Read Te Tusi Tapu I Te Gana Tuvalu Lomiga Lua ISAIA 32 Bible Online

ISAIA 32 - Te Tusi Tapu I Te Gana Tuvalu Lomiga Lua bible

ISAIA 32

¹I se aso fakamuli kae ka isi se tupu tela ka pule mo te fakamaoni, mo takitaki o te fenua kola ka pulepule mo te fai mea tonu.

²A latou ka pela me ne fale e malu ei a tino mai i te matagi, pela me ne koga e lafi ei a tino mai i se afā. Ka pela latou me ne vaitafe foliki kola e tafe i loto i se toafa, pela me se malūga o se kaupapa maluga i se fenua seai ne lakau i ei.

³A olotou mata mo olotou taliga ka ma'tala o lavea kae lagona a mea e manako ki ei a tino.

⁴Ka maua ne latou te loto kufaki, kae ka fai olotou galuega mo te atamai, kae ka faipati ki te meatonu.

⁵E seai se tino e toe fai ake pela i te tagata valea e fakaaloalogina io me e fai aka pela i te tagata amio masei e fakamaoni.

⁶A te tagata valea e faipati eiloa ki muna valea, kae mafaufau o fai a amioga masei. Ana mea mo ana muna e fai e se tau i mua o te Aliki. E se mafai o fagai ne ia a tino fia'kai, io me fainu atu a tino fiainu.

⁷A te tino valea e masei, kae e fai foki eiloa ne ia amioga masei; e fai ana togafiti o fakamasei a tino mativa i ana muna loi, kae taofi foki ne ia a tino mativa ke se maua ne latou te lotou saolotoga.

⁸Ka ko te tino amiotonu e fai ana mea mo te fakamaoni kae tumau i te meatonu.

⁹Koutou fafine kola e ola i se olaga filemu, kae seai ne mea e fakalavelave ki otou mafaufau, fakalogo mai ki aku muna.

¹⁰I te taimi nei, a koutou e fiafia i mea e maua ne koutou, kae i te taimi penei i te sua tausaga, a koutou ka fanoanoa me ka seai ne fuagā vine a koutou e toe fakaputu.

¹¹A koutou ne ola i se olaga filemu, kae seai ne mea e fakalavelave ki a koutou; kae nei, ke polepole koutou i te ma'taku! Tapale keatea otou gatu, kae saisai atu a gatu masaesae i otou taugasulu.

¹²Tuki otou fatafata i te fanoanoa me i fatoaga ola mo togāvine ko oti ne fakamasei,

¹³ka ko vao makaikai mo lakau talatala ko ola ake i te laukele o toku fenua. Tagi fanoanoa ona ko fale katoa kola ne masani o fiafia sale a tino i ei, pela foki a te fa'kai tela ne fonu i te fiafia.

¹⁴Ke oko eiloa ki te palesi, ka seai ne tino i ei, pela foki a te laumua o te malo. A fale mo olo malosi kola e puipui ei a fale kona ka maofa katoa ke oko eiloa ki te se gata mai. A asini vao ka olo sale i kona, mo mamoe ka kaikai i laukele moukua i kona.

¹⁵Ka ko te Atua e toe aumai eiloa ne ia a tena agaga. A te laukele se aoga ka toe ola, mo fatoaga ka fua mai i ei a lakau kaina 'gali.

¹⁶A te amiotonu mo te fai mea tonu ka toe lavea atu ke fai ne tino i te fenua.

¹⁷Ka tumau te filemu mo te tokagamalie ki te se gata mai, me i tino katoa ka saga tonu o fai te meatonu.

¹⁸A tino o te fenua o te Atua ka se mafaufau 'mafa ki se mea e tasi, ka ko olotou kaiga ka filemu kae saogalemu.

¹⁹(Ka ko te vaiua fatu ka 'to i te vao, kae ka masei valevale te fa'kai.)

²⁰Ka fiafia malosi a tino me ko uke a vai mō lakau, pela foki a laukele moukua kola e seai ne manu fe'kai e oko ki ei, mō kaikai ei a asini mo pulumakau.