Read Te Tusi Tapu I Te Gana Tuvalu Lomiga Lua ISAIA 29 Bible Online

ISAIA 29 - Te Tusi Tapu I Te Gana Tuvalu Lomiga Lua bible

ISAIA 29

¹A Ielusalema, te fata-fai-taulaga a te Atua ko malaia! A te fa'kai tela ne nofo i ei a Tavita ko malaia! Tuku atu e toe tasi me toe lua tausaga ke seke, fakatasi mo aso fakamanatu mo kaiga fiafia i ei,

²ka oti ko aumai ei ne te Atua a te malaia ki te fa'kai tela ne fakaigoa ko te “Fatafaitaulaga a te Atua.” A tino ka tagi fanoanoa, ka ko te fa'kai katoa ka pela me se fata-fai-taulaga tela e ufi kātoa ne te toto.

³A te Atua ka taua atu ki te fa'kai, nikoi ne ia kae fakatoka o puke.

⁴A Ielusalema ka pela me se agaga tela e taumafai ke faipati aka a ia mai i lalo i te laukele, pela me se leo foliki mai i lalo i te pefu.

⁵Ielusalema, a tino fakaatea katoa kola ne taumafai o ta koe ka agina keatea e pela me ne pefu, ka ko olotou kautau fakamataku ka lele keatea pela me ne kausaito. Ka poi koutou

⁶i a koutou e fakasao ne te Aliki Malosi ki kautaufa mo mafuie. Ka uga atu ne ia a matagi malosi mo afi fakamataku;

⁷tena la, a kautau katoa a malo kola e taua atu ki te fa'kai o te fata-fai-taulaga a te Atua, olotou meatau mo kope katoa, mo mea katoa, ka galo atu e pela me se moemiti, pela me se ata ne mafaufau se tino ki ei i te po.

⁸A malo katoa kola e maopoopo o taua atu ki a Ielusalema ka pela me se tagata mate fiakai tela e moemiti i a ia e kai, kae pula aka nei ko oko eiloa i ana likiliki; io me e pela me se tagata ka mate i te fia inu tela e moemiti i a ia e inu kae pula aka nei, a tena kato ko malo faka eiloa i te fia inu.

⁹Ke tumau eiloa te valea o koutou! Ke tumau foki te kivi o otou mata! Ko'na kae seki inu ki uaina! Takasese kae seai eiloa se motigā kava kai miti koutou ki ei!

¹⁰A te Aliki ko oti ne fai ne ia koutou ke takamiomio, kae fai foki ne ia koutou ke moe palapala. A pelofeta ne tau o fai mo mata o te fenua, ka ko te Atua ko oti ne faka kivi ne ia latou.

¹¹A uiga o fakaasiga fakapelofeta katoa ka 'funa mai i a koutou; ka pela me se peluga pepa tela e mau ei te fakailoga ke tapu e tala. Kafai e ave ne koe ki se tino tela e iloa ne ia o faitau, kae fai koe ki ei ke faitau atu ki a koe, kae ka tali mai a ia me e se mafai ne ia me ko oti ne fakamau ki ei te fakailoga ke tapu ma tala.

¹²Kafai e tuku atu ne koe ki se tino tela e se iloa o faitau, kae fai koe ki ei ke faitau atu ki a koe, kae ka fai mai a ia me e se mafai ne ia i a ia e se iloa o faitau.

¹³ Muna a te Aliki, “A tino konei e fai pela i a latou e tapuaki mai ki a au, ka ko olotou muna e fai e seai ne uiga, mo olotou loto foki e tuku eiloa i se koga fakaatea. A te lotu a latou ko tulafono mo tu a latou, kola ne tauloto ne latou i olotou loto.

¹⁴ Tela la, ka fakapoi ne au latou ki se fakasalaga, kae tautali atu foki sua fakasalaga mo sua fakasalaga. A tino poto ka valea, a te lotou poto ka se aoga.”

¹⁵A tino kola e taumafai o funa olotou fuafuaga mai i te Aliki, ka malaia! E fai olotou aofaga i se auala funa, kae leake eiloa nei me e seai se tino e lavea ne ia olotou mea e fai, io me e iloa ne ia.

¹⁶ Ko fuli'se ne latou a mea katoa. Ko oi e tāua atu, ko te one, io me ko te tino tela e faite ne ia a mea ki te one? E mafai ne se mea ne faite ne se tagata o faipati mai ki a ia penei, “E seki faite ne koe au”? Io me e fai mai ki a ia penei, “E se iloa ne koe tau mea tena e fai?”

¹⁷E pela mo te faigā muna penei, a te togā vao pupu eiloa e se leva ko fai mo laukele e toki ei lakau kaina, ka ko te laukele tena e toe foki eiloa ki te toga vao pupu.

¹⁸Kafai e oko mai te aso tena, a tino taliga tuli ka mafai o lagona ne latou se tino e faitau atu se tusi ki a latou i se leo maluga, mo tino kivi kola ne nofo faeloa i te pouliga, ka pula olotou mata kae matea ne latou a mea.

¹⁹A tino mativa mo tino malalo ka toe maua ne latou te fiafia tela e aumai ne te Aliki, te Atua tapu o Isalaelu.

²⁰Ko te gataga tena o tino kola e pule fakasaua ki nisi tino kae se ava ki te Atua. A tino agasala katoa ka 'ta fakapalele.

²¹A te Atua ka 'ta fakapalele ne ia a latou kola e fakamasei ne latou a nisi tino, tino kola e taofi ne latou te fakasalaga o tino amio masei, mo tino kola e fai tala loi ko te mea ke se sao a tino amiotonu i te fakamasinoga.

²²Tela la, muna a te Aliki, te Atua o Isalaelu tela ne fakasao ne ia a Apelaamo mai i fakalavelave, “Tino o toku fenua, a koutou ka se toe fakamasiasigina, ka se toe lau'tea foki otou mata i te ma.

²³Kafai ko lavea ne koutou a tamaliki konei ka avatu ne au ki a koutou, kae ka talia ne koutou i a au ko te Atua tapu o Isalaelu. Ka fakaaloalo mai koutou ki a au, kae ma'taku mai ki a au.

²⁴A tino valea ka mafai o malamalama, ka ko tino kola e musumusu faeloa ka fiafia ke akoakogina latou.”