Read Te Tusi Tapu I Te Gana Tuvalu Lomiga Lua FAATAOTO 4 Bible Online

FAATAOTO 4 - Te Tusi Tapu I Te Gana Tuvalu Lomiga Lua bible

FAATAOTO 4

¹Aku tama, fakalogo ki akoakoga a te otou tamana ki a koutou. Saga tonu ki ei kae ka maua ne koutou te malamalama.

²A mea konei e akoako atu ne au e lei, tela la, e tau o masaua fakalei ne koutou.

³I te taimi koi foliki ei au, au ko te tama tagata tokotasi a oku matua,

⁴au ne akoako ne toku tamana. E fai mai ki a au penei, “Masaua aku muna e fai sale, kae ke mo a eiloa e puli. Fai a mea kola e fai atu ne au, kae ka ola koe.

⁵Taumafai o sala te poto mo te atamai! Sa puli i a koe aku pati kona ne fai atu, io me fakaseaoga ne koe.

⁶Sa tiakina ne koe te poto, kae ka puipui ne ia koe; alofa ki ei kae ka tausi ne ia koe ke saogalemu.

⁷A te toe mea taua eiloa e tau o fai ne koe ko te salaga o te poto. Ke muamua foki o sala ne koe te atamai.

⁸Fiafia ki te poto, kae ka fai ne ia koe ke takutakua. Fakasilisili ne koe te poto,[3] kae ka fai ne ia koe ke fakaaloalogina.

⁹A te poto ka fai pela me se kalauna malu i tou ulu.”

¹⁰Taku tama, fakalogo mai. Taofi mau kae saga tonu ki aku muna konei e fai atu, kae ka ola leva koe.

¹¹Ko oti ne akoako atu ne au te poto ki a koe, pela foki te ala tonu o te olaga.

¹²Kafai koe e sasale kae fakaaoga tou mafaufau, kae ka seai eiloa se mea e pono mai i tou auala; ka se siga foki koe manafai e tele koe.

¹³Masaua faeloa a mea ko oti ne tauloto ne koe. A muna akoako e fai atu ki a koe, ko tou ola tena, tausi fakalei ki ei.

¹⁴Sa fano ki koga e olo ki ei a tagata amio masei. Sa tautali ki faiga a tino amio masei.

¹⁵Sa fai eiloa ne koe! Fakamao keatea mai i te masei! Sa saga ki ei, kae fano eiloa koe i tou auala.

¹⁶A tino amio masei e se mafai o moe, vagana ke oti ne fai ne latou ne amioga masei. E pula faeloa manafai e seki ta ne latou se tino.

¹⁷A te masei mo te fakasaua e pela me ne meakai mo meainu ki a latou.

¹⁸A te auala tela e sasale i ei a tino amiotonu e pela mo te la e kamata o fanake, e gasolosolo malie eiloa o vau te mainaga ke oko eiloa ki te taimi ko ao mai ei.

¹⁹A te auala o tino amio masei e pouli pela me se po. E siga latou, kae e se iloa ne latou me se a te mea ne siga ei latou.

²⁰Taku tama, fakalogo mai ki aku muna konei e fai atu. Fakalogo mai ki aku muna.

²¹Ke moa eiloa e tiakina ne koe aku pati, ke masaua faeloa ne koe kae teu i tou loto.

²²E aumai ne ia te ola mo te malosi ki so se tino e malamalama i ei.

²³Fakaeteete ki mea e mafaufau koe ki ei me i tou ola e faite ne tou mafaufau.

²⁴Ke mo a e fai ne koe ne muna se tonu. Sa tavini ki te loi mo muna se aoga.

²⁵Kilo tonu ki mua mo te loto fakamaoni, kae sa punou tou ulu mo te masiasi.

²⁶ Fuafua faka'lei au mea e fai, kae ka tonu katoa au mea e fai.

²⁷Kalo keatea mai i te masei kae sasale tonu ki mua. Sa 'maga eiloa keatea mai te ala tonu.