Read Te Tusi Tapu I Te Gana Tuvalu Lomiga Lua PESE A SOLOMONA 5 Bible Online

PESE A SOLOMONA 5 - Te Tusi Tapu I Te Gana Tuvalu Lomiga Lua bible

PESE A SOLOMONA 5

¹Taku pele, taku avaga, Au ko oti ne ulu ki loto i taku fatoaga. Au tenei ko fakaputu nei aku mea fakamanogi mo mulo; Au tenei ko kai aku hani, Kae inu aku uaina mo susu. Koulua kona e taugasoa, kai kae inu ke ma'lie koulua!

²I te taimi e moe ei au, ka ko toku loto e ala. Au ne moemiti i toku taugasoa e tukituki mai i te mataloa. Taku famau, taku pele, taku lupe, ke ulu atu au ki loto. A toku ulu ko 'siu i te sau, Mo oku laulu ko 'su i te sau.

³Au ko leva ne tapale oku gatu; Ai a ka toe pei fua ei oku gatu? Oku vae ko oti ne fulu; Ai a ka toe fakalai'lai fua ei?

⁴Ne puke mai a lima o taku pele ki te mataloa, Ka ko au ko oko eiloa i te fiafia me ko pili mai a ia ki a au.

⁵Au ko toka o faulu mai a ia ki loto. A oku lima ko fonu i te mulo, A oku matikao ko siu katoa i te sua o te mulo, I te taimi ne puke atu ei au ki te kau o te mataloa.

⁶Ne tala atu ne au te mataloa ki taku fagasele, Kae tela la, ko leva eiloa a ia ne fano. Ko oko eiloa i toku fia fakalogo ki tena leo! Ne sala au ki a ia, kae seki maua ne au; Ne kalaga atu au ki a ia, kae seki tali mai.

⁷A tino kola e tausi ne latou a te fa'kai, ne maua ne latou a au; Ne kini ne latou a au, pakia ei au; A sotia tiute o te pui o te fa'kai ne sae ne latou toku gatu.

⁸Fafine o Ielusalema, tauto mai ki a au me kafai e maua ne koutou taku famau, Ke fai koutou ki ei i a au ko vaivai i te alofa.

⁹Te fafine tafasili i te taulekaleka i fafine katoa, E a, e se pau tau pele mo tino katoa? Se a te mea e kese ei a ia, Tena e fai mai ei koe Ke tauto atu eiloa matou ki a koe?

¹⁰A taku pele e taulekaleka kae malosi; A ia se tagata e maua gata, e tokotasi aka eiloa a ia i se toko sefulu afe.

¹¹A ona mata e mania'nia kae lanu aulo; A ona laulu e fatifati, Kae uli pela mo fulu o te oleva.

¹²A ona mata e gali pela me ne lupe i tafa o se vai e 'tafe, Pela me ne lupe ne koukou ki te sua o te susu Kae tu i tafa o se vaitafe foliki.

¹³A ona kalafau e gali e pela me se fatoaga Tela e fonu i lakau 'gali mo mea fakamanogi. A ona laugutu e pela me ne lili, E siu i te sua o te mulo.

¹⁴A ona lima e gali, kae e isi ne ana mama e fakagaligali ki fatu taua. A tena foitino e maniania e pela me ne nifo o te elefane, Kae teu ki fatu taua e igoa ki safaila.

¹⁵A ona vae e pela me ne pou alapasa e ufi ki aulo. A ia e maluga kae takutakua e pela mo Mauga o Lepanona, Kola e tu ei a alasi ma'luga.

¹⁶A tena gutu e gali i te sogi; So se mea i tena foitino e tosina ei toku loto. Fa'fine o Ielusalema, e pena foliga o taku famau.