Read Te Tusi Tapu I Te Gana Tuvalu Lomiga Lua ISAIA 1 Bible Online

ISAIA 1 - Te Tusi Tapu I Te Gana Tuvalu Lomiga Lua bible

ISAIA 1

¹ A te tusi tenei e tusi i ei a fekau e uiga ki Iuta mo Ielusalema, kola ne fakaasi mai ne te Atua ki a Isaia te tama tagata a Amota, i te taimi o nofoaiga a tupu o Iuta ko Usia, Iotama, Aasa mo Hesekia.

²Muna a te Aliki, “Te lagi mo te lalolagi, fakalogo mai ki aku muna konei e fai atu! A tamaliki konei ne puti ake ne au ko teke mai ki a au.

³A pulumakau e iloa ne latou a tino kola e pule i a latou, mo asini e iloa ne latou te koga e fagai sale ei latou ne te lotou matai. Ka ko toku fenua ko Isalaelu, e se iloa ne latou a mea kona. E se malamalama lele eiloa i se mea e tasi.”

⁴A koutou ko malaia, koutou te fenua agasala, koutou te fenua se aoga kae amio masei! A koutou ko ave ifo eiloa ne otou agasala! Ko teke ne koutou te Aliki, te Atua malu o Isalaelu, kae ko fulitua atu foki koutou ki a ia.

⁵Ai a e tumau faeloa ei te teke o koutou? E manako koutou ke soloki ake te fakasalaga o koutou? Isalaelu, a tou ulu ko leva ne fonu i pakiaga, kae ko masaki foki tou loto mo tou mafaufau.

⁶E seai eiloa se vaega o tou foitino, mai i tou ulu ke oko ki ou vae e malosi. A koe ko fonu i pakiaga mo matakili. A ou pakiaga e seki fulu kae seki fusi fakalei foki. E seai se vailakau kai mili ki ei ou pakiaga.

⁷A te otou fenua ko oti ne fakamasei, mo otou fa'kai ko oti ne sunu. Ne o'mai a tino o fenua fakaatea o puke te otou fenua kae ofa a mea katoa, kae kilokilo atu eiloa koutou ki mea kona e fai ne latou.

⁸Ko Ielusalema fua tena e toe, kae ko nikoi foki nei ne te fili. E se taitai eiloa o malu mai i te fili, e pela eiloa mo se fale o te tino leoleo i se togāvine, io me se fale i se fatoaga kukamupa.

⁹ Moi ne seki fakaola ne te Atua a nisi tino, e penei ne ofa fakapalele eiloa a Ielusalema, e pela eiloa mo Sotoma mo Komolo.

¹⁰Ielusalema, a ou takitaki mo ou tino ko pela mo takitaki mo tino o Sotoma mo Komolo. Fakalogo mai ki muna a te Aliki ki a koutou. Saga tonu mai ki akoakoga a te Atua ki a koutou.

¹¹ Muna a ia, “I te otou fakatau au e fiafia ki taulaga a koutou konei e ofo mai faeloa ki a au? Au ko fiu i otou mamoe kona e sunu mo fai otou taulaga, pela foki a gako o otou manu vae fa lei. Au ko fiu i toto o pulumakau, mamoe mo kouti.

¹²Ko oi te tino ne fai atu ke aumai a mea katoa kona i te taimi e o'mai ei koutou o tapuaki mai ki a au? Ko oi te tino ne fai atu ke o'mai koutou o oloolo sale i loto i toku Faletapu?

¹³E seai se aoga e aumai ei otou taulaga. Au ko takalialia i te manogi o taulaga sunu a koutou. Ko se toe fiafia au ki otou 'Kaiga Fiafia o Masina Tu, otou Sapati, ke oko eiloa ki otou maopoopoga faka te lotu, ko se aoga a mea kona ona ko otou agasala.

¹⁴Au ko se fiafia ki otou 'Kaiga Fiafia o Masina Tu, mo aso kona e faka'malu ne koutou; ko oko eiloa i te fakalavelave mai ki a au.

¹⁵“Kafai e sisi ake otou lima o talo, ka ko au e se fia kilo atu lele eiloa ki a koutou. Me e pefea eiloa te talo malosi mai o koutou ki a au, kae ka se fakalogo lele atu eiloa au ki a koutou, me i otou lima ko fonu i toto.

¹⁶Koukou ke 'ma otou foitino, kae na fakagata nei otou amioga masei konei e lavea atu ne au e fai ne koutou. Ao, fakagata otou amioga masei

¹⁷kae na taumafai o fai te mea tonu. Onoono fakalei ke fai te mea tonu, fesoasoani ki tino puapuaga, avatu te saolotoga o tamaliki seai ne matua, kae puipui fakalei foki ne koutou a fafine ko mate olotou avaga.”

¹⁸Muna a te Aliki, “Nei, ka fakatoka ne tatou te mataupu. A koutou ko fonu i te agasala, kae nei ka faka'ma ne au koutou ke 'ma pela me se kiona.[1] E ui eiloa i a koutou ko oko eiloa i te lailai, kae ka fulu ne au koutou ke kena pela me ne vulu.[2]

¹⁹Kafai e fakalogo mai koutou ki a au, kae ka kai koutou ki mea lei kola e fua mai i te laukele.

²⁰Kae kafai e teke mai koutou ki a au, ko koutou ka tamate ne au. Ko au, te Aliki, tena ne faipati atu.”

²¹A te fa'kai tela ne masani o fakamaoni sale ko amio pela me se fafine tali tagata. I aso mua, ne fonu i tino amiotonu, kae nei ko tino tatino fua kona e toe mai i ei.

²²Ielusalema, a koe ne pela me se siliva i aso mua, kae nei koe ko se aoga; a koe ne pela me se uaina tafasili i te lei i aso mua, kae nei a koe ko pela fua me se vai.

²³A ou takitaki e se fakalogo kae e taugasoa ki tino kaisoa; e talia faeloa ne latou a meaalofa kola e togi fakakolekole ki ei latou. E se mafai lele eiloa o kau ki tamaliki seai ne matua i taimi o fono tulafono, io me fakalogo ki fafine ko mate olotou avaga i te taimi e fakaasi ei mea e fakatagi ki ei latou.

²⁴Tela la, fakalogo mai nei ki muna a te Aliki Malosi, te Atua Malosi o Isalaelu: “Oku fili, ka taui atu nei ne au ki a koutou e tusa eiloa mo otou amioga ne fai, tena la, ko se toe fakalavelave mai ei koutou ki a au.

²⁵Ka fai ne au se faiga ki a koutou. Ka faka'ma ne au koutou, e pela eiloa mo te fiti tela e faka'ma, kae ka ave keatea ne au a uiga masei katoa mai i a koutou.

²⁶Ka tuku atu ne au a takitaki mo tino fai manatu fakatonutonu ki a koutou, e pela eiloa mo te kau i aso mua. Tena la, ka taku ei a Ielusalema ko te fa'kai amiotonu kae fakamaoni.”

²⁷Ka fakasao ne te Aliki a Ielusalema fakatasi mo tino katoa i ei kola e salamo, me i a Ia e amiotonu.

²⁸Ka tukipala ne ia a tino katoa kola e agasala kae teke ki a ia; ka tamate ne ia a tino katoa kola e se saga ki a ia.

²⁹Ka salamo koutou i a koutou ne olo o tapuaki ki lakau kae toki ne koutou a fatoaga, kae fakatapu ki atua fapaupau. [3]

³⁰Ka mate atu koutou pela me se lakau ko te oka tela ka fai o mate, pela me se fatoaga tela e seai se tino e fano o fakasiusiu.

³¹A tino malosi kae takutakua ka ta fakapalele ona ko olotou amioga masei, e pela eiloa mo te kausaito tela e ka i te kalokaloafi, kae ka seai eiloa se tino e mafai o fakagata ne ia te fakalavelave tena ka oko ki a latou.