Read Te Tusi Tapu I Te Gana Tuvalu Lomiga Lua FAATAOTO 8 Bible Online

FAATAOTO 8 - Te Tusi Tapu I Te Gana Tuvalu Lomiga Lua bible

FAATAOTO 8

¹ Fakalogo mai! A te poto ko kalaga atu. A te atamai ko kalaga atu ke lagona mai a ia.

²E tu a ia i taulu o mauga i tafa o auala, E pela foki i maga ala.

³E kalaga atu a ia i te mataloa o te fa'kai, I tafa o mataloa o te fa'kai:

⁴“Au e fakatagi atu ki a koutou tino ola; Au e kalaga atu ki tino katoa i te lalolagi.

⁵E a, koutou na koi tamaliki? Akoako ke matua koutou. E a, a koutou e valea? Akoako ke isi ne mea i otou mafaufau.

⁶Fakalogo mai ki aku muna gali; aku muna katoa e fai atu e tonu katoa.

⁷A muna e fai atu ne au e tonu katoa; au e se fiafia ki te loi.

⁸Aku muna katoa e fai e tonu katoa; e seai se muna loi io me e se.

⁹A te mea nei e maina ki a latou kola e atamai; E pena foki ki a latou kola e poto.

¹⁰Ke filifili ne koe aku akoakoga i lo te siliva; Fili foki ne koe te poto i lo te tina aulo.

¹¹“Au ko te poto, e sili atu au i fatu taua; E sili atu au i mea taua e manako ki ei tou loto.

¹²Au ko te poto, au e atamai; au e poto, kae tonu foki aku fakamasinoga.

¹³A te ava ki te Aliki ko te takalialia ki te masei; Au e se fiafia ki te fakamatamata mo te fiasili, pela foki a auala masei mo muna loi.

¹⁴E fai aku fuafuaga kae fakataunu foki ne au. E lasi toku atamai, kae e malosi foki au.

¹⁵E fesoasoani au ki tupu i olotou pulepulega, Pela foki takitaki i te faiga o tulafono lei.

¹⁶A pule katoa o te lalolagi e fai olotou pulepulega mo toku fesoasoani, Ko tagata maluga fakatasi mo ofisa maluga.

¹⁷Au e alofa ki a latou kola e alofa mai ki a au; So se tino e fia 'sala mai ki a au e maua eiloa ne ia au.

¹⁸E mafai ne au o avatu a koloa mo te tulaga fakaaloalogia ki a latou kola e manako ki ei, Pela foki te maumea mo te manuia.

¹⁹A te mea e maua ne koutou mai i a au, E lei atu i te tina aulo, E lei atu foki i te siliva tafasili i te gali.

²⁰Au e sasale i te auala o te amiotonu; Au e tautali i te auala o te fai mea tonu,

²¹o avatu te maumea ki a latou kola e alofa mai ki a au, Kae fakafonu olotou fale ki koloa.

²² “Ko au ne muamua o faite ne te Aliki, Ko te kamataga o ana galuega i aso mua eiloa.

²³Au ne faite i te kamataga eiloa, i te taimi muamua, Kae koi tuai ei o isi te lalolagi.

²⁴Au ne fanau muamua i lo te moana, te taimi seki ai ei a punavai.

²⁵Ne fanau muamua au i lo mauga, kae koi tuai ei o isi ne mauga,

²⁶i te taimi seki faite ei ne te Atua a te lalolagi mo ana fatoaga, seki ai foki eiloa i ei ne one.

²⁷Au ne nofo i te taimi ne fakatulaga ei ne ia a te lagi, I te taimi ne futi ei ne ia te kapakapalagi i luga o te moana,

²⁸I te taimi ne fakatulaga ei ne ia a kaumana i te lagi pela foki i te taimi ne tala ei ne ia a punā tai o te moana,

²⁹kae fakatonu ne ia a vai o te tai ke mo a e silia te oloake o latou i te koga ne fakagata i ei ne ia. Au ne nofo foki i te fakatakatoga ne ia o te fakavae o te lalolagi.

³⁰Au ne nofo i ana tafa e pela me se tagata poto i te fakatūtū,[6] Au ko te pogai o tena fiafia i aso takitasi, e fiafia faeloa au i ona mua,

³¹e fiafia fakatasi mo te lalolagi pela foki mo ta'gata o te lalolagi.

³²“Nei la, e tamataene, fakalogo mai ki a au. Fai te mea e fai atu ne au, kae ka fiafia koutou.

³³Fakalogo ki mea ne akoako atu ki a koutou. Ke atamai koutou, kae sa fakapuli eiloa a mea ne akoako atu ki a koutou.

³⁴A te tagata e fakalogo mai ki a au ka fiafia — E pena foki te tagata tela e nofo faeloa i toku mataloa i aso katoa, O fakatalitali i te mataloa o toku fale.

³⁵A te tagata e maua ne ia au ko maua ne ia te ola, Kae ka fiafia foki te Aliki ki a ia.

³⁶A te tagata e se maua ne ia au e puapuaga; So se tino e takalialia ki a au, e fiafia ki te mate.”