Read Te Tusi Tapu I Te Gana Tuvalu Lomiga Lua FAATAOTO 31 Bible Online

FAATAOTO 31 - Te Tusi Tapu I Te Gana Tuvalu Lomiga Lua bible

FAATAOTO 31

¹Konei a muna malu kola ne fai ne te matua o te Tupu ko Lemuelu ki a ia:

²“A koe ko taku tama tagata totino eiloa, ko te tali ki aku talosaga. Se a te mea ka taku atu ne au ki a koe?

³Sa fakamaumau tou malosi mo au tupe ki fafine; e tokouke a tupu ko oti ne fakaseaoga ne fafine pena.

⁴Lemuelu, fakalogo mai. A tupu e se tau o inu i uaina io me fina ki kava.

⁵Kafai ko inu kava latou, ko puli i a latou a tulafono, kae ko se saga foki o fesoasoani ki tino mativa.

⁶A te kava e tau ki tino kola ka fai o mate, kola e mafatia olotou loto.

⁷Tuku atu ei latou ke inu, ke puli te lotou mativa mo te lotou se fiafia.

⁸“E tau mō koe o faipati mo tino kola e se mafai o fakaasi mai ne latou a mea e se malie ei latou. Puipui foki ne koe te saolotoga o tino fakaalofa.

⁹Ke fai koe mo sui o latou o faipati mō te lei o latou, kae ke fai foki koe mo famasino amiotonu. Puipui fakalei te saolotoga o tino mativa.”

¹⁰Ko oko eiloa i te faigata o maua se avaga tela e fakatuagagina! E sili atu tena taua i teuga taua!

¹¹A tena avaga e talitonu katoatoa ki a ia, tela la, e se mafai te tagata o mativa.

¹²I aso katoa e ola ei a ia, e fai faeloa ne ia a faiga lei ki tena avaga, seai eiloa ne faiga masei e fai ne ia.

¹³E nofo faeloa o fai ana galuega, o fai a vulu mo laugatu lino.

¹⁴E aumai ne ia meakai ki tena kaiga mai i koga mao, e pela mo vakamutu a te kau fai mea togi kola e aumai ne latou a meakai mai i fenua mao.

¹⁵E ala malu i te taeao o fakatoka meakai mō tena kaiga kae fakatonu foki ki ana tavini fafine a olotou galuega e tau o fai.

¹⁶Ka lavea ne ia ne laukele lei, kae togi ne ia, e fakaaoga foki ne ia ana tupe mō toki tena togavine.

¹⁷A ia se fafine galue malosi, e mafi kae e uke mea e maua mai i ana galuega.

¹⁸E iloa ne ia te taua o ana mea takitasi katoa kola ne faite, kae e galue sale foki eiloa ke tai leva te po.

¹⁹E faite eiloa ne ia ana filo kae laga foki eiloa ne ia ona gatu.

²⁰E kaimalie a ia ki tino mativa mo tino fakaalofa.

²¹E se manavase lele eiloa a ia manafai ko to te kiona, me e toka a gatu moko mō tena kaiga katoa.

²²E faite ne ia a sulukafu o moega, kae pei ki gatu lino gali kola e lanu kulakula.

²³A tena avaga se tagata ko lauiloa, se tagata maluga foki eiloa i tena fa'kai.

²⁴E faite ne ia a gatu mo fusi, kae togi atu ne ia ki tino fai mea togi.

²⁵A ia se fafine malosi kae fakaaloalogina, kae e se manavase mo te aso taeao.

²⁶Kafai e faipati, e lavea atu me se fafine e atamai i ana pati e fai.

²⁷E uke ana galuega e fai sale, kae e onoono faeloa foki ki te tausiga o tena kaiga i mea e manako ki ei.

²⁸Ana tamaliki e fiafia ki a ia, kae e tavae faeloa foki a ia ne tena avaga.

²⁹Konei a muna a tena avaga, “E tokouke fafine avaga kola e lei, kae e sili atu eiloa koe i a latou katoa.”

³⁰A te gali e faka'se tino, pela foki te matagali e mafai fua o matafi, ka ko te fafine tela e fakaava ki te Aliki e tau o tavaegina.

³¹E tau o tavae ne tatou te fafine tena ona ko ana mea katoa ne fai. E tau eiloa o fakaaloalogina a ia ne tino katoa.