Read Te Tusi Tapu I Te Gana Tuvalu Lomiga Lua ISAIA 27 Bible Online

ISAIA 27 - Te Tusi Tapu I Te Gana Tuvalu Lomiga Lua bible

ISAIA 27

¹ I te aso tena, ka fakaaoga ne te Aliki a tena pelu fakamataku o fakasala te talako e igoa ki a Leviatana, tela e masani o fitifiti sale kae fakagavalivali tena foitino pela me se gata. E tamate foki ne te Aliki ki te pelu tena a te manu fakamataku [31] tela e nofo i te tai.

²I te aso tena, ka faipati aka te Aliki e uiga ki tena togāvine gali,

³“Ne tausi fakalei ne au, kae fakasusu faeloa ne au. Ne leoleo fakalei ne au i po mo ao, ko te mea ke seai se tino e vau o fakamasei.

⁴Au nei ko se kaitaua ki te togavine. Moi ne isi ne vao makaikai mo lakau talatala ke fakasaga tau au ki ei, e penei e sunu fakapalele katoa ne au.

⁵Kafai a fili o toku fenua e manako ki taku puipuiga, ke o'mai la o fakatoka se va filemu mo au. Ao, tuku ke o'mai o fai te va o latou mo au ke filemu.”

⁶I aso mai mua nei, a tino Isalaelu tela ko te gafa o Iakopo, ka mau olotou aka pela me se lakau, kae ka ma'tala olotou pula kae kamata o ola. A te lalolagi ka fonu i fuagā lakau mai i ei.

⁷A Isalaelu e seki fakasala mafa eiloa ne te Aliki e pela mo ona fili, e seki tokouke foki eiloa ona tino ne mate e pela mo tino mate o malo kola e fai fili mo ia.

⁸A te Aliki ne fakasala ne ia tena fenua o tuku ke ave fakapagota ne nisi malo. Ne ave ne ia latou keatea i te matagi masei mai i te saegala.

⁹Ka ko te agasala a Isalaelu e magalo fua manafai ko oti ne nutipala a fatu o fata-fai-taulaga fapaupau ke pela mo ne matutuga o se penisina, kae ke seai foki ne fata-fai-taulaga e sunu ei mea manogi, seai foki ne fakatusa o te atua fafine ko Asaila e toe.

¹⁰A te fa'kai tela ne fakamalosigina faka'lei ko maofa valevale. Ko lavaki pela me se vao e seai ne tino i ei. Ko fai mo koga e kaikai kae takatokato ei a pulumakau.

¹¹A kaula o lakau ko mage kae fati ki lalo, kae e fakaputu ne fafine mo fai olotou fafie. Ona ko tino e seki malamalama eiloa i mea kona, tena la, a te Atua tela ne faite ne ia latou, ka se alofa eiloa ki a latou.

¹²I te aso tena, ka fakamaopoopo mai ne te Aliki a tino o tena fenua mai i te Eufilate ke oko ki tuakoi o Aikupito, e pela me se tino tela e folefole ne ia a pakili saito mai i te fuaga saito.

¹³Kafai e oko mai te aso tena, kae ka fakatagi te pu o kalaga ki tino Isalaelu kola ne ave fakapagota ki Asulia mo Aikupito, ke foki mai. Ka o'mai latou o tapuaki atu ki te Aliki i Ielusalema, i luga i tena mauga tapu.