Read Te Tusi Tapu I Te Gana Tuvalu Lomiga Lua FAILAUGA 7 Bible Online

FAILAUGA 7 - Te Tusi Tapu I Te Gana Tuvalu Lomiga Lua bible

FAILAUGA 7

¹ A te takuleia o te tino e sili atu te 'lei i lo te sausau manogi kae togi mafa; a te aso e mate ei koe e lei atu i te aso ne fanau mai ei koe.

²E sili atu te fano ki se fale tela e tagi fanoanoa mai i ei a tino, i lo te fano ki se koga e fai ei se kaiga fiafia, me se mea tau mo tino konei e ola o fakamasaua faeloa i te mate e fakatalitali mai ki a tatou katoa.

³A te fanoanoa e lei atu i te katakata; ka fai ne ia koe ke mata fanoanoa, kae e fai ne ia koe ke lasi tou malamalama.

⁴So se tino e mafaufau faeloa ki te fiafia se tino valea. A te tagata poto e mafaufau faeloa ki te mate.

⁵E sili atu te lei mafai e kote koe ne tino poto, i lo te usu mai ne tino va'lea a pese e vikia ei koe.

⁶Kafai ko kata se tino valea, e pela eiloa me ne lakau talatala ko 'ka i te afi. E seai eiloa sena uiga.

⁷Kafai te tino poto ko fakatogafiti ne ia se tino, se amioga valea tena. Kafai e talia ne koe se togi fakakolekole, ko fakamasei ne koe tou igoa.

⁸A te gataga o so se mea e lei atu i tena kamataga. A te kufaki e lei atu i te fakamatamata.

⁹ Taofiofi sale tou kaitaua; se uiga valea o 'teu se mea masei i tou loto.

¹⁰Sa ti fesili sale penei, “Ai a e 'lei atu ei te olaga i aso mua i lo aso nei?” A te mea tena se se fesili a se tagata poto.

¹¹So se tino e ola i te olaga tenei e tau o poto; a te aoga o te poto e pela eiloa manafai ko maua ne koe se mea taua mai ou matua,

¹²e mafai ne te poto o fai tou olaga ke tokagamalie, e pela eiloa mo te mea e mafai ne te tupe o fai. A te poto e tausi ne ia koe ke saogalemu, tena te mea e aoga ei te poto ki te tino.

¹³Mafaufau aka ki mea ko oti ne fai ne te Atua. E mafai pefea ne se tino o faka tonu a te mea ko oti ne fakapikopiko ne te Atua?

¹⁴Kafai ko solosolo 'lei tou olaga, ke fiafia koe, kae kafai ko oko mai te puapuaga, ke masaua ne koe me ko te Atua e aumai ne ia te fiafia mo te puapuaga. E se mafai o iloa ne koe me se a te mea ka tupu i te sua taimi.[7]

¹⁵A toku olaga se olaga e se aoga, kae e tasi te mea ne maua ne au mai i ei, me ne lavea kae iloa ne au a mea katoa. I nisi taimi, e mate te tagata 'lei ka ko te tagata masei e ola faeloa.

¹⁶Tela la, sa manako ke to lei koe, io me manako ke to poto koe, ai a ka sona fai fua ei koe ke mate?

¹⁷Kae sa to amio masei foki io me to valea — ai a ka sona fai fua koe ke mate kae seki oko mai tou taimi?

¹⁸Taumafai o kalo keatea mai feitu kona e lua. Kafai koe se tino lotu a koe e manuia eiloa.

¹⁹E lasi atu te aoga e maua ne te tagata mafai a ia e poto, i lo te aoga e mafai ne te tinogafulu takitaki o fai ki se fa'kai.

²⁰E seai se tino i te lalolagi e fai faeloa ne ia te mea tonu kae se mafai o 'se.

²¹Se saga sale ki mea katoa e faipatigia ne tino — i se taimi, ka lagona ne koe tau tavini e fai muna se 'lei e uiga ki a koe,

²²kae e iloa faka'lei foki ne koe me ko oti foki koe ne fai muna se 'lei ki nisi tino i taimi e uke.

²³Ne fakaaoga ne au toku poto o tofotofo katoa a mea kona. Au ne fakamalosi eiloa ko au ke poto, kae ko to faigata ki a au.

²⁴E mafai pefea ne se tino o iloa te uiga o te olaga tenei e ola tatou i ei? Ko to loto te feitu tena ki a tatou, ko to faigata o malamalama tatou i ei.

²⁵Ka ko au ne saga malosi o tauloto; au ne fakamalosi eiloa o sala te poto, mo tali ki aku fesili, kae sukesuke foki te masei o te valea.

²⁶Ne maua aka ne au te mea e tafasili atu i te kona i lo te mate — ko te fafine. A te alofa tela e tuku atu ne ia ki a koe ka lave ei koe pela me se tino e lave i se malei io me se tili; a lima o ia kola e puke atu ki a koe ka sai ne ia koe e pela me se filifili. A te tagata e fiafia ki ei te Atua e mafai o sao, ka ko te tino agasala e maua gofie ne te fafine.

²⁷Muna a te failauga, e tonu, ne maua ne au te mea tena i te taimi ne sukesuke ei au ki tali o aku fesili.

²⁸Ne sukesuke foki au ki nisi tali o nisi fesili kae e seki maua eiloa ne au. E tokotasi te tagata i se toko afe ne maua ne au e mafai o fakaaloalo au ki ei, kae e seai eiloa se fafine e mafai o fakaaloalo au ki ei.

²⁹Tenei fua te mea ko oti ne iloa ne au: tatou ne faite ne te Atua ne tino fatauva ka ko tatou ko fai eiloa ne tatou a tatou ke pela me ne tino ko se atafaia eiloa.