Read Te Tusi Tapu I Te Gana Tuvalu Lomiga Lua FAATAOTO 7 Bible Online

FAATAOTO 7 - Te Tusi Tapu I Te Gana Tuvalu Lomiga Lua bible

FAATAOTO 7

¹Taku tama, masaua aku muna ne fai kae sa puli a mea ne fai atu ne au ke fai ne koe.

²Fai a mea ne fai atu ne au kae ka ola koe. Tautali ki aku fakatonuga mo te fakaeteete e pela mo tou fakaeteete o puipui ou mata.

³Tausi ki aku akoakoga i taimi katoa; tusi ki tou loto.

⁴A te poto ke fai ne koe pela me se tuagaene o koe, ka ko te atamai ke fai mo taugasoa pili eiloa o koe.

⁵A te poto mo te atamai ka fesoasoani atu o fakamao koe keatea mai i avaga a nisi tagata, mai i fafine gutu molemole.

⁶I te aso e tasi, au ne kilokilo ki tua mai i te fakamalama o toku fale,

⁷kae ne lavea ne au a tamataene e tokouke kola koi foliki, kae e tokotasi ne matea atu ne au se tino valea.

⁸A ia tena e sasale i te auala i tafa o te matulimanu tela e tu ei te fale o te fafine e tokotasi. A te tamataene tena e fakasili aka i tafa o te fale o te fafine tena,

⁹i te afiafi ka ko pouli eiloa.

¹⁰Ne fakafetaui atu te fafine tena ki te tamataene, kae e pei ki gatu pela mo gatu o fafine tali tagata kae fai togafiti.

¹¹A te fafine tena se fafine matafatu kae e se ma, kae e fanofano sale eiloa i auala

¹²io me e tu fakatalitali i matulimanu, i auala io me i maketi.

¹³Ne sai atu ana lima ki te tamataene, sogi atu ki ei, kilo tonu atu ki ona mata kae fai atu penei,

¹⁴“Ne fai aku taulaga i te aso nei, a kano o aku taulaga kola i toku fale.

¹⁵Tena te mea ne vau ei au o sala koe. Au ne manako ki a koe, kae tenei ko maua ne au koe!

¹⁶Ko oti ne ufi ne au toku moega ki sulukafu lino mai Aikupito.

¹⁷Ne fakamanogi ne au ki mulo, aloe mo kinamoni.

¹⁸Vau! Taua ka olo o moe i te po katoa tenei. Ka fiafia taua o moe fakatasi.

¹⁹A taku avaga e galo i te fale. Ne fano i se malaga leva.

²⁰E uke ana tupe ne fano mo ia, tela la, e lua vaiaso tupu te leva o ia.”

²¹Tena, ne takolekole eiloa ne ia te tamataene, ko te tamataene eiloa ko talia ne ia ana muna takolekole.

²²I te taimi tena a te tamataene ko fanatu i te fafine tena e pela me se pulumakau ko ave o ta, pela me se tia ko fano ki loto i te malei,

²³te koga ka tui ei tena fatu ne se matasana. Ko pela a ia me se manu ko fano ki loto i te tili — e se iloa ne ia i tena ola ko pili o galo atu.

²⁴Tela la, aku tama tagata, fakalogo mai ki a au. Saga tonu mai ki aku muna e fai atu.

²⁵Sa taliagina se fafine pena ke ave ne ia otou loto; sa olo o tautali i ana tua.

²⁶Ko tokouke tagata ne pakia i vaega fafine pena, ko tokouke foki tagata ne mate i fafine pena.

²⁷Kafai koe e fano ki tena fale, a koe ko fano ki te lalolagi o tino mate. A te mea tena se auala toetoe ki te mate.