Read Te Tusi Tapu I Te Gana Tuvalu Lomiga Lua PESE A SOLOMONA 4 Bible Online

PESE A SOLOMONA 4 - Te Tusi Tapu I Te Gana Tuvalu Lomiga Lua bible

PESE A SOLOMONA 4

¹Taku pele, ko se fakatau eiloa tou taulekaleka! A tou alofa ko maina mai mai ou mata, mai tua o tou veli. A ou laulu ko saka'saka fua, e pela me se lafu kouti e teka'teka ifo mai koga maluga o Kileata.

²A ou nifo ko kena eiloa pela me ne mamoe kola ko fatoa oti ne vele kae mulu faka'ma. E seai eiloa se nifo e galo, Kae ko oko eiloa i te tu 'lei.

³A ou laugutu e pela me se lipine lanu kulakula; Ko oko eiloa i te gali mafai e faipati koe. A ou kalafau ko malapu'lapu faka eiloa i tua o tou veli.

⁴A tou ua e pela mo te taoa o Tavita, E pukupuku kae maniania, Kae mau i ei a te malele, e pela me e tautau i ei ne talita e afe.

⁵A ou u e pela me ne kasele, E pela me se masaga tia e kaikai i te va o lili.

⁶Au ka nofo i luga i te koga maluga o mulo, Te koga maluga o mea ma'nogi, Ke oko ki te taimi e agi mai ei te matagi o te vaveao kae matafi atu mo te pouliga.

⁷Taku pele, ko se fakatau mai eiloa tou gali; Ko oko eiloa i te tugamalie o tou foitino!

⁸Taku avaga, tautali mai i au mai Mauga o Lepanona, Vau i a taua ka olo keatea mai Lepanona. Vau ki lalo mai te ulu o te Mauga o Amana, Mai te Mauga o Senila mo te Mauga o Helemoni, Te koga e nofo ei a leona mo lepoti.

⁹Taku pele, taku avaga, au ka kilo ki ou mata, Mo te malele i tou ua ko tosina katoatoa i ei toku loto.

¹⁰Taku pele, taku avaga, a tou alofa e fakafiafia ki a au. A tou alofa e sili atu i te uaina; A tou sausau e manogi atu i so se mea fakamanogi.

¹¹Taku pele, ou laugutu e magalo pela me se hani, A tou alelo e pela me se susu mo te hani ki a au, A ou gatu e katoatoa i ei a manogi katoa o Lepanona.

¹²Taku pele, taku avaga, a koe e pela me se fatoaga funa, Se fatoaga e fai ona 'pui, se vaipuna e se iloa ne tino;

¹³I kona, e ola 'lei ei a lakau. E ola pela me se fatoaga e ola ei a lakau ko pomekalanite, Kae fua mai i ei a fuataga tafasili i te gali. E isi foki i ei ne lakau manogi e igoa ko hena, nati,

¹⁴Mo safaloni, mo kalamusi mo kinamoni mo nisi vaega mea ma'nogi valevale. A mulo mo aloe e ola foki i kona mo sausau ma'nogi katoa.

¹⁵E isi se vaipuna e fakasusu ei a te fatoaga tena, Se vai e tafe mai, mai luga i Mauga o Lepanona.

¹⁶Te Matagi mai Matu, ala mai ki luga. Te Matagi mai Saute, agi mai ki taku fatoaga ke fonu te ea i te manogi. A taku pele ke vau ki tena fatoaga o kai a fuaga tafasili eiloa i te 'lei i ei.