³³A te Aliki e fakamalaia ne ia a fale o tino amio masei, kae e fakamanuia ne ia a fale o tino amiotonu.

³⁴ E fakaseaoga ne ia a tino fakamatamata, kae e alofa ki tino loto malalo.

³⁵A tagata poto ka fakaaloalogina ne tino, ka ko tino valea ka gasolo eiloa o fakamasiasigina.