Read Te Tusi Tapu I Te Gana Tuvalu Lomiga Lua ISAIA 14 Bible Online

ISAIA 14 - Te Tusi Tapu I Te Gana Tuvalu Lomiga Lua bible

ISAIA 14

¹A te Aliki ka toe alofa ki tena fenua ko Isalaelu, kae toe filifili ne ia ke fai mo ona tino tonu. Ka toetuku atu ne ia latou ke nofo i te lotou fenua, kae ka o'mai foki a tino o fenua fakaatea o nofo tasi mo latou i kona.

²E uke a malo ka fesoasoani ki tino Isalaelu o toe fakafoki atu ki te fenua tela ne aumai ne te Aliki mō latou, kae i kona ka fakagalue ne tino Isalaelu a tino o malo fakaatea o fai mo pologa a latou. A malo kola ne fakatakavale ne latou a Isalaelu, ka fakatakavale nei ne Isalaelu, kae ka pule nei ne Isalaelu a malo kola ne pule fakasaua mua ki a latou.

³Ka fakafilemu ne te Aliki a tino Isalaelu mai i puapuaga kola ne mae fi'ta ei latou, pela foki mai i galuega 'mafa kola ne fakagalue malo ei latou ne nisi malo.

⁴Kafai ko oti ne fakatoka ne ia te feitu tena, e tau la ei mo tino Isalaelu o fakalili te tupu o Papelonia penei: “A te tupu masei ko takavale! Ka se toe fakasaua eiloa ne ia se tino!

⁵Ko oti ne fakagata ne te Aliki a te malosi o takitaki amio masei

⁶kola ne fakapuapuaga ne latou a tino i olotou kaitaua, kae fakasaua faeloa ne latou a malo kola ne fakatakavale ne latou.

⁷Nei, ko fatoa filemu te lalolagi katoa, mo tino katoa foki ko usu pese mo te fiafia.

⁸A lakau ko pelosi mo alasi o Lepanona ko oko eiloa i te fiafia i te takavalega o te tupu, me ko seai nei se tino e toe vau o kati latou ki lalo!

⁹“A te lalolagi o tino mate ko toka nei o talia ne ia a te tupu o Papelonia. A agaga o tino kola ne takutakua i te lalolagi ko gasuesue valevale. A agaga o tupu ko tu ake mai i olotou nofogaaliki.

¹⁰Ne ka'laga atu katoa ki a ia penei, ‘A koe nei ko pau fua mo matou i te vaivai! A koe ko penei mo matou!

¹¹Ne masani koe o fakaaloalogina ki te leo o kitala, kae nei a koe ko i lalo i te lalolagi o tino mate. A koe ko takato i luga i anufe, kae fonu tou foitino i ilo.’ ”

¹² Te tupu o Papelonia, te fetu ao maina, a koe ko oti ne to mai i te lagi! I taimi ko teka, ne fakatakavale sale ne koe a malo, kae nei a koe ko palele ne pei ifo ki lalo i te laukele.

¹³ A koe ne taumafai o kake ki te lagi o tuku tou nofogaaliki mai i luga atu o te fetu tafasili i te maluga. Ne mafaufau koe ke sagasaga koe pela me se tupu i luga i te mauga tena i matu, te koga e maopoopo ei a atua.

¹⁴Ne fai ake koe pela i a koe ka kake aka ki taulu o kaumana ke fai koe pela mo te Atua Malosi.

¹⁵Kae tela la, a koe ne iku mai fua ki lalo i te toe koga poko eiloa i te lalolagi o tino mate.

¹⁶“A tino mate ka pula 'toka atu ki a koe mo olotou gutu e faka'maga. Ka fesili ake latou penei, ‘Tena te tagata tela ne kosu ne ia te lalolagi kae fai a malo ke polepole?

¹⁷Tena te tagata tela ne ta fakamasei ne ia a fa'kai kae fuli te lalolagi ke fai mo toafa? Tena te tagata tela e se mafai o fakasaoloto ne ia ana pagota, io me tuku atu ke foki ki olotou fale? ’ ”

¹⁸A tupu katoa o te lalolagi e takato i olotou tanuga gali,

¹⁹ka ko koe e seai sou tanuga, a tou foitino mate e pei fua ki tua ke pala. Ka taotaomaki tou foitino ne foitino o sotia kola ne mate i te taua, kae ka pei fakatasi tou foitino mo foitino o sotia kona ki te lua fatufatua, kae lakalakagina.

²⁰Ona ne fakamasei ne koe tou fenua kae 'ta foki eiloa ne koe a tino o tou fenua, tela la, ka se tanu koe pela mo nisi tupu. E seai eiloa se tino i tou kaiga amio masei e ola mai.

²¹Na kamata o ta a tino! A tama tagata a te tupu tenei ka mate ona ko agasala a olotou tupuga. Ka seai eiloa se tino o latou e toe pule ne ia te lalolagi, io me faite ne fa'kai i ei.”

²²Muna a te Aliki Malosi penei, “Ka taua atu au ki Papelonia kae ka ofa fakamasei ne au. E seai eiloa se mea e fakasao ne au — seai ne tamaliki, seai eiloa ne tino e fakaola ne au. Ko au, te Aliki, tena ne faipati atu.

²³Ka fuli ne au Papelonia ke pela me se laukele ko sua faeloa ne te vai, kae ka nofo i kona a manu ko lulu. Ka salu ne au Papelonia ki te salu, tela e ave keatea i ei a mea katoa. Ko au, te Aliki Malosi, tena ne faipati atu.”

²⁴ A te Aliki Malosi ko oti ne fai tena tautoga penei: “A te mea ne fuafua ne au e taunu eiloa. A te mea ne mafaufau au o fai, e fai eiloa.

²⁵Ka ta ne au a tino Asulia i luga i toku fenua ko Isalaelu, kae lakalaka latou i luga i oku mauga. Ka fakasao ne au toku fenua mai i te amoga mafa a Asulia, pela foki mai galuega 'mafa kola e fai ne latou.

²⁶Tena taku fuafuaga mō te lalolagi, ka ko toku lima ko fakaoko atu o fakasala a malo.”

²⁷A te Aliki Malosi ko toka eiloa o fai te mea tena; ko oti ne fakaoko atu tena lima o fakasala, kae e seai eiloa se tino e mafai o taofi ne ia.

²⁸ Tenei te fekau tela ne folafola i te tausaga ne mate i ei te Tupu ko Aasa.

²⁹ Tino Filisitia, a te amo tela ne kini sale ki ei koutou ko fati, kae e se tau mo koutou o fiafia. Kafai ko mate se gata, kae sui mai ne se gata tafasili atu i te masei. A te fua o te gata kafai e mafā, kae to mai i ei se talako fai kapakau.

³⁰A te Aliki ka fai mo tausi mamoe ki tino mativa o tena fenua, kae ka tuku ne ia ke ola mo te saogalemu. Ka ko koutou tino Filisitia, ka aumai ne ia se oge fakamataku ki a koutou, kae ka seai eiloa se tino o koutou e sao mai i ei.

³¹Koutou fa'kai katoa o Filisitia, tagi kae kalaga mo se fesoasoani! A koutou katoa ke mataku! A te kaumana pefu e vau mai i matu — se kautau e seai eiloa ne tino mata mataku i ei.

³²Se a te tali ka fai atu ne matou ki avefekau kola e o'mai ki a matou mai i Filisitia? Ka fai matou ki ei i te Aliki ko oti ne atiake ne ia a Siona, ka ko ana tino kola ne fakapuapuagagina ka maua ne latou se filemu i kona.