Read Te Tusi Tapu I Te Gana Tuvalu Lomiga Lua ISAIA 33 Bible Online

ISAIA 33 - Te Tusi Tapu I Te Gana Tuvalu Lomiga Lua bible

ISAIA 33

¹A omotou fili ko malaia! Ne tatino o fao olotou mea, kae fakatogafiti ne latou a tino, kae e seki ai eiloa ne tino kai o'mai o 'ta latou kae 'fao olotou mea, io me ne fai togafiti ki a latou. Ko gata nei te lotou taimi tatino kae kaisoa, mo te fai togafiti. Ko latou nei ka ta kae fao olotou mea, kae fakaloiloigina foki.

²Te Aliki, alofa mai ki a matou! A matou e fakamoemoe atu ki a koe. Puipui matou i aso takitasi, kae faka'sao mai matou i taimi o fakalavelave.

³Kafai e taua koe mō matou, kae ka tele keatea a malo mai i te leo o te taua.

⁴A olotou kope katoa e fao ne te fili mai i a latou.

⁵A te Aliki e takutakua! E pule i mea katoa. Ka fakafonu ne ia Ielusalema i te fai mea tonu mo te fakamaoni

⁶kae fakamautakitaki ne ia a te tulaga o te malo. E puipui faeloa ne ia tena fenua kae avatu ki a latou te poto mo te atamai. A te koloa taua a latou ko te fakaaloalo ki te Aliki.

⁷A tagata 'toa ko kalaga ki se fesoasoani. A sui kola ne taumafai o aumai te filemu ko oko eiloa i te tagi.

⁸A auala lasi ko oko eiloa i te fakama'taku, ko seai ne tino e olo sale i ei. A feagaiga ko solo kae fakaseaoga. Ko se toe ai se tino e fakaaloalogina ne tino.

⁹A te laukele ko se fakagaluegina kae ko lavaki foki. A vao o Lepanona ko mage, a te vanu laukele ola i Salona ko pela me se toafa, ka ko lau o lakau ko tatela ifo mai i lakau i Pasana, pela foki i luga i te Mauga o Kalamelu.

¹⁰Muna a te Aliki ki malo, “Au nei ka gasue o fai taku galuega. Ka fakaasi atu ne au te malosi o toku mana.

¹¹E fai ne koutou a fuafuaga se aoga, pela foki mo mea katoa a koutou e fai e seai se aoga. A toku agaga e pela me se afi tela ka 'sunu ne ia koutou. [32]

¹²A koutou ka malukuluku pela mo fatu kola e 'sunu ke liu lase, pela mo lakau talatala kola e 'sunu ke liu lefu.

¹³A tino katoa i te lalolagi ke lagona ne latou te mea ko oti ne fai ne au, kae ke talitonu ki toku mana.”

¹⁴A tino agasala o Siona ko polepole i te mataku. Muna a latou, “A te fakamasinoga a te Atua e pela me se afi tela e 'ka faeloa ki te se gata mai. E a, e mata e mafai se tino o tatou o sao mai i se afi pena?”

¹⁵A koutou e mafai o sao manafai e fai ne koutou te mea tonu, kae faipati foki ki te mea tonu. Sa fakaaoga otou tulaga fakaaloalogina ke fai mo auala e fakatogafiti ei ne koutou a tino mativa, kae sa talia foki a togi fakakolekole. Sa kau atu ki a latou kola e mafaufau o tatino, io me fai ne amioga masei fakaatea.

¹⁶Kafai e faka'logo mai koutou kae ka sao koutou; ka saogalemu koutou e pela eiloa koutou me e nofo i se olo malosi. Ka isi ne meakai mo otou kai mo ne vai mo otou inu.

¹⁷Ka toe matea ne koutou se tupu e pule i se fenua lasi kae lauefa.

¹⁸A te mataku tela ne masani o nofo i a koutou, ki malo fakaatea kola e ao ne latou a lafoga mai i a koutou, pela foki ki tino lamalama, ka pela fua me se ata fakasolo i otou mafaufauga.

¹⁹Ka se toe lavea ne koutou ne tino fakaatea fakamatamata kola e faipati ki gana e se malamalama koutou i ei.

²⁰Kilo ake ki a Siona, te fa'kai tela ne fakamanatu sale i ei a omotou kaiga fiafia faka te lotu. Kilo atu ki a Ielusalema! Ka fai mo koga gali i te nofo, kae 'malu mai i te fili! Ka pela me se faleie tela e seki fakagasuegina eiloa, ko ana fao e se mafai o unu, mo ona lopu e se mafai o motu.

²¹A te Aliki ka fakaasi mai ne ia tena malu ki a tatou. Tatou ka nofo i tafa o vaitafe lauefa, kae e seai eiloa ne vakamutu o te fili e olo sale i vaitafe kona.

²²A likini i luga i vaka kona ka se aoga; a la e se mafai o fola ke ma'fola! Ka 'fao katoa ne tatou a te koloa a kautau a te fili, ka uke a mea e maua tela ko mafai foki o maua se vaega mo tino vae masei. Ko te Aliki tokotasi ka fai mo tupu o tatou; ka pule ne ia tatou kae puipui foki ne ia tatou.

²⁴Ka seai eiloa se tino i luga i te tou fenua e tagi i a ia e masaki; a agasala katoa foki ka fakamagalogina katoa.