Read Te Tusi Tapu I Te Gana Tuvalu Lomiga Lua ISAIA 3 Bible Online

ISAIA 3 - Te Tusi Tapu I Te Gana Tuvalu Lomiga Lua bible

ISAIA 3

¹I te taimi nei, a te Aliki Malosi ka ave keatea ne ia mai i Ielusalema mo Iuta a mea katoa, mo tino katoa kola e fakalagolago ki ei a tino o te fenua. Ka ave keatea ne ia olotou meakai mo vai,

²olotou sotia takutakua mo sotia, famasino, pelofeta, tino fakamatala mea tupu i aso fakamuli, mo tino maluga o te fa'kai,

³olotou takitaki o kautau mo takitaki o te fenua, tino o te malo mo tino fakataulaitu.

⁴Ka tuku atu ne te Aliki te fenua ke pule ne tamaliki tagata kola e seki matua olotou mafaufau.

⁵A tino katoa ka fakatau fai togafiti i a latou eiloa. A talavou ka se ava ki olotou takitaki, mo tino se aoga ka se fia fakaava ki tino e pule i a latou.

⁶Ka oko mai te taimi e fai atu ei a tino i se kaukaiga e tasi ki se tokotasi o latou penei, “Ko koe fua e isi ne gatu e pei koe i ei, tela la, vau ke fai koe mo takitaki o matou i te taimi tenei o fakalavelave.”

⁷Kae ka tali mai a ia penei, “Se ko au! E se mafai ne au o fesoasoani atu ki a koutou. E seai foki ne aku meakai io me ne gatu. Sa faigina au mo takitaki o koutou!”

⁸Ao, Ielusalema ko malaia! Iuta ko se aoga! A olotou muna katoa e fai, mo mea a latou e fai e teke atu ki te Aliki; a muna teke a latou ki te Atua ko lavea atu eiloa.

⁹A olotou uiga masei ka malaia eiloa latou i ei. A olotou agasala ko lavea atu eiloa, pela eiloa mo tino Sotoma. Ko malaia eiloa latou, ne fai foki eiloa ne latou.

¹⁰A tino amiotonu ka fiafia[5] kae ka solosolo lei foki olotou olaga, kae ka fakaaoga foki eiloa ne latou mo te fiafia a fua o olotou galuega.

¹¹Ka ko tino amio masei ka malaia; a mea kola ne fai ne latou ki nisi tino ka taui mai ki a latou.

¹²A tino fai tupe kaitalafu e fakapuapuaga ne latou oku tino, ka ko tino kola e fakagalue ne latou olotou tupe e fakatogafiti ne latou oku tino. Toku fenua, koutou ko taki 'se ne otou takitaki, tela la, ko se iloa ne koutou te auala e tau o olo koutou i ei.

¹³A te Aliki ko toka o fakaasi mai tena mataupu; ko toka o fakamasino ne ia tena fenua.[6]

¹⁴A te Aliki ka fakamasino ne ia a takitaki mo toeaina o tena fenua. Konei ana muna ne fai: “A koutou ne olo o fao malo a vine mai togavine, ka ko otou fale ko fonu i mea ne fao mai ne koutou mai i tino mativa.

¹⁵E seai lele eiloa se saolotoga o koutou o taumafai o tukipala oku tino, kae fao a mea a tino mativa. Ko au, te Aliki Tafasili i te Maluga tena ne faipati atu.”

¹⁶Muna a te Aliki, “Kiloke ki te fakamatamata o fafine o Ielusalema! E sasale mo olotou isu e fakatu ki luga, kae e faipati faeloa ki muna takolekole. E sasale fakaogaoga, ka ko malele i olotou fatugugu e tagitagi pela me ne pēle.

¹⁷Ka fakasala eiloa ne au latou, ka vele ne au olotou ulu ko te mea ke kila olotou ulu.”

¹⁸Ka oko mai te aso e ave keatea ei ne te Aliki mai i fafine o Ielusalema a mea katoa kola e fakamatamata sale ei latou — ko teuga i olotou fatugugu, i olotou ulu, i olotou ua,

¹⁹pela foki i olotou lima. Ka ave keatea foki ne ia olotou veli,

²⁰mo olotou pulou, pela foki mo taulima fakataulaitu i olotou lima mo olotou taugasulu;

²¹mo mama i olotou matikao mo olotou isu;

²²mo olotou gatu loa, mo gatu mo pausi tupe;

²³mo olotou gatu āta, olotou solosolo lino, mo solosolo mo veli kola e sai ne latou i olotou ulu.

²⁴Ka seai ne sausau o latou, tela la, ka manogi masei olotou foitino; ka seai ne fusi gali o latou, kae ka fusi fua ki lopu masei; ka seai ne olotou laulu gali me ka kati kila katoa; ka seai ne gatu gali o latou, na ko gatu masaesae fua; a te gali o latou ka fuli ki te masiasi!

²⁵A tagata o te fa'kai, ke oko eiloa ki tagata mafi eiloa, ka mate i te taua.

²⁶A mataloa o te fa'kai ka tagi fanoanoa, pela foki te fa'kai ka pela me se fafine tela e sagasaga fuafua i te laukele.