Read Te Tusi Tapu I Te Gana Tuvalu Lomiga Lua FAATAOTO 6 Bible Online

FAATAOTO 6 - Te Tusi Tapu I Te Gana Tuvalu Lomiga Lua bible

FAATAOTO 6

¹Taku tama, kai tauto eiloa koe ke sui ne koe a te kaitalafu a se tino?

²Kai po eiloa koe ne au muna ne fai, io me lavelavea i au tautoga ne fai?

³Taku tama, kiloke, a koe ko nofo i te malosi o te tagata tena, kae e penei te faiga e sao ei koe: fano fakavave ki ei kae fakamolemole ki ei ke fakasaoloto mai koe.

⁴Sa fano o moe io me fakamanava malie.

⁵Taumafai ke sao koe keatea mai i te malei pela me se manu io me se tia tela e sao keatea mai i te malei a te tagata po manu.

⁶A tino paie e tau o onoono ki manu ko lo, kae taumafai o tauloto te olaga e ola ei latou.

⁷E seai se takitaki, io me se pule o latou,

⁸kae e fakaputu olotou meakai i te tau vela, o fakatoka mō te tau moko.

⁹E pefea te leva e moe ei te tagata paie i luga i tena moega? Tefea te taimi e tu aka ei a ia ki luga?

¹⁰ Muna a ia penei, “Ke moe malie aka au; ka pilima oku lima ko malolo malie aka ei au.”

¹¹Kae i te taimi e moe ei a ia kae ka vau te mativa o ta a ia, e pela me se tagata fao mea.

¹²A tino seai ne aoga kae amio masei e olo sale o fai olotou tala loi.

¹³E fakakivi olotou mata kae fai olotou tāga e fakakolekole ei koe,

¹⁴kae tela la, olotou mafaufauga e fonu i fuafuaga masei katoa, kae fakatupu fakalavelave i koga katoa.

¹⁵Ona ko olotou faiga kona, ka oko mai se mala fafuasei ki a latou, kae ka pakia masei eiloa latou i ei.

¹⁶E fitu a mea e se fiafia ki ei te Aliki kae se mafai ne ia o fakasao: Ko te kilo fakamatamata, Ko te laulaufaiva pelo, Ko lima ne ta ei tino amiotonu, Ko te ulu tela e mafaufau ki fuafuaga masei, Ko vae e fakavave o fai amioga masei, Ko te molimau fai tala loi Mo te tagata tela e fakatupu ne ia fakalavelave i va o taugasoa.

²⁰Taku tama, fai te mea ne fai atu ne tou tamana, kae sa puli a mea ne akoako atu ne tou matua.

²¹Tausi fakalei a muna a laua, kae teu i tou loto; 'sai fakatamilo i tou ua.

²²A muna akoako a laua ka takitaki ei koe manafai e faimalaga koe, ka puipui foki ei koe i po, kae fakatonutonu atu foki ki a koe i ao.

²³A akoakoga a laua e pela me se mainaga o te moli; a fakatonutonuga a laua e akoako atu ki a koe te nofonofoga o tou olaga.

²⁴E mafai o fakamao ne ia koe keatea mai i fafine masei, mai i muna fakakolekole a avaga a nisi tagata.

²⁵Ke mo a eiloa koe e fakase ne te gali o latou; ke mo a eiloa e lavelavea koe i olotou mata fakakolekole.

²⁶E mafai ne se tagata o togi se fafine tali tagata i se taimi toetoe ki se falaoa fakafete e tasi, ka ko te mulilua ne fai ne ia ka iku ki te ave keatea o ana mea katoa.

²⁷E a, e mafai ne koe o ave te afi i tou fatafata kae e se ka ou gatu?

²⁸E a, e mafai ne koe o sasale i luga i malala ka kae se paku ou vae?

²⁹E pena eiloa te fakamataku o te moe mo te avaga a te sua tagata. So se tino e fai ne ia te mea tena ka puapuaga.

³⁰A tino e se ita ki te tino tela e fano o kaisoa meakai manafai ko fiakai;[5]

³¹kae kafai e maua te tagata tena, e tau o togi ne ia a mea ne puke ne ia e fakafitu taimi te uke, e tau o tuku atu ne ia ana mea katoa.

³²Ka ko te tagata e mulilua, e seai sena mafaufau. E fakamasei fua ne ia a ia eiloa.

³³Ka ta kae fakamasiasigina; ka fakamasiasigina eiloa ki te se gata mai.

³⁴E tasi te mea e vave kaitaua ei te tagata avaga, manafai ko masalosalo ki tena avaga; a tena kaitaua e seai se gata maiga.

³⁵E se mafai lele o talia ne ia se togi io me ne meaalofa ke fakanoga ei tena kaitaua.