Read Te Tusi Tapu I Te Gana Tuvalu Lomiga Lua ISAIA 36 Bible Online

ISAIA 36 - Te Tusi Tapu I Te Gana Tuvalu Lomiga Lua bible

ISAIA 36

¹I te sefulufa o tausaga o te nofoaiga a Hesekia i Iuta, kae vau te tupu Asulia ko Sanelivi o taua mai ki fa'kai ma'losi o Iuta, fakatakavale eiloa ne ia.

²Ne fai tena fakatonuga ki tena ofisa pule ke fanatu mai i Lakisa ki Ielusalema mo te kautau lasi eiloa, kae ke fai ki te Tupu ko Hesekia ke talia ne ia tena takavale. Ne fakanofo te kautau a te ofisa pule tena i te auala tela e galue i ei a tino fai laugatu, pela foki i tafa o te lua tela e vau ei te vai mai i te vai tafa ki luga.

³E tokotolu a tino Iuta ne o'mai ki tua o fakafetaui mai ki a ia: ko Eliakimo te tama tagata a Hilikia tela e pule i te palesi; ko Sepina te failautusi; mo Ioa, te tama tagata a Asafo, tela e tausi ne ia a tusi.

⁴Ne fai atu te ofisa Asulia ki a latou i te tupu o Asulia e fia iloa ne ia me se a te pogai e se mataku ei a te Tupu ko Hesekia.

⁵Ana muna penei, “I te otou fakatau e mafai ne pati o fakatakavale a te poto mo te malosi i te taua? Ko oi i te otou fakatau ka fesoasoani atu ki a koutou o teke mai ki Asulia?

⁶ A koutou e fakamoemoe ki Aikupito ke fesoasoani atu ki a koutou — a Aikupito e pela fua me se tokotoko mouku tela ka fati kae tue mai ki tou lima. E pena eiloa te tupu o Aikupito manafai e isi se tino e fakamoemoe ki ei.”

⁷Ne faipati eiloa te ofisa Asulia tena, muna a ia, “Me ko koe na ka fai mai i a koutou e fakalagolago ki te Aliki te otou Atua? A koga tapuaki mo fata-fai-taulaga kola ne ofa ne Hesekia i te taimi ne fai atu ei a ia ki tino o Iuta mo Ielusalema ke tapuaki fua i te fata-fai-taulaga i Ielusalema e a te Aliki.

⁸Ka fai ne au se feagaiga mo koutou i te igoa o te tupu o Asulia. Ka avatu ne au e lua afe solofanua manafai e mafai o sala ne koutou ne tagata ke fakaaoga ne latou a solofanua kona.

⁹A koutou e se taitai eiloa o fetaui mo te 'toe ofisa tafa ki lalo eiloa o Asulia, kae tenei koutou e fakamoemoe ke aumai ne Aikupito ne kaliota mo tagata i solofanua.

¹⁰I te otou fakatau au ne taua ki te otou fenua kae fakamasei ne au, kae e seki fesoasoani mai te Aliki ki a au? Ko te Aliki ne fai mai ki a au ke taua atu au ki te otou fenua kae ke fakamasei ne au.”

¹¹Tena, kae fai atu a Eliakimo, Sepina mo Ioa ki te ofisa tena penei, “Faipati mai ki te gana Alamaika i a matou e malamalama i ei. Sa faipati faka Epelu me i tino kola e sagasaga mai i luga i te 'pui o te fa'kai e fakalogologo mai katoa.”

¹²Ne tali mai te ofisa tena, “I te otou fakatau au nei ne uga mai ne toku tupu ke faipati atu ne au a mea konei ki a koutou fua kona e tu mai, fakatasi mo te otou tupu? Ikai, au nei e faipati foki ki tino kona e sagasaga mai i luga i te pui, kola ko se mao nei o kai ki olotou fekau kae inu ki olotou mimi, e pena foki koutou.”

¹³Ne tu aka te ofisa tena ki luga, kae kalaga atu i te gana Epelu, “Fakalogo mai ki muna a te tupu o Asulia ki a koutou.

¹⁴E fai mai ke mo a koutou e fakalogo ki a Hesekia. E se mafai ne Hesekia o fakasao koutou.

¹⁵Sa faka'logo ki ei manafai e fai mai ke faka'na koutou ki te Aliki. Sa mafaufau eiloa pela i a koutou e fakasao ne te Aliki, io me taofi ne ia te kautau a Asulia ke se puke te otou fa'kai.

¹⁶Sa fakalogo ki a Hesekia! A te tupu o Asulia ko fakatonu mai ke o'mai koutou ki tua mo te fa'kai, kae talia te otou takavale. Ka saoloto eiloa koutou o kai ki vine mai i otou togāvine, mo mati mai i otou togamati, kae inu ki vai mai i otou vaikeli —

¹⁷ke oko ki te taimi e ave ei koutou ne te motou tupu o fakanofo i se fenua penei eiloa mo te otou fenua, tela e isi ne togāvine e maua ei otou uaina, mo saito mo fai otou falaoa;

¹⁸sa faka'se otou mafaufau ne Hesekia o fai pela i a koutou e fakasao ne te Aliki. Kai isi eiloa se malo kai fakasao ne sena atua mai i lima o te tupu o Asulia?

¹⁹Ko fea a atua o Hamata mo Apata? Ko fea a atua o Sefavaima, E isi se atua ne fakasao ne ia a Samalia?

²⁰Kai isi eiloa se atua i atua konei ko oti ne fakasao ne ia tena fenua mai i te motou tupu? Se a la te mea e talitonu fua ei koutou i te Aliki e mafai ne ia o fakasao a Ielusalema?”

²¹Ne nofo mu eiloa tino Ielusalema, seai ne lotou pati ne fai, e pela eiloa mo te fakatonuga a Hesekia ne fai ki a latou.

²²Tena la, ne saesae a gatu o Eliakimo, Sepina mo Ioa i te fanoanoa, olo atu ei latou ki te tupu o fakaasi atu ki a ia a pati a te ofisa Asulia kola ne fai.