Read Te Tusi Tapu I Te Gana Tuvalu Lomiga Lua ISAIA 22 Bible Online

ISAIA 22 - Te Tusi Tapu I Te Gana Tuvalu Lomiga Lua bible

ISAIA 22

¹Tenei te fekau e uiga ki te Vanu o Fakaasiga. Se a nei te mea e tupu? Ai a e fai ei a fakafiafiaga a tino o te fa'kai i tuafale o fale?

²A te fa'kai katoa ko oko eiloa i te ua'te, ko fonu i te leo o te fiafia. A tau kau konei ne mate, e seki mate i taua.

³A ou takitaki katoa ne tele kae ne puke fakapagota, seki ai eiloa se matasana kai sana ne latou.

⁴Tuku mai nei au ke tagi fanoanoa tokotasi ona ko tino o toku fenua kola ne mate. Sa taumafai o fakamafanafana mai au.

⁵A te taimi nei, se taimi o te mataku valevale, te takavale, mo te numi valevale i te Vanu o Fakaasiga; ko te Aliki Tafasili i te Malosi ne aumai ne ia a fakalavelave kona ki a matou. A pui o te motou fa'kai ko oti ne ofa ki lalo, mo leo o tino e tagi mo se fesoasoani e lagona atu i mauga.

⁶A sotia mai i te fenua o Elama e o'mai i luga i solofanua, mo olotou kausana mo matasana. A sotia mai i te fenua o Kila ko toka olotou talita.

⁷A vanu o Iuta, kola e ola te laukele i ei, ko fonu i kaliota; a sotia i solofanua e tu i mua o mataloa o Ielusalema.

⁸A mea kola e puipui ei a Iuta ko se aoga katoa. Kafai e tupu te mea tena, ko aumai ei ne koutou a meatau mai i loto i te koga e teu i ei.

⁹Ne maua ne koutou a koga i pui o Ielusalema kola e tau o toe fakafou. Ne onoono faka'lei koutou ki fale katoa i Ielusalema, kae ne ofa ne koutou a nisi fale ki lalo ke maua i ei te fatu ke fakaaoga mo te toe fakafouga o pui o te fa'kai.

¹¹Ne faite ne koutou se mea i loto i te fa'kai mo tali ei te vai tela e 'tafe mai i te vai mua. Kae e se saga lele eiloa koutou ki te Atua tela ne fuafua ne ia a te mea tena i aso mua, kae ko ia foki ne fai ne ia ke taunu.

¹²A te Aliki Tafasili i te Malosi ne kalaga atu ki a koutou i te taimi tena ke tagi fanoanoa koutou, ke vele otou ulu kae pei ki gatu masaesae.

¹³ Kae tela la, a koutou ne 'kata kae fai otou fiafiaga. Ne 'ta otou mamoe mo pulumakau ke kai ma koutou, kae inu uaina foki koutou. Otou muna penei, “Ko lei ke na kai kae inu tatou! Taeao ko mate ei tatou.”

¹⁴A te Aliki Tafasili i te Malosi ne faipati mai ki a au, ana muna, “E se mafai eiloa o fakamagalo ne au a te amioga masei a latou tena ne fai, i aso e ola ei latou. Ko au, te Aliki Tafasili i te Malosi, tena ne faipati atu.”

¹⁵A te Aliki Tafasili i te Malosi ne fai mai ki a au ke fano au ki a Sepina, te menetia o te palesi o te tupu, o fai atu ki a ia penei,

¹⁶“Ko oi koe? Ne aumai i fea tou saolotoga ke fano koe o faite tou tugamau i te feitu pa'papa o te mauga foliki tena?

¹⁷E tonu, koe se tagata maluga, ka ko te Aliki ka puke ne ia koe o ave o pei keatea.

¹⁸Ka puke aka ne ia koe pela me se pōlo, kae pei atu koe ki se fenua tai lasi atu. Ka mate atu koe i kona, i tafa o kaliota kola ne fakamatamata sale koe i ei. E fakamasiasi ne koe a te kaiga o tou matai.

¹⁹A te Aliki ka ave keatea ne ia a koe mai i tau galuega, kae tuku ifo koe ki lalo mai i tou tulaga maluga.”

²⁰Muna a te Aliki ki a Sepina, “Kafai ko tupu te mea tena, ko uga ei taku fekau ki a Eliakimo, te tama tagata a Hilikia ke vau.

²¹Ka fakapei atu ne au ki a ia a tou gatu loa mo tou fusi, ko gatu o te galuega kola ne nofo mo koe, kae avatu ki a ia a te pule katoa tela ne i a koe muamua. Ka fai a ia mo tamana ki tino Ielusalema mo tino Iuta.

²² Ka avatu ne au ki a ia a te pule katoatoa mai i lalo o te tupu, te tino mai i te gafa o Tavita. Ka nofo mo ia a ki o te ofisa; so se mea e tala ne ia, e seai se tino e mafai o pono ne ia, so se mea e pono ne ia, seai se tino e mafai o tala ne ia.

²³Ka fakamautakitaki ne au a ia i tena tulaga pela me se fao, kae ka fai a ia mo auala e fakaaloalogina ei tena kaiga katoa.

²⁴“Ka ko ana kaiga katoa, mo tino kola e faka lagolago ki a ia, ka fai mo amoga mafa ki a ia. Ka fakalagolago katoa latou ki a ia, e pela mo ulo mo pōla kola e tautau i se fao!

²⁵Kafai e tupu te mea tena, a te fao tela ne fakamau faka'lei ka matagataga, ko te mea eiloa ko to. Tena foki eiloa te ikuga o mea katoa kola e tautau i ei.” Ko te Aliki tena ne faipati atu.