Read Te Tusi Tapu I Te Gana Tuvalu Lomiga Lua FAILAUGA 11 Bible Online

FAILAUGA 11 - Te Tusi Tapu I Te Gana Tuvalu Lomiga Lua bible

FAILAUGA 11

¹Ave otou tupe o teu i koga fai mea togi i fenua fakaatea, me fakamuli kae ka isi se fakaopoopoga ki tau tupe.

²Teu au tupe i koga e uke, me e se iloa eiloa ne koe a fakalavelave ka oko mai ki a koe i te lalolagi tenei.

³Faitalia me e tefea te koga ne siga ki ei a te lakau, kae ka takato eiloa i te koga tena ne siga i ei. Kafai a kaumana ko fonu, tena ko 'to ei a vaiua.

⁴Kafai koe e fakatali ke 'lei te matagi mo te tau o te aso, ko tena uiga ka seai eiloa sau mea e mafai o toki, seai foki ne fuataga o lakau e maua ne koe.

⁵Ko te Atua ne faite ne ia a mea katoa, kae e se mafai ne koe o malamalama i mea e fai ne ia e pela eiloa mo koe e se malamalama foki i te kamataga o te ola o te pepe i te moega tama o te fafine faitama.

⁶Ke toki ou lakau i te taeao pela foki i te afiafi. E se mafai o iloa ne koe me e ola 'lei katoa io me ka ola 'lei nisi kae se ola 'lei nisi.

⁷E fakafetai tatou me e mafai ne tatou o lifu i te mainaga o te ao.

⁸Ke fakafetai faeloa koutou mō tausaga katoa e ola ei koutou. Faitalia me e fia tausaga e ola ei koe, kae masaua me e leva atu tou nofo i te tanuga. E seai eiloa se mea e tau o fakamoemoe tatou ki ei.

⁹Tupulaga tuputupu, ke fakafiafia otou olaga i a koutou koi tupu aka. Fai te mea e 'loto koutou ki ei, mo te mea e ma'nako ki ei otou loto. Kae masaua i te Atua e fakamasino ne ia koutou i otou mea e fai.

¹⁰Taumafai ke sa fakamafa otou mafaufau ki ne mea, io me se fai a mea e mae ei koutou. E se leva nei ko gasolo foki ei koutou o matua.