Read Te Tusi Tapu I Te Gana Tuvalu Lomiga Lua ISAIA 19 Bible Online

ISAIA 19 - Te Tusi Tapu I Te Gana Tuvalu Lomiga Lua bible

ISAIA 19

¹ Tenei te fekau e uiga ki a Aikupito. A te Aliki ka vau ki Aikupito, e sopo mai i luga i te kaumana. A tupua o Aikupito e polepole i ona mua, mo tino Aikupito foki ko oko eiloa i te mataku i ona mua.

²Muna a te Aliki, “Ka fai ne au te malo o Aikupito ke fakatau taua i a latou eiloa, ko taina ki taina, pela foki tuakoi ki tuakoi. A fa'kai kola e fai fili ka taua, pena foki a tupu kola e fai fili ka fakatau taua.

³Ka fakaseaoga ne au a fuafuaga a tino Aikupito, kae ofa foki ne au te tulaga lei mo te loto toa o tena kautau. Ka kalaga latou ki olotou tupua ke fesoasoani atu ki a latou; e olo foki ki tino fakatu agaga o fesili ki agaga o tino mate ki se fesoasoani.

⁴Ka tuku atu ne au Aikupito ke pule ne se tupu saua. Ko au, te Aliki Malosi, tena ne faipati atu.”

⁵A te vai i te Naila ka matuku ifo ki lalo, ko te mea eiloa ko masa pakupaku.

⁶Ka manogi masei a magā vai o te vaitafe i te taimi tela ka fanaifo ei o masa pakupaku. A mouku mo lakau i te vaitafe ka mage,

⁷mo lakau kaina katoa kola e toki i tafatafa o te Naila ka pakupaku, kae agina keatea.

⁸A tino katoa kola e ola i te Fai-ika i te Naila ka tagi; a olotou kafilo mo tili ka se aoga.

⁹A tino kola e faite laugatu lino ka fanoanoa;

¹⁰a tino fai mea laga mo tagata apo i galuega ka mafatia kae fanoanoa.

¹¹A takitaki o te fa'kai ko Soani ne tino valea fua! A manatu fesoasoani kola e fai mai ne tino poto eiloa o Aikupito ne manatu valea! E pefea eiloa o fai atu latou ki te tupu i a latou ko sui o tino poto mo tupu taumua?

¹²Te tupu o Aikupito, ko fea au tino fakatonutonu poto? E se taumate kaati e mafai ne latou o fakaasi atu a fuafuaga a te Aliki Malosi e uiga mo Aikupito.

¹³A takitaki o Soani mo Mefisi ne tino valea fua. Ne tau o takitaki faka'lei ne latou a te malo, kae tela la, ne taki 'se fua ne latou.

¹⁴Ko te Aliki ne fai ne ia ke tuku atu ne latou a manatu fesoasoani kola e numi valevale. Tela la, a mea katoa e fai ne Aikupito e 'se katoa, kae ko takasese atu foki eiloa a ia e pela me se tino kona tela e 'mole atu i luga i ona luaga.

¹⁵E seai eiloa se tino i Aikupito e mafai o fesoasoani atu ki ei, me se tino maumea io me se tino mativa, me se tino takutakua io me se tino se takutakua.

¹⁶I se aso mai mua nei, a tino o Aikupito ka mata mataku pela me ne fafine. Ka polepole latou i te mataku manafai ko lavea ne latou a te Aliki Malosi ko fola mai tena lima o fakasala latou.

¹⁷A tino Aikupito ka mataku faeloa i a Iuta i taimi katoa e fakamasaua atu ei ki a latou a te ikuga tela ko oti ne fakatoka ne te Aliki Malosi mō latou.

¹⁸Kafai e oko mai te taimi tena, a fa'kai e lima o Aikupito ka faipati ki te gana Epelu. A tino i kona ka fai olotou tautoga i te igoa o te Aliki Malosi. E tasi te fa'kai o fa'kai kona ka fakaigoa ko te “Fa'kai o te La.”

¹⁹Kafai e oko mai te aso tena, ka isi se fata-fai-taulaga mō te Aliki i te fenua o Aikupito, mo te pou fatu tela ne fakatapu ki a ia i te tuakoi o Aikupito.

²⁰A mea kona ka fai mo fakailoga i te Aliki Malosi e nofo i Aikupito. Kafai ko fakasauagina a tino i kona, kae e kalaga ki te Aliki ke fesoasoani atu, ko uga mai ei ne te Aliki se tino ke vau o fakasao latou.

²¹A te Aliki ka fakasae atu ki tino Aikupito, tena la, ka talia ne latou a Ia kae tapuaki atu ki a Ia, kae aumai foki olotou taulaga ki a ia. Ka fai olotou tautoga malu ki a ia, kae fai foki ne latou a mea kola ne tauto latou o fai.

²²A te Aliki ka fakasala ne Ia a tino Aikupito, ka oti ko toe fakasao foki ei ne ia latou. Ka fuli mai latou ki a Ia, kae ka lagona ne Ia olotou talo, ko fakasao ei ne Ia latou.

²³Kafai e oko mai te taimi tena, ka isi se auala lasi mai i Aikupito ki Asulia. A tino o fenua kona e lua ka olo sale i te auala tena, kae ka tapuaki fakatasi a malo kona e lua.

²⁴Kafai e oko mai te taimi tena, a Isalaelu ka tulaga fakatasi mo Aikupito mo Asulia, kae ka fai a malo kona e tolu mo fakamanuiaga ki te lalolagi katoa.

²⁵A te Aliki Malosi ka fakamanuia ne ia latou, kae fai atu penei, “Aikupito, toku fenua, ka fakamanuia ne au a koe, pena foki koe e Asulia tela ne faite ne au, mo koe e Isalaelu, toku fenua filifilia.”