Read Te Tusi Tapu I Te Gana Tuvalu Lomiga Lua FAATAOTO 9 Bible Online

FAATAOTO 9 - Te Tusi Tapu I Te Gana Tuvalu Lomiga Lua bible

FAATAOTO 9

¹A te poto ne faite tena fale kae ne faite ne ia e fitu pou mō tena fale tena.

²E isi se manu ne ta ne ia mo fai te kaiga, ne palu ne ia mea manogi mo te uaina, kae fakatoka ne ia te taipola.

³Ne uga ne ia ana tavini fafine ke tu i luga i te toe koga maluga eiloa i te fa'kai kae ke kalaga penei:

⁴“Tino valea, o'mai.” Kae ne fai atu a ia ki te tino valea penei,

⁵“Vau o kai i aku meakai kae inu i te uaina tenei ne palu ne au.

⁶Tiakina atu a tino valea kona, kae ka ola koe. Tautali i te auala o te poto.”

⁷Kafai e fakatonu ne koe se mea se a te tino valea, a te ikuga ka muna masei fua ne ia koe. Kafai e kote ne koe se tagata masei, a te ikuga ko koe fua ka kaitaua.

⁸Sa taumafai eiloa o fakatonu se tagata valea; a te ikuga, ka se fiafia ki a koe i a koe ne fakatonu atu ki a ia. Kae kafai e fakatonu ne koe se mea se a se tagata poto, e talia ne ia kae ka fakaaloalo mai ki a koe.

⁹So se mea e faipati ne koe ki se tagata poto ka fakaopoopo ki tena iloa. So se mea e faipati ne koe ki se tagata amiotonu ka fakaopoopo ki tena mea e iloa.

¹⁰ Kafai e fia maua ne koe te poto, e tau o muamua koe o fakalogo ki te Aliki. Kafai ko iloa ne koe te Tasi Tapu, ko maua ne koe te malamalama.

¹¹A te poto e fakaopoopo ne ia a tausaga o tou olaga.

¹²Kafai e maua ne koe te poto, ka manuia foki eiloa koe i ei. Kae kafai e se fiafia koe ki ei, ko koe foki eiloa e puapuaga.

¹³A te valea e pela me se fafine valea, gutu faipati kae matafatu.

¹⁴E sagasaga i te mataloa o tena fale, io me i se nofoaga i te feitu maluga o te fa'kai,

¹⁵kae kalaga ki tino kola e fakasili aka i te auala, kola e olo eiloa o fai olotou fekau. E penei ana kalaga:

¹⁶“Tino valea, o'mai!” E penei ana muna ki te tagata valea,

¹⁷“A te vai ne kaisoa e magalo atu. A te falaoa ne kaisoa e gali atu.”

¹⁸A tino kola e maua ne ia e se iloa ne latou me i tino e olo ki tena fale e mate, ka ko tino kola ko leva ne ulu ki loto i tena fale ko nofo nei i te lalolagi o tino mate.