Read Te Tusi Tapu I Te Gana Tuvalu Lomiga Lua ISAIA 38 Bible Online

ISAIA 38 - Te Tusi Tapu I Te Gana Tuvalu Lomiga Lua bible

ISAIA 38

¹I te vaitaimi foki eiloa tena, ne masaki malosi te Tupu ko Hesekia, toe itiiti eiloa kae mate. Ne fanatu te pelofeta ko Isaia, te tama tagata a Amota, o asi ki a ia, kae fai atu penei, “A te Aliki ko fai mai ki a koe ke fakatoka faka'lei a mea katoa ke toka, me i a koe se lei tou masaki. Fakatoka i a koe e mate.”

²Ne fuli atu Hesekia ki te pui kae talo penei:

³“Te Aliki, au ne tavini atu eiloa ki a koe mo te fakamaoni, kae ne taumafai faeloa au o fai te mea e manako koe ke fai ne au.” Tena, kae tagi a ia i te fanoanoa.

⁴Tena ne fakatonu atu te Aliki ki a Isaia

⁵ke foki atu ki a Hesekia o fai atu ki a ia penei, “Au, te Aliki te Atua o tou tupuga ko Tavita, ko oti ne lagona ne au tau talo kae ko oti foki ne lavea ne au ou loimata; ka toetuku atu ne au e sefulu lima tausaga e toe ola ei koe.

⁶Ka fakasao ne au a koe mo te fa'kai o Ielusalema mai i te tupu o Asulia, kae ka tumau taku puipuiga ki a Ielusalema.”

⁷Ne tali atu Isaia, “Ka tuku atu ne au se fakailoga e fakatalitonu ei me ka tausi eiloa ne ia a tena feagaiga.

⁸I luga i te kakega tela ne faite ne te Tupu ko Aasa, a te Aliki ka faite ne ia se ata o te toe foki ki tua e sefulu 'maga.” Tena, ne foki eiloa te ata ki tua e sefulu 'maga.[36]

⁹I te leiga a Hesekia mai i tena masaki, ne tusi ei ne ia a te pese o tavaega tenei:

¹⁰Au e leake eiloa nei i au ka fano ki te Lalolagi o tino mate I te taimi koi malosi ei au, Ko se ola ei au ki te gataga tonu o toku ola.

¹¹Au e leake eiloa nei me ka se toe lavea ne Au a te Aliki i te lalolagi o tino ola tenei, Io me ko so se tino ola ake.

¹²A toku ola ne oti kae gata, E pela me se faleie tela ko tapale ki ialo, Pela me se laugatu tela ko kati keatea mai i te mea laga laugatu. Au e leake eiloa nei i toku ola ko fakagata ne te Atua.

¹³I po katoa, au e tagi faeloa i te mae, E pela eiloa me isi se leona e fatifati ne ia oku ivi. Au e leake eiloa nei i toku ola ko fakagata ne ta Atua.

¹⁴A toku leo ko oko eiloa i te vaivai, Kae tagi fanoanoa au pela me se lupe. A oku mata ko vaivai eiloa i te kilokiloga ki te lagi. Te Aliki, fakasao mai au mai i fakalavelave katoa konei.

¹⁵Ne a aku pati e tau o fai? Ko oti ne fai ne te Aliki a te mea tenei. A toku fatu ko mae, ko se mafai o to taku moe.

¹⁶Te Aliki, au e ola mō koe, mō koe fua tokotasi; Fakalei toku masaki kae tuku mai au ke ola.

¹⁷A toku mae ka fuli ki te filemu E fakasao ne koe[37] toku ola mai i mea faigata katoa; E fakamagalo foki ne koe agasala katoa.

¹⁸E seai se tino i te lalolagi o tino mate E mafai o tavae ne ia koe; A tino mate e se mafai o talitonu ki tou fakamaoni.

¹⁹Ko tino ola e tavae atu ki a koe, E penei mo au tenei e tavae atu ki a koe. A tamana e fai ki olotou fanau i a koe e fakamaoni.

²⁰Te Aliki, ne fakalei ne koe toku masaki. Ka ta omotou kitala kae usu ou vikiga, E usu ne matou ou vikiga i tou Faletapu I aso katoa o omotou olaga.

²¹A Isaia ne fai ki te tupu ke tuku te sua o te mati ki luga i tena fakafoa, kae ka lei a ia.

²²Tena, kae fesili atu te Tupu ko Hesekia penei, “Se a te fakailoga e iloa ei ne au me e mafai eiloa au o fano ki te Faletapu?”[38]