Read Te Tusi Tapu I Te Gana Tuvalu Lomiga Lua ISAIA 13 Bible Online

ISAIA 13 - Te Tusi Tapu I Te Gana Tuvalu Lomiga Lua bible

ISAIA 13

¹ Ko te fekau tenei a te Atua ki a Isaia te tama tagata a Amota, e uiga mo Papelonia.

²Sisi ake te fuka o te taua i luga i te mauga tela e seai ne lakau e ola i ei! Kalaga atu ki sotia kae sisi aka tou lima ke fai mo fakailoga ki a latou ke olo o ofa a mataloa o te fa'kai fakamatamata kae taua atu ki ei.

³A te Aliki ne kalaga ki ana sotia loto toa kae fakamatamata, ke taua i te taua tapu o fakasala a tino kola e kaitaua a ia ki ei.

⁴Fakalogo ake ki te logoa mai o tino mai i luga i mauga — ko te leo o te ua'te o te vaitino e tokouke, ko te logoā o malo mo fenua kola e maopoopo. A te Aliki o kau ko fakatoka ana kautau mo te taua.

⁵Ko o'mai latou mai i fenua mao, mai i feitu o te lalolagi. A te Aliki ka vau i tena kaitaua o fakamasei valevale a te fenua katoa.

⁶ Paka'laga i te mae! A te aso o te Aliki ko pili mai, ko te aso tela ka aumai ei ne te Atua Malosi a te malaia.

⁷A lima o tino katoa ka tautau fua i olotou feitu me ko vaivai, ko se mafai o fai se mea, pela foki olotou loto toa ko seai eiloa.

⁸Ka ma'taku valevale latou kae osofia ne te mae valevale, e pela mo te mae o te fafine tela ka fai o fanau. Ka fakatau kilokilo latou ki a latou eiloa mo te mataku, mo olotou mata ka 'paku i te masiasi.

⁹A te aso o te Aliki ka oko mai, ko te aso fakamataku o tena ita mo tena kaitaua. A te lalolagi ka lavaki, ka ko tino agasala katoa ka 'ta fakapalele.

¹⁰ A fetu tu takitasi mo fetu tu putuputu ka se maina, a te la ka pouli i te taimi e fanake ei, pela foki te masina ka seai sena mainaga.

¹¹Muna a te Aliki, “Ka aumai ne au te puapuaga ki te lalolagi, kae fakasala a tino amio masei katoa ona ko olotou agasala. Ka fakamalalo ne au a tino fakamatamata kae fakasala a tino fiasili katoa mo tino masei.

¹²A tino e toe mai ka mutana fua pela mo te aulo e mutana.

¹³Ka fai ne au a lagi ke polepole, mo te lalolagi ka fakagasue ne au ke seke keatea mai i tena tulaga, i te aso tela ka fakaasi ei ne au, ko te Aliki Malosi, a toku kaitaua.

¹⁴“A tino fakaatea kola e nofo i Papelonia ka tele ki olotou fenua, kae ka salalau valevale pela me ne tia kola ko fakatau tele keatea mai i tino afuli manu, pela me ne mamoe ko seai se takitaki o latou.

¹⁵So se tino e maua atu, e suki ke mate.

¹⁶Ka kilokilo atu eiloa latou ki olotou pepe e 'ta ke mate, mo olotou koloa i olotou fale e fao mālo, mo olotou avaga e puke mālo, kae e seai eiloa se lotou mea e mafai o fai.”

¹⁷Muna a te Aliki, “Ko fakaoso nei ne au a tino Metai[22] ke olo o taua atu ki Papelonia. E se fia saga ki siliva pela foki ki aulo.

¹⁸Ka 'ta ne latou a tamataene ki olotou kausana mo matasana. Ka seai eiloa se alofa o latou ki pepe, pela foki tamaliki foliki.

¹⁹ A Papelonia ko te toe malo gali eiloa; a tino Papelonia e fakamatamata i te lotou malo, ka ko au, te Aliki, ka fakamasei ne au Papelonia e pela mo te mea ne fai ne au ki a Sotoma mo Komolo!

²⁰E se toe ai eiloa ne tino e toe nofo i te koga tena. E se toe ai se Alapi maumausolo e toe fakatu tena faleie i te koga tena, se toe ai foki se tausi mamoe e toe ave ana mamoe o fagai i te koga tena.

²¹ Ka fai mo koga e nofo ei a manu o te toafa kae fai ofaga foki i ei a manu eva ko lulu. A manu ko ositelite ka nofo i kona, mo kouti ka teletele sale i koga ne maofa i kona.

²²A taoa mo palesi i kona ka lagona sale i ei te leo tuafoki o manu ko haiena mo tiakolo. A te taimi o Papelonia ko oko mai! A ona aso ko pili nei o palele atu.”