Read Te Tusi Tapu I Te Gana Tuvalu Lomiga Lua PESE A SOLOMONA 7 Bible Online

PESE A SOLOMONA 7 - Te Tusi Tapu I Te Gana Tuvalu Lomiga Lua bible

PESE A SOLOMONA 7

¹Ko sei se fafine ne gali pela mo koe! Ko oko eiloa i te gali o ou vae i taka. A te gaofega o ou vae e pela eiloa me se ata ne fai ne se tagata poto i te 'lomi.

²A tou pito e pela me se pola, Tela e se mafai o masa te uaina ne fakamanogi i ei. A tou taugasulu e pela me se saitaga saito Tela e fakatamilo ne lili.

³A ou u e pela me se masaga a tia, E pela me se ava kasele.

⁴A tou ua e pela me se taoa ne faite ki nifo o elefane. A ou mata e pela mo pugapugaloto vai i te fa'kai o Hesepono, I tafa o te mataloa o te fa'kai takutakua tena. A tou isu e gali pela mo te taoa o Lepanona Tela e tu o tausi Tamaseko.

⁵A tou ulu e tu tonu ki luga e pela mo te Mauga o Kalamelu. A ou laulu kola ne saisai fakagaligali e maina mai e pela me se silika tafasili i te gali; A te gali o tou laulu e mafai o fai ne ia se tupu ke kilo faeloa ki ei kae ko se toe gasue.

⁶Ko oko eiloa i tou gali kae taulekaleka; A tou alofa ko oko eiloa i te katoatoa.

⁷A tou foitino e loa e pela me se lakau ko te pama, Ka ko u o koe e pela mo fui o lakau ko pama.

⁸Au ka kake i te lakau ko te pama o tau ona fuaga. A taku kilo ki ou u e pela me ne fui o vine, A tou manava e pela mo te manogi o apolo,

⁹Ka ko tou gutu e pela mo te uaina tafasili i te gali. Ke tafe atu te uaina ki taku pele, Ke tafe atu i luga i ona laugutu mo ona nifo.[5]

¹⁰Au e a taku pele, kae e manako mai foki a ia ki a au.

¹¹Taku pele, vau ke olo taua ki te feitu ki tua o te fa'kai O moe i te po i fa'kai foliki.[6]

¹²Ka ala vave taua i te vaveao o onoono ki vine Ke lavea aka ne taua me ko ola me ikai, Me ko ma'tala a pula me ikai, Pela foki mo pomekalanite me ko isi ne pula i ei me ikai. I kona, ka fakaasi atu ei ne au toku alofa ki a koe.

¹³E mafai o 'sogi ne koe te manogi o manutalake, Mo fuaga gali katoa e pili mai fua ki te mataloa o 'ta fale, Me ne tausi fakalei ne au a mea katoa kona ma koe taku pele.