Read Te Tusi Tapu I Te Gana Tuvalu Lomiga Lua ISAIA 10 Bible Online

ISAIA 10 - Te Tusi Tapu I Te Gana Tuvalu Lomiga Lua bible

ISAIA 10

¹A koutou ko malaia! E fai ne koutou a tulafono se tonu kola e fakapuapuaga ei oku tino.

²Tena te auala e fai ne koutou ko te mea ke se maua ne tino mativa te saolotoga tela e tau o maua ne latou, kae ke fakaloiloi faeloa ne koutou ki tulafono se tonu. Tena foki te faiga e fao ei ne koutou a mea a fafine ko mate olotou avaga mo tamaliki seai ne matua.

³Se a te otou mea ka fai manafai ko fakasala koutou ne te Atua? Se a te otou mea ka fai manafai ko aumai ne ia te puapuaga ki a koutou mai i fenua mao? Tefea te koga ka tele ki ei koutou mo se fesoasoani? Tefea te koga ka funa ei otou koloa?

⁴A koutou ka mate i te taua, io me toso keatea o ave fakapagota. E ui i te mea tena, ka ko te kaitaua o te Aliki e se gata eiloa; ka tumau eiloa te fola mai o tena lima o fakasala koutou.

⁵ Muna a te Aliki, “Asulia! E fakaaoga ne au Asulia pela me se pago o fakasala ei a tino kola e ita au ki ei.

⁶Ne uga ne au Asulia ke taua atu ki te fenua fapaupau, ki tino ne fai ne latou au ke kaitaua. Ne uga ne au ke olo o fao malo a mea kae kaisoa, kae lakalaka a tino pela me ne pefu i auala.”

⁷Ka ko te tupu o Asulia e isi eiloa ne ana fuafuaga fakasaua i tena mafaufau. Ko tonu i tena loto ke 'ta fakapalele ne ia a malo e uke.

⁸E fai ana muna fakamatamata penei, “A takitaki kau katoa a aku, ne tupu katoa!

⁹Ne fakatakavale ne au a fa'kai ko Kalino mo Kakemisa, fa'kai o Hamata mo Apata. Ne fakatakavale foki ne au a Samalia mo Tamaseko.

¹⁰Ne fakaoko atu toku lima o fakasala a malo kola e tapuaki ki tupua, tupua kola e uke atu i tupua i Ielusalema mo Samalia.

¹¹Ko oti ne fakamasei valevale ne au a Samalia mo tupua katoa i ei, ka pena foki te mea ka fai ne au ki Ielusalema mo fakatusa kola e tapuaki ki ei a tino i kona.”

¹²Kae ne fai mai te Aliki penei, “Kafai ko maea fakalei te mea tenei e fai ne au i luga i te Mauga o Siona, pela foki i Ielusalema, ko fakasala ei ne au te tupu o Asulia ona ko ana muna fakamatamata mo ona uiga fiasili.”

¹³E penei a muna fakamatamata a te tupu o Asulia, “Ne fai tokotasi eiloa ne au a mea kona. Au e malosi kae poto kae atamai. Ne solo keatea ne au a tuakoi o malo, kae fao malo a koloa kola ne teu ne latou. Ne lakalaka ne au a tino kona e nofo i koga kona, pela me se pulumakau.

¹⁴A malo o te lalolagi e pela me se ofaga o te manu, ne puke ne au olotou koloa e pela eiloa mo te faigofie o te taega o fua o manu. E seai eiloa se manu ne ga'sue ona kapakau o taumafai o afuli au keatea; seai foki se manu ne tagi o ita mai ki a au!”

¹⁵Kae ne fai mai te Aliki penei, “E mafai se takū o sili atu i te tino tela e fakaaoga ne ia? E a, e taua atu te soa i te tino tela e fakaaoga ne ia? A te pago e se mafai o sau aka ne ia a te tagata, ko te tagata e sau aka ne ia a te pago.”

¹⁶A te Aliki Malosi ka aumai ne ia ne masaki o fakasala ei a tino konei e kai makona. Ka isi se afi i loto i olotou foitino tela e ka faeloa.

¹⁷A te Atua, te mainaga o Isalaelu, ka fai mo afi. A te Atua tapu o Isalaelu ka fai mo ulaga afi, tela ka sunu ei a mea katoa ke oko foki eiloa ki vao mo lakau makaikai, i te aso eiloa e tasi.

¹⁸A te vao tela e ola malosi i ei a lakau, mo laukele kola e ola ei a lakau kaina, ka fakamaseigina katoa, e pela eiloa mo te masaki fakamataku tela e fakamasei ne ia te foitino o te tagata.

¹⁹Ka se uke a lakau e toe, tela ko mafai fua ne se tamaliki foliki o lau te aofaki.

²⁰Ka oko mai te taimi ka se toe faka lagolago ei a tino Isalaelu kola e toe mai, ki te malo tela ne moi ta fakamaea ne ia latou. Ka fakamaoni eiloa latou o fakatuaga ki te Aliki, te Atua tapu o Isalaelu.

²¹Ka se tokouke a tino Isalaelu kola ka foki mai ki te lotou Atua Malosi.

²² E ui eiloa i te taimi nei a tino Isalaelu e pela eiloa mo one o te matafaga i te tokouke, kae ne mu tino fua ka foki mai ki te Aliki. A tino ka ta fakapalele, kae ko tau foki eiloa te fakasalaga tena ki a latou.

²³Ao, ka ta fakamasei eiloa ne te Aliki Malosi a te fenua katoa o Isalaelu, e pela eiloa mo ana muna ne fai.

²⁴Muna a te Aliki Malosi ki ana tino kola e nofo i Siona, “Sa mataku ki tino Asulia kona e fakapuapuaga ne latou koutou, pela eiloa mo te mea ne fai ne Aikupito ki a koutou i aso mua.

²⁵E se leva nei ko palele atu ei te fakasalaga o koutou ne au, ko fakasaga atu ei au o ta fakapalele te kau Asulia.

²⁶Ko au, te Aliki Malosi, ka kini ne au latou ki te kini, e pela mo te kiniga ne au o tino Mitiana i te kaupapa o Olepa. Ka fakasala ne au a Asulia e pela mo te fakasalaga ne au o Aikupito.

²⁷Kafai e oko mai te taimi tena, ko fakasao ei ne au koutou mai i te malosi o Asulia, tela la, ko se toe fai ei mo fakalavelave ki a koutou.”

²⁸A te kautau a te fili ko oti ne fakatakavale ne latou te fa'kai o Ai![19] Ko oti ne ulu mai mai i loto i Mikilone! Ne tuku ne latou olotou meakai mo kope i Mekemase!

²⁹Ko oti ne ui mai i loto i te auala i va o mauga, kae konei e manava i te po nei i Kepa! A tino i te fa'kai ko Lama ko oko eiloa i te mataku, ka ko tino i te fa'kai o te Tupu ko Saulo tela ko Kipea ko oti ne tele keatea.

³⁰Tino o Kalima, kalaga! Tino o Laisa, fakalogo mai! Tino o Anatota, tali mai!

³¹A tino o fa'kai ko Matamena mo Kepima ko tele ke ola latou.

³²I te aso nei, a te fili ko nofo i te fa'kai o Nopa, kae e fakatupu olotou taganoa ki te Mauga o Siona, ki te fa'kai o Ielusalema.

³³Ka aumai ne te Aliki Malosi a te fili, e pela me ne kaula o lakau kola ne kati mai i te foitino o te lakau kae ko to ki lalo i te laukele. A tino tafasili eiloa i te maluga i a latou, kae tafasili foki i te fakamatamata, ka ta ki lalo kae fakaseaoga.

³⁴Ka ta latou ne te Aliki, e pela mo lakau kola i te kogaloto o te toga vao, kola e kati ki te takū. Ka pela latou mo lakau gali o Lepanona kola ka siga!