Read Te Tusi Tapu I Te Gana Tuvalu Lomiga Lua FAILAUGA 6 Bible Online

FAILAUGA 6 - Te Tusi Tapu I Te Gana Tuvalu Lomiga Lua bible

FAILAUGA 6

¹E isi se faiga se tonu e lavea ne au e fai i te lalolagi tenei.

²E tuku ne te Atua ki se tino a koloa e uke, mo se tulaga maluga mo manafa e uke, mo mea katoa e manako ki ei te tino tena, kae oti aka ko se tuku atu ne ia te tino tena ke fakafiafia i mea ne avatu ne Ia. Se tino fakaatea eiloa ka fiafia i mea kona. Ko oko eiloa i te se aoga kae se tonu.

³E mafai se tagata o maua ne ana tamaliki e toko selau, kae ola leva tena olaga; kae faitalia eiloa me e pefea te leva o tena olaga, kae kafai e seki fiafia a ia i te olaga tenei kae seki tanu faka'lei, tena la, e fai atu penei, me e sili atu a pepe ne fanau mai kae mate.

⁴E seai se aoga ne fanau mai ei a te pepe tena, me e toe galo atu ki te pouliga, tena ko se toe manatua ei a ia.

⁵E seki matea eiloa ne ia a te mainaga, se iloa foki ne ia me se a te olaga tenei, kae e lei me ko maua ne ia te malologa 'lei;

⁶e lei atu a ia i te tagata tela ne ola i se lua afe tausaga kae e seki fiafia eiloa i tena olaga katoa. A laua e olo katoa ki te koga e tasi.

⁷A te tagata e fai ana galuega ke maua te mea mo ona kai, kae e se mafai o lava te mea e maua ne ia.

⁸I te feitu fea e lei atu ei te tagata poto i lo te tagata valea? Se a te 'lei e maua ne te tagata mativa mafai e iloa ne ia o fai tena olaga?

⁹E seai se aoga; e pela me se tino e taumafai o afuli a te matagi. E sili atu te lei ke na malie koe ki mea e maua ne koe i lo te manako faeloa ki mea e uke.

¹⁰A mea katoa konei e tupu ne mea ko leva ne fuafuagina i aso mua; kae e iloa foki ne koe [6] me e se mafai ne koe o faka kinau ki se tino e malosi atu i a koe.

¹¹Ko te leva o tau kinauga, kae gasolo o se aoga, kae seai eiloa se 'lei e maua ne koe mai i ei.

¹²Ko oi te tino e mafai o iloa ne ia te mea e tau mo te sua tino i te olaga toetoe kae se aoga tenei — se olaga e vau kae fano pela mo se ata? E mafai pefea ne se tino o iloa te mea ka tupu i te lalolagi manafai ko oti a ia ne mate?