Read Te Tusi Tapu I Te Gana Tuvalu Lomiga Lua ISAIA 2 Bible Online

ISAIA 2 - Te Tusi Tapu I Te Gana Tuvalu Lomiga Lua bible

ISAIA 2

¹Tenei te fekau tela ne aumai ne te Atua ki a Isaia, te tama tagata a Amota, e uiga ki Iuta mo Ielusalema:

²I aso mai mua nei, A te mauga tela e tu ei te Faletapu ka maluga atu i mauga katoa. E uke a malo ka o'mai ki ei,

³Ka ko olotou tino ka fai ake penei, “Tatou ka olo ake ki te mauga o te Aliki,[4] Ki te Faletapu o te Atua o Isalaelu. Ka akoako mai ne ia tatou ki mea e manako a ia ke fai ne tatou; Ka sasale tatou i auala me ne filifili ne Ia. Me i te akoakoga a te Aliki e vau mai i Ielusalema; E faipati a ia ki tena fenua mai i Siona.”

⁴ Ka fakatoka ne ia a kinauga i va o malo lasi. Ka tuki ne latou olotou pelu ke fai mo mea fakamalū laukele Ka ko olotou tao ke fai mo naifi vele vao. Ka se toe taua eiloa a malo, Se toe fakatoka eiloa mō se taua.

⁵Te gafa o Iakopo, o'mai nei ke sasale tatou i te mainaga tela ne aumai ne te Aliki ki a tatou!

⁶Te Atua, koe ko se saga ki tou fenua, te gafa o Iakopo! A te fenua ko fonu i tino fakataulaitu mai i te saegala, pela foki mai i Filisitia. A tino ko tautali i tu mo aganu a fenua fakaatea.

⁷A olotou fenua e fonu i siliva mo aulo, e seai se gatamaiga o olotou koloa. E uke a solofanua a latou, e pena foki olotou kaliota.

⁸E uke atua faite i olotou fenua, kae tapuaki ki mea ne faite ne latou ki olotou lima.

⁹A tino katoa ka ta kae fakamasiasi. Te Aliki, sa fakamagalogina latou!

¹⁰ Ka muni latou i ana i kaupapa maluga, io me keli a lua i te laukele o muni i ei ke sao latou mai i te kaitaua o te Aliki, kae ke muni foki mai i tena malosi mo tena malu!

¹¹E oko mai te aso ka fakagata ei te fakamatamata o tino, pela foki te uiga fiasili o latou. Tena la, ko te Aliki fua tokotasi ka manumalo.

¹²I te aso tena, ka fakaseaoga ne te Aliki Malosi a tino takutakua katoa, tino fakamatamata mo tino fiasili.

¹³Ka fakamasei ne ia a alasi maluga o Lepanona pela foki a lakau ko oka i te fenua o Pasana.

¹⁴Ka fakalaugatasi ne ia a mauga maluga mo koga malugaluga,

¹⁵pela foki a taoa maluga katoa mo pui o fa'kai malosi katoa.

¹⁶Ka fakaapulu foki ne ia a vakamutu ke oko eiloa ki vakamutu lasi eiloa kae gali.

¹⁷Ka gata te fakamatamata o tino, pela foki olotou uiga fiasili. Ka se toe ai ne tupua e lavea atu, ka ko te Aliki fua tokotasi ka manumalo i te aso tena.

¹⁹A tino ka olo o muni i ana i kaupapa maluga, io me keli a lua o muni i ei ke sao latou mai i te kaitaua o te Aliki, kae ke muni foki mai i a ia, i te taimi e vau ei a ia o luelue te lalolagi.

²⁰Kafai e oko mai te aso tena, ka 'pei keatea olotou tupua aulo mo tupua siliva kola ne faite, kae tiakina atu ki manu ko mole mo pate.

²¹Kafai ko vau te Aliki o luelue te lalolagi, ka ko tino ka olo o muni i pūga mo ana i kaupapa maluga ke sao latou mai i te kaitaua o te Aliki, kae ke muni foki latou mai i tena mana mo tena malu.

²²Sa toe talitonu ki tagata ola. Se a te aoga o latou?