Read Te Tusi Tapu I Te Gana Tuvalu Lomiga Lua ISAIA 26 Bible Online

ISAIA 26 - Te Tusi Tapu I Te Gana Tuvalu Lomiga Lua bible

ISAIA 26

¹I se aso mai mua nei kae ka usu ne tino a te pese tenei i te fenua o Iuta: A te motou fa'kai e malosi! Ko te Atua eiloa e puipui ne ia ona olo!

²Tala mataloa o te fa'kai Kae tuku mai te malo fakamaoni ke ulu mai, Ko te malo tela e amiotonu a tino i ei.

³Te Aliki, ko koe e avatu ne koe te tina filemu ki a latou Kola e tausi mau ki olotou fakamoemoega, kae fakatuaga ki a koe.

⁴Fakatuaga ki te Aliki ki te se gata mai; E puipui faeloa ne ia tatou.

⁵Ne fakaseaoga ne ia a tino fakamatamata; Ne ofa ne ia a te fa'kai malosi tela e nofo i ei latou, Kae ofa ne ia ona pui ke siga ki lalo i te pefu.

⁶A tino kola ne pule fakasauagina ko sasale i luga i koga maofa kona, Kae lakalaka ki olotou vae.

⁷Te Aliki, e fakatoka ne koe te auala ke gali mō tagata amio lei; A te auala e olo ei latou e laugatasi lei.

⁸A matou e tautali i te mea e loto koe ki ei kae fakamoemoe ki a koe; Ko koe e manako matou ki ei.

⁹I te po, au e manako faeloa ki a koe mo toku loto katoa; Kafai ko fakamasino ne koe te lalolagi mo tino i ei, Kae ka iloa ei ne latou a te mea tonu.

¹⁰E ui eiloa e aga'lei koe ki tino amio masei, Kae e se mafai o fai ne latou te mea tonu. Ke oko foki eiloa ki te fenua tenei o tino amiotonu, E fai foki ne latou amioga se tonu; E se talia ne latou tou takutakua.

¹¹ A ou fili e se iloa ne latou me ka fakasala ne koe latou. Te Aliki, fakamasiasi kae fakapuapuaga atu latou. Fakapuapuaga atu latou ki te fakasalaga tela ko oti ne fakatoka ne koe mō latou. Fakaasi atu ki a latou te lasi o tou alofa mō tou fenua.

¹²Te Aliki, ka aumai ne koe ki a matou te maumea; Mo mea katoa kola ne mafai ne matou o fai, Ne pogai i mea ne fai ne koe.[30]

¹³Te Aliki te motou Atua, a matou ne pule ne nisi malo, Kae ko koe fua tokotasi ko te motou Aliki.

¹⁴A tino kona ko mate atu nei, kae ka se toe ola mai; A olotou agaga ka se toetu ake, Me ko oti ne fakasala kae ta fakapalele ne koe latou. Seai se tino e toe manatua ne ia latou.

¹⁵Te Aliki, ne fai ne koe te motou malo ke gasolo o lasi, Ne fakalasi ne koe a te kogā fenua i ona feitu katoa, Ona ko te mea tena, ko ala ei o maua ne koe se tulaga fakaaloalogina.

¹⁶Te Aliki, ne fakasala ne koe ou tino, kae ne toe fuli atu mo olotou loto mafatia o talo atu ki a koe.

¹⁷Te Aliki, ne fai ne koe matou ke tagi, Pela me se fafine kafai o fanau tela e tagi ona ko te mae.

¹⁸A matou ne mae kae fita, Kae e seai se mea ne fanau mai ne matou. E seki ai se manumalo ne maua ne matou mō te motou fenua; E seai eiloa se mea aoga kai maua ne matou.

¹⁹A tino o te tou fenua kola ne mate, ka toe ola mai! A olotou foitino ka toe ola mai. A tino katoa kola e moe i olotou tanuga ka ala aka ki luga kae usu pese mo te fiafia. E pela mo te sau tela e aumai ne ia te ola fou ki te lalolagi, E pena foki a tino kola ko leva ne mate, me ka toe fakaola ne te Aliki.

²⁰Toku fenua, olo ki loto i otou fale kae pono mai otou mataloa. Muni ke tai leva malie ke oko ki te taimi e gata ei te kaitaua o te Atua.

²¹A te Aliki ko vau mai i te lagi o fakasala a tino o te lalolagi ona ko olotou agasala. A tino kola ne tamate kae e se iloa i te lalolagi, ka fakaasi katoa ke iloa, mo te laukele foki ka se mafai o fakamuni ne ia a tino kola ne tamate.