Read Te Tusi Tapu I Te Gana Tuvalu Lomiga Lua ISAIA 25 Bible Online

ISAIA 25 - Te Tusi Tapu I Te Gana Tuvalu Lomiga Lua bible

ISAIA 25

¹Te Aliki, a koe ko toku Atua; Ka fakaaloalo koe ne au kae tavae ne au tou igoa. Ko oti ne fai ne koe a mea fakaofoofogina; Ne fakataunu eiloa ne koe mo te fakamaoni a fuafuaga kola ne fai ne koe i aso mua.

²Ko oti ne ofa valevale ne koe a fa'kai, Pela foki a mea kola e puipui ki ei latou mai i te fili. A palesi kola ne faite ne omotou fili ko galo atu eiloa.

³A tino o malo malosi eiloa ka tavae ne latou a koe; A tino i fa'kai o malo fakasaua ka mataku i a koe.

⁴A tino mativa mo tino fakaalofa ne tele atu ki a koe Kae ne saogalemu i taimi o fakalavelave. E fakamalu ne koe latou mai afā, Pela foki mai i te vela o te ao. A te fili kaitaua e taua atu pela me se afā i te tau moko,[29]

⁵Pela me se oge vai i se fenua seai ne vai i ei. Ka ko koe te Aliki, ne fakafilemu ne koe omotou fili; Ne fakagata ne koe te paka'laga o tagata amio masei, Pela me se kaumana tela e fakamoko ne ia te vela o te aso.

⁶Ka fakatoka ne te Aliki Malosi se kaiga i konei, i luga i te Mauga o Siona, mo malo katoa o te lalolagi — se kaiga o meakai tafasili i te gali mo uaina tafasili foki i te gali.

⁷I konei, ka ave keatea ei ne Ia a te kaumana o te fanoanoa tela ne pulou i luga i malo katoa o te lalolagi.

⁸ A te Aliki Sili ka fakagata ne ia te mate ke se toe ai eiloa! Ka solo ne ia a loimata mai i mata o tino katoa, kae ave keatea te masiasi tela ne fakapuapuaga ei ona tino i te lalolagi katoa. Ko te Aliki eiloa tena ne faipati!

⁹Kafai ko tupu te mea tena, kae ka fai aka a tino katoa penei, “A ia ko te motou Atua! Ne talitonu matou ki a ia, kae ne fakaola eiloa ne ia matou. A ia ko te Aliki! Ne talitonu matou ki a ia, kae nei ko fiafia kae lifu matou me ne fakasao ne ia matou.”

¹⁰ A te Aliki ka puipui ne ia a te Mauga o Siona, ka ko tino o Moapi ka lakalakagina ki lalo, e pela mo kausaito kola e lakalakagina fakatasi mo kaiao i te laukele.

¹¹Ka fola mai olotou lima e pela me e taumafai o 'kau, ka ko te Atua ka fakaseaoga ne ia latou, tena la, ka toe galo ifo eiloa olotou lima ki lalo, seai se lotou mea e mafai o fai.

¹²Ka ofa fakapalele ne ia a fa'kai malosi o Moapi, mo olotou pui maluga ka futi ifo ke siga valevale ki lalo i te pefu.