Read Te Tusi Tapu I Te Gana Tuvalu Lomiga Lua FAILAUGA 9 Bible Online

FAILAUGA 9 - Te Tusi Tapu I Te Gana Tuvalu Lomiga Lua bible

FAILAUGA 9

¹Ne leva eiloa taku mafaufauga ki mea katoa konei, lavea ei ne au me ko te Atua e pule ne Ia a faiga a tino poto mo tino amiotonu, ke oko foki eiloa ki uiga alofa o latou mo uiga ita o latou. E seai se tino e iloa ne ia te mea ka oko mai ki a ia fakamuli.

²E seai se 'fuliga e mafai ne ia o fai. [8] Ko te ikuga foki tena e oko mai ki tino amiotonu mo tino amio masei, ki tino 'lei mo tino ma'sei, ki tino lotu mo tino se lotu, ki tino e ofo sale olotou taulaga mo tino e seai ne olotou taulaga e fai sale. A te tino 'lei e pau faeloa mo te tino agasala; a te tino e fai sena tautoga e pau faeloa mo se tino e se fai sena tautoga.

³E tasi te ikuga e oko mai ki a tatou katoa, a te mea tena se mea 'se, e pela foki eiloa mo mea katoa e tupu i te lalolagi tenei. I aso e ola ei a tino, a olotou mafaufauga e fonu faeloa i amioga ma'sei mo te valea, kae se leva ko mate mai latou.

⁴A te tino tela e ola i te lalolagi o tino ola e tau o isi sena fakamoemoega foliki; a te kuli tela e ola e lei atu i te leona mate.

⁵E tonu, e iloa ne tino ola i a latou e mate, ka ko tino mate e seai se mea a latou e iloa. E seai aka foki eiloa se mea 'lei e maua ne latou me ko se toe manatua latou.

⁶A uiga alofa mo uiga ita o latou ko mate fakatasi atu eiloa mo latou. Ko se tau o kau mai eiloa latou ki mea konei e tupu i te lalolagi tenei.

⁷Kai otou meakai kae fiafia, inu otou uaina kae fiafia. E lei faeloa mea katoa i te kilokiloga a te Atua.

⁸Ke mata fiafia faeloa koutou.

⁹Ke fiafia koutou i te olaga tenei fakatasi mo te fafine e alofa koe ki ei, i aso e ola ei koe i te olaga se aoga tenei tela ne tuku mai ne te Atua ki a tatou i te lalolagi tenei. Ke fakafiafia koutou i aso takitasi o otou olaga, aso se aoga, me e tena faeloa te mea e maua ne koe e taui atu ei tou fi'taga i te lalolagi tenei.

¹⁰Galue malosi ki tau mea e fai, me kafai e oko koutou ki te lalolagi o tino mate, te koga ka olo koutou ki ei, e se toe mafau'fau koutou, seai se poto e toe sala ne koutou, se toe gasuesue foki koutou.

¹¹E tasi te sua mea tenei ne iloa aka ne au, me i te lalolagi tenei, a tagata tele makini e se tumau faeloa te lotou manumalo i fakatau telega, mo tino toa e se manumalo faeloa i taua. A tino poto e se tumau faeloa i te olaga 'lei, a tino atamai e se maua katoa ne latou te maumea, mo tino fai mea mafai e se tumau faeloa te siki ki tulaga ma'luga. A te malaia e maua ne tino katoa.

¹²E se mafai o iloa ne koe mafai ko oko mai tou taimi. E pela mo manu e lave i malei, mo ika e lave i tili, e pena foki tatou e lave foki tatou i se malei i se taimi masei manafai e se saga malosi tatou ki ei.

¹³E isi foki se mea e tasi ne lavea ne au, e fakatusa ei te uiga o te poto i te lalolagi tenei.

¹⁴E isi se fa'kai foliki kae se tokouke a tino e nofo i ei. E isi se tupu malosi ne taua atu ki te fa'kai tena, ne nikoi ne ia mo tena potukau, kae ko fakatoka na o ofa a pui ke to atu a ia mo tena kau ki loto i te fa'kai tena.

¹⁵E isi se tino mativa kae poto ne nofo i kona, ne mafai ne ia o fakasao te fa'kai moi ne fai e manatua a ia ne se tino. Kae e seai eiloa se tino e mafaufau ki a ia. [9]

¹⁶Au ne fai atu faeloa i te poto e sili atu i te malosi, kae e seai eiloa se tino e mafaufau i te tagata mativa tena e poto, kae se fakalogo foki ki ana muna e fai.

¹⁷E sili atu te fakalogo ki muna faifai malie a te tagata poto i lo te fakalogo ki te leo kalaga a te takitaki i te maopoopoga a tino valea.

¹⁸E lasi atu te mea e mafai ne te poto o fai i lo meatau, ka ko te tino agasala e mafai ne ia o fai a mea se 'lei e uke.