Read Te Tusi Tapu I Te Gana Tuvalu Lomiga Lua FAATAOTO 30 Bible Online

FAATAOTO 30 - Te Tusi Tapu I Te Gana Tuvalu Lomiga Lua bible

FAATAOTO 30

¹Konei a muna malu a Akulu, te tama tagata a Iake: “A te Atua e se fakatasi mai ki a au, A te Atua e se fakatasi mai ki a au, tela la, Au ko fakaalofa, ko se mafai ne au o fai se mea.

²Au ko pela me se manu, ko se pela me se tino; Ko se maua ne au te mafaufau tela e tau o maua ne te tagata.

³E seki tauloto eiloa ne au te poto, Kae e seai se mea e iloa ne au e uiga ki te Atua.

⁴Ko oi te tino ne iloa katoatoa ne ia a te poto faka‐te‐lagi? Ko oi te tino kai puke aka eiloa ne ia ate matagi i ona lima? Io me ne kofu ne ia te vai ki se potu laugatu? Io me ne fai ne ia a tuakoi o te lalolagi? Ko oi a ia, manafai e iloa ne koe? Ko oi tena tama tagata?

⁵“A te Atua e tausi faeloa ne ia ana tautoga katoa ne fai. A ia e pela me se talita ki a latou katoa kola e o'mai ki a ia mo se puipuiga.

⁶Kafai e fai ake koe pela me e isi ne muna ne fai ne ia, kae tela la, e seki fai eiloa ne ia, ka liko ne ia koe kae fakaasi atu ki a koe i a koe se tino loi.”

⁷Te Atua, au e fakamolemole atu ke tuku mai ki a au a mea konei e lua koi tuai au o mate:

⁸Ke mo a au e loi, kae ke mo a foki au e to maumea io me to mativa. Tela la, tuku mai fua a meakai e lava ei au.

⁹Kafai e to uke aku mea, e iku au o fai aka pela i a au ko se manako ki a koe. Kafai foki au e mativa, e iku au o fano o kaisoa, ko fakamasiasi ei ne au toku Atua.

¹⁰Sa fatufatu eiloa ne koe se tavini ki tena matai, i a koe ma fakamalaiagina kae puapuaga i tau mea ne fai.

¹¹E isi ne tino e muna masei ki olotou tamana kae se fiafia ki olotou matua.

¹²E isi ne tino e leake eiloa nei i a latou e ma, kae tela la, ko oko eiloa i te lailai.

¹³E isi ne tino e mafaufau pela i a latou ko oko eiloa i te lei!

¹⁴E isi ne tino e fakasaua ne latou a tino mativa ke maua ei olotou mea; tena te galuega e ola ei latou.

¹⁵A te tagata manako mea, e tokolua ana tama fafine, kae fakaigoa katoa ko “Aumai!” E fa a mea konei e se mafai o malie:

¹⁶Ko te lalolagi o tino mate, Ko te fafine seai ne ana tamaliki, Ko te laukele malō tela e manako ki vaiua, Mo te afi tela ko se mafai o tamate.

¹⁷So se tino tela e fano o fakalili tena tamana io me takalialia i tena matua i te taimi ko lomatua ei, e tau o ave ke kai ne manu eva ko valatua io me ave ke kape ona mata ne manu eva ko leveni.

¹⁸E fa a mea konei e faigata au o malamalama i ei:

¹⁹Ko te aeto tela e eva i te lagi, Ko te gata tela e tolo i luga i kaupapa, Ko te vaka e folau i te tai kae iloa ne ia te koga e fano ki ei, Mo te fafine mo te tagata kola e fiafai.

²⁰Konei a faiga a te fafine tela e se fakamaoni ki tena avaga: e fano o mulilua, oti aka, fano ei o koukou ko fai ake ei ana muna penei, “E seki ai se mea 'se kai fai ne au!”

²¹E fa mea konei e se mafai o talia ne te lalolagi:

²²Ko te pologa tela e fai mo tupu, Ko te tino valea tela e maua ne ia a mea katoa kola e manako a ia o kai ki ei,

²³Ko te fafine masei tela e maua tena avaga, Mo te tavini fafine tela e sui ne ia te tulaga o tena matai fafine.

²⁴E fa manu foliki eiloa o te lalolagi kae ko latou eiloa ko poto:

²⁵Ko lo: e vaivai kae a fakaputu olotou meakai i te taimi o te tau vela.

²⁶Ko lokipatia: e se mafi, kae e faite olotou ofaga i luga i kaupapa.

²⁷Ko se akelise: e seai se tupu o latou, kae e olo sale eiloa i potukau.

²⁸Ko pili: e mafai fua o po ne koe se pili ki ou lima kae mafai foki o lavea ne koe i palesi o tupu.

²⁹E fa a mea gali i te onoono manafai e sasale:

³⁰Ko leona, ko te toe manu mafi eiloa kae se mataku i se mea;

³¹Ko kouti, Ko moa tagata Mo tupu kola e sasale i mua o olotou tino.

³²Kafai koe ne fakamatamata kae fai togafiti masei, nofo aka mua ki lalo o mafaufau!

³³Kafai e vili ne koe te susu kae maua mai i ei te pata. Kafai e fusu ne koe te isu o se tino kae ka sali mai i ei te toto. Kafai e fakatupu ne koe te kaitaua o se tino, kae ka maua koe i se fakalavelave.