Read Te Tusi Tapu I Te Gana Tuvalu Lomiga Lua FAATAOTO 5 Bible Online

FAATAOTO 5 - Te Tusi Tapu I Te Gana Tuvalu Lomiga Lua bible

FAATAOTO 5

¹Taku tama, saga tonu mai kae fakalogo mai ki toku poto mo toku atamai.

²Tena la, ka iloa foki ei ne koe o fai fakalei ou uiga, mo au muna foki ka fakaasi mai i ei i a koe se tagata poto.

³A laugutu o te avaga a te sua tagata e mafai o magalo pela mo te hani, mo tena sogi e molemole pela me se sinu olive,

⁴kae kafai ko palele atu, seai se mea lei e maua ne koe mai ei, na ko te mae fua mo te puapuaga.

⁵Ka ave ne ia koe ki lalo i te lalolagi o tino mate; a te auala e sasale ei a ia ko te auala ki te mate.

⁶E se fia nofo a ia i te auala o te ola, ne kalo keatea mai i ei kae ko se iloa ne ia te mea ko tupu.

⁷Aku tama tagata, fakalogo mai ki a au, kae sa puli aku muna ne fai atu.

⁸Fakamao keatea mai i fafine pena! Sa fakapilipili atu foki eiloa ki tena mataloa.

⁹Kafai e fakapilipili koe ki ei, ka maua ne nisi tino te tulaga fakaaloalogia tela ne nofo mo koe muamua, kae ka mate koe i lima o tino masei kae koi tamataene koe.

¹⁰Ao, ka puke ne nisi tino tou maumea, mo mea ne galue fita koe ke maua ka puke ma se tino fakaatea.

¹¹Ka takato fita koe i luga i tou moega tela ka mate koe i ei, mo ou kano mo tou foitino ka olo o seai,

¹²kae ka fai ake koe penei, “Ai a e se mafai ei ne au o tauloto te mea lei? Ai a e se mafai ei ne au o talia se tino ke fakatonu ne ia au?

¹³Au ne seki fakalogo ki oku faiakoga, ne seki saga tonu au ki a latou.

¹⁴Tenei la ko poi au[4] i au ko fakamasiasigina i mata o tino.”

¹⁵Fakamaoni ki tau avaga tonu, kae alofa fua eiloa koe ki a ia tokotasi.

¹⁶A tamaliki a koe kola ne fai i nisi fafine ka se aoga ki a koe.

¹⁷Ko au tamaliki e tupu ake o fesoasoani ki a koe, se ko tino fakaatea.

¹⁸Tela la, fiafia fakatasi mo tau avaga kae taumafai ke fiafia koe ki te tamafine ne avaga koe ki ei —

¹⁹tela e matagali kae foitino lei pela me se tia. Ona mata gali ke fakafiafia ei koe, mo tena alofa ke fakapulupulu ne ia koe.

²⁰Taku tama, ai a ka sona alofa fua ei koe ki se isi fafine fakaatea? Ai a e manako ei koe ki te gali o te avaga a te sua tagata?

²¹A te Aliki e lavea ne ia au mea katoa e fai. A ia e onoono faka'lei ki a koe i so se koga e fano koe ki ei.

²²A agasala a te tagata amio masei se malei. E lavelavea foki eiloa a ia i te tili o ana agasala.

²³E mate atu a ia me e se mafai ne ia a taofi ona manakoga. A tena valea ka ave ne ia a ia ki te tanuga.