Read Te Tusi Tapu I Te Gana Tuvalu Lomiga Lua ISAIA 16 Bible Online

ISAIA 16 - Te Tusi Tapu I Te Gana Tuvalu Lomiga Lua bible

ISAIA 16

¹A tino Moapi mai i te fa'kai ko Sela i te vao, ne aumai ne latou se tamā mamoe ke fai mo meaalofa ki te pule o Ielusalema.

²E nofo fakatalitali latou i kaugutu o te Vaitafe ko Alinona, kae olo sale fua seai se koga tonu e fakamoemoe o olo ki ei, e pela me ne manu eva kola ne afuli keatea mai i olotou ofaga.

³Ne fai atu latou ki tino Iuta penei, “Fakasino mai te mea e 'tau o fai ne matou. Puipui mai matou, e pela koe mo te lakau tela e fakaoso atu tena malūga moko i te vela o te tutonu, ko matou ke ma'nava i lalo o tou malūga. A matou ne tino ko sola mai i te motou fenua; fakamuni aka matou i se koga tela e se mafai o maua ei matou ne se tino.

⁴Talia mai ke nofo matou i tou fenua. Puipui mai matou mai i tino kola e manako o 'ta matou.” A te fakasauaga mo te fakamaseiga ka gata mai, mo latou kola e taua mai ki te fenua ka galo atu katoa.

⁵Tena la, kae ka tu mai se tino mai i te gafa o Tavita o fai mo tupu, kae ka takitaki ne ia te fenua i te fakamaoni mo te alofa. Ka vave a ia o fai te mea tonu, kae onoono foki ke fakatumau te faiga o te mea tonu.

⁶Muna a tino Iuta, “Ko oti ne lagona ne matou te fakamatamata o tino Moapi. E iloa ne matou me ne tino fiasili kae valea, ka ko muna fakamatamata a latou e seai se aoga.”

⁷A tino Moapi ka tagi ona ko fakalavelave kona e puapuaga ei latou. Ka tagi katoa eiloa latou manafai ko masaua ne latou a meakai gali kola ne 'kai sale ei latou i te fa'kai o Kila Helesi. Ka iku eiloa latou ki te fanoanoa lasi.

⁸A fatoaga i tafa o Hesepono mo togavine o Sipima ko oti ne ofa fakamasei, ko togavine kona e maua mai i ei te uaina tela e inu sale i ei a takitaki o malo ke ko'na. I taimi mua, a vine kona e oko atu eiloa ki te fa'kai o Iasela, kae oko atu foki ki te toafa i te saegala, kae oko atu foki eiloa ki te sua feitu o te Tai Mate i te togala.

⁹Au nei ko tagi ona ko togavine a Sipima, e pela eiloa mo toku tagi ki te fa'kai o Iasela. Ko maligi oku loimata mō tino Hesepono mo Eleale, me ko seai se taukai e fakafiafia ei a tino.

¹⁰Ko seai nei se tino e fiafia i fatoaga ola. Ko seai nei se tino e kalaga io me usu pese i togavine. Ko seai ne tino e galue ki vine mo fai a uaina; a te leo o te fiafia ko gata mai.[24]

¹¹Au ko fanoanoa ona ko Moapi, pela foki Kila Helesi.

¹²A tino Moapi ko fakafi'ta fua o olo ki olotou fale tapuaki i luga i mauga, pela foki ki olotou faletapu o talo, kae e seai eiloa se lei o latou e maua mai i ei.

¹³Tena te fekau ne aumai mua ne te Aliki e uiga ki a Moapi.

¹⁴Kae nei, muna a te Aliki, “E toe tolu tausaga kae galo te koloa lasi eiloa o Moapi. A te tokoukega o ona tino ka galo, e mutana fua ka sao mai, kae ka vaivai foki.”