Read Te Tusi Tapu I Te Gana Tuvalu Lomiga Lua ISAIA 23 Bible Online

ISAIA 23 - Te Tusi Tapu I Te Gana Tuvalu Lomiga Lua bible

ISAIA 23

¹ Tenei te fekau e uiga ki a Tulo. Tagi mo te fanoanoa, koutou kauvaka o vaka i te vasa! A te taulaga ma'sani o koutou ko Tulo ko oti ne ofa fakamasei; a fale i ei, mo tena taulaga, ko ma'sei valevale. Ne logo koutou i te tala tena, i te taimi ne foki mai ei otou vakamutu mai i Kupelu.

²Tagi, koutou tino fai mea togi o Saitonu! E uga ne koutou a tagata

³ke olo atu i vakamutu o togi mai a saito kola e ola i Aikupito, kae toe togi atu ki nisi tino, kae o fai pisinisi foki mo malo katoa.

⁴Te fa'kai o Saitonu, a koe ko fakamasiasigina! A te tai mo koga poko o te moana ko se manako ki a koe, kae fai mai penei, “E seki ai eiloa ne aku tamaliki. E seki puti ake eiloa ne au ne tamaliki tagata io me ne tamaliki fafine.”

⁵Ke oko foki eiloa ki a Aikupito ka poi kae ofo manafai ko iloa ne ia i a Tulo ko oti ne ofa fakamasei.

⁶Tagi mo te fanoanoa, koutou tino o Foinikia! Taumafai o tele ki Sepania ke sao koutou!

⁷E tonu eiloa me tena te fa'kai gali o Tulo, tela ne fakavae i aso mua eiloa? Tena te fa'kai tela e isi ne tino ne malaga mai i ei, o fakavae a kolone i nisi fenua?

⁸Ko oi tenei ne mafaufau o fakaoko mai a mea katoa kona ki luga i a Tulo, te fa'kai takutakua, mo ana pelenise kola ne tino fai mea togi kae ko toe tino takutakua eiloa i te lalolagi?

⁹Ko te Aliki Malosi ne fai ne ia a mea kona. Ne fai ne ia a mea kona, ko te mea ke fakagata ei te fakamatamata o latou i olotou mea ne fai, kae fakaseaoga foki te lotou tulaga maluga.

¹⁰Olo o toki te laukele, koutou tino i kolone o Sepania! Ko seai se tino ke puipui ne ia koutou.

¹¹A te Aliki ne fola mai tena lima i luga o te tai o fakatakavale a malo. Ko oti ne fai tena fakatonuga ke ofa fakamasei a koga e teu ei te maumea o Foinikia.

¹²Te fa'kai o Saitonu, a tou fiafia ko gata mai, a ou tino ko pule fakasauagina. E ui eiloa e tele latou ki Kupelu, kae e se mafai eiloa o sao i kona.

¹³Ko tino Papelonia, kae se ko tino Asulia, kola ne fai ne latou a Tulo ke fonu i manu vae fa o te vao. Ko tino Papelonia kola ne fakatu ne latou a taoa o fakatoka mō te pukega o Tulo, ko latou foki ne ofa ki lalo ne latou a pui o Tulo, kae tiakina te fa'kai me ko maofa valevale.

¹⁴Tagi mo te fanoanoa, koutou kauvaka i te moana! A te fa'kai ne faka'na koutou ki ei ko maofa valevale.

¹⁵E oko mai te taimi e se toe manatua ei ne tino a Tulo i tausaga e fitusefulu, ko tausaga o te olaga o se tupu. Kafai ko palele atu a tausaga kona, ka ko Tulo ka pela me se fafine tali tagata tela e taku i te pese penei:

¹⁶Puke tau kitala kae fano sale i loto i te fa'kai, Koe te fafine tali tagata tela ko se masaua ne tino! Toe tata tau kitala kae usu au pese ke toe fakafoki mai ei A tagata ki a koe.

¹⁷Kafai ko oti atu te fitusefulu tausaga tena, kae ka toetuku atu ne te Aliki a Tulo ke toe foki ki tena tulaga mua. Ka toe tāua foki tena igoa i malo o te lalolagi.

¹⁸A te tupe e maua ne ia i te togi atuga o ana mea ka fakatapu ki te Aliki. E se teu ne ia i se koga fakaatea, ka ko tino kola e tapuaki ki te Aliki ka fakaaoga ne latou ana tupe o togi ki ei a meakai mo gatu e manako latou ki ei.