Read Te Tusi Tapu I Te Gana Tuvalu Lomiga Lua ISAIA 31 Bible Online

ISAIA 31 - Te Tusi Tapu I Te Gana Tuvalu Lomiga Lua bible

ISAIA 31

¹A tino kola e olo ki Aikupito mō se fesoasoani ka malaia! A latou e fakalagolago ki te malosi o te kautau a Aikupito, ki solofanua, kaliota, mo sotia, kae e se faka'na ki te Aliki, te Atua tapu o Isalaelu, io me kalaga atu ki a ia mō se fesoasoani.

²E iloa ne te Atua a te mea e fai ne ia! E aumai ne ia a mala. E fakataunu ne ia ana fuafuaga o fakasala a tino amio masei fakatasi mo tino kola e fesoasoani ki a latou.

³A tino Aikupito e se ne atua kae ne tagata ola fua. A olotou solofanua e se ne agaga. Kafai ko fai te galuega a te Aliki, a te malo malosi eiloa ka se aoga, pena foki a te malo vaivai tela e puipui ne te malo malosi tena. A te avā malo kona ka fakaseaoga katoa.

⁴Muna a te Aliki ki a au, “Me e pefea eiloa te maluga o te kalaga a tausi mamoe, kae e se mafai eiloa te leona o mataku kae tele keatea mai i te manu tela ne ta ne ia; e pena foki au, te Aliki Malosi, e seai se mea e mafai o fakagata ne ia taku puipuiga ki te Mauga o Siona.

⁵E pela mo te manu eva tela e folifoli i luga o tena ofaga o puipui ana punua, e pena foki au, te Aliki Malosi, e puipui ne au Ielusalema kae pulu ne au mai i fakalavelave.”

⁶Muna a te Aliki, “Tino Isalaelu, a koutou ne agasala mai ki a au, kae teke mai ki a au. Kae nei, foki mai ki a au!

⁷Ka oko mai te taimi e pei keatea ei ne koutou katoa a tupua masei a koutou kola ne faite ki siliva mo aulo.

⁸A Asulia ka ta fakamasei i te taua, kae se ko te malosi faka‐te‐tagata tena ka fakatakavale ei Asulia. A tino Asulia ka tele keatea mai i te taua, ka ko olotou tamataene ka fai mo pologa.

⁹A te lotou tupu ka tele keatea i te mataku, ka ko ofisa ka mataku ko tiakina ei ne latou olotou fuka o te taua.” A te Aliki ko oti ne faipati — ko te Aliki tela e tapuaki ki ei a tino i Ielusalema, ka ko tena afi e ka i kona mō sunu ei a taulaga.