Read Te Tusi Tapu I Te Gana Tuvalu Lomiga Lua FAILAUGA 5 Bible Online

FAILAUGA 5 - Te Tusi Tapu I Te Gana Tuvalu Lomiga Lua bible

FAILAUGA 5

¹Fakaeteete manafai ko ulu koe ki loto i te Faletapu. E sili atu te fano ki te Faletapu o tauloto i lo te fano o ofo taulaga e pela mo te mea e fai ne tino va'lea, tino kola e se iloa ne latou te mea tonu mo te mea 'se.

²Mafaufau muamua kae koi tuai koe o faipati, kae sa sona tauto valevale ki te Atua. A Ia e nofo i te lagi, ka ko koe e nofo i te lalolagi, tela la, sa to fakaukeuke au muna e fai.

³Ko te uke o mea e 'mafa i tou mafaufau, ko te vave o oko mai o moemiti ma'sei ki a koe; ko te gutu faipati o koe, ko te vave o fai ne koe o se muna valea.

⁴ Tela la, kafai e tauto koe ki te Atua ke fai se mea, masaua o fakataunu fakavave eiloa. E se manumanu a ia ki tino valea. Fai te mea ne tauto koe o fai.

⁵E sili atu te lei ke se fai sau tautoga, i lo te fai o tau tautoga kae e se tausi ne koe.

⁶Taumafai ke mo a koe e agasala i au muna ne fai, i a koe ma fano ki te faitaulaga a te Atua o fai ki ei me se ko tou loto o faipati pena. Ai a ka fai fua ei ne koe te Atua ke kaitaua ki a koe? Ai a ka fai fua ei ne koe ke fakama'sei ne ia a mea ne galue fi'ta koe o faite?

⁷Me e pefea te uke o taimi e moemiti ei koe me e pefea te uke o galuega se aoga a koe ne fai, me e pefea te uke o taimi e gutu faipati ei koe, kae masaua me e tau eiloa koe o mataku ki te Atua.

⁸Sa poi mafai e lavea ne koe a te malō e fakapuapuaga ne ia a tino ma'tiva, kae e se avatu ki a latou a te saolotoga e tau o maua ne latou, kae e se fakamasino foki latou i te fakamasinoga tonu. A te ofisa e puipui ne te ofisa mai luga aka o ia; a ofisa kona e toko lua e puipui mai foki ne ofisa mai luga aka o laua.

⁹Ke oko foki eiloa ki te tupu, e fakalagolago ki te fua o te taukai.[3]

¹⁰Kafai koe se tino e manako ki tupe, e se mafai eiloa koe o malie; kafai koe e manako ke maukoloa koe, e se mafai o maua ne koe a mea katoa e manako koe ki ei. E seai eiloa se aoga.

¹¹Ko te lasi o tou maumea, ko te uke o gutu e fagai ne koe. A te mea faeloa e tasi e maua ne koe, me ko iloa ne koe i a koe e maumea.

¹²A te tagata galue, me e lava ana meakai mo ona kai me ikai, kae e mafai eiloa o maua se taimi e moe 'lei ei a ia i te po. A te tagata maumea ko to uke ana mea, tela la, e se mafai o moe faka'lei i te po me e mafaufau faeloa ki ana mea.

¹³Tenei te sua mea tafasili i te masei ne lavea ne au i te lalolagi tenei: a tino e fakaputu olotou tupe mō se taimi e manako latou ki ne tupe.[4]

¹⁴I se taimi fakamuli ifo ko 'galo mai olotou tupe i se auala se 'lei, tena la, ko seai ei ne tupe e tuku ki olotou tamaliki manafai ko mate atu latou.

¹⁵ E tiaki ne tatou te lalolagi tenei, e pela eiloa mo te o'maiga a tatou ki ei — ne o'mai tatou mo te seai, kae ka olo foki tatou mo te seai. E ui eiloa i galuega ne fai ne tatou i te lalolagi tenei, kae e seai eiloa se koloa e mafai o ave ne tatou manafai ko tiaki ne tatou te lalolagi tenei.

¹⁶Ko oko eiloa i te se tonu! E tiaki ne tatou te lalolagi e pela eiloa mo te o'maiga a tatou ki ei. Ne fi'ta tatou i galuega, o taumafai o afuli te matagi, kae se a te mea e maua ne tatou?

¹⁷A tatou ne ola i te pouliga mo te fanoanoa,[5] mafaufau 'mafa, kaitaua mo te masaki.

¹⁸Tenei te mea ko oti ne iloa aka ne au: a te mea tafasili e tau o fai ne so se tino ko te kai, inu kae fakafiafia i fua o ana galuega i te olaga toetoe tenei ne tuku mai ne te Atua ki a ia; tena te olaga e tau o ola ei te tagata.

¹⁹Kafai ne tuku mai ne te Atua a te maumea ki te tagata, ke fakafiafia ki ei te tagata tena, e tau eiloa mo te tagata tena o fakafetai kae fakafiafia ki mea ne fi'ta a ia o fai. A te mea tena se meaalofa mai i te Atua.

²⁰Ne talia ne te Atua a te tagata tena ke fakafiafia tena olaga, tela la, e se tau mo ia o mafaufau mafa ki te toetoe o te olaga tenei.