Read Te Tusi Tapu I Te Gana Tuvalu Lomiga Lua ISAIA 12 Bible Online

ISAIA 12 - Te Tusi Tapu I Te Gana Tuvalu Lomiga Lua bible

ISAIA 12

¹Ka oko mai te aso e usu pese ei a tino penei, “Te Aliki, e tavae ne au a koe! A koe ne kaitaua ki a au, Kae nei, ko fakamafanafana ne koe au kae ko se kaitaua mai foki koe ki a au.

² Te Atua ko toku fakaolataga; Au ka talitonu fakamaoni ki a ia, kae se mataku i se mea. Ko te Aliki e aumai ne ia ki a au a te mana mo te malosi; A ia ko toku fakaola.

³E pela mo te vai fou tela e aumai ne ia te fiafia ki tino fiainu, E pena foki te Atua me ka aumai ne ia te fiafia ki tena fenua, I te taimi e fakasao ei ne ia latou.”

⁴Ka oko mai foki te aso e usu ei a pese a tino penei, “Fakafetai atu ki te Aliki! Kalaga atu ki a ia mo se fesoasoani! Fakamatala atu ki malo a mea ne fai ne ia! Fakaasi atu ki a latou i te Atua e takutakua!

⁵Usu pese atu ki te Aliki ona ko mea fakaofoofogina ne fai ne ia. A te lalolagi katoa ke logo i te tala o mea ne fai ne te Atua.

⁶A tino katoa kola e nofo i Siona ke kalaga kae usu pese! A te Atua tapu o Isalaelu e takutakua, Kae e nofo fakatasi mo ona tino.”