Read Te Tusi Tapu I Te Gana Tuvalu Lomiga Lua ISAIA 39 Bible Online

ISAIA 39 - Te Tusi Tapu I Te Gana Tuvalu Lomiga Lua bible

ISAIA 39

¹I te vaitaimi foki eiloa tena, a te tupu o Papelonia ko Melotaka Palatana, te tama tagata a Palatana, ne logo i te Tupu ko Hesekia ne masaki, tela ne avatu ei ne ia ki ei se meaalofa mo tena tusi ki ei.

²Ne fakatalofa atu a Hesekia ki avefekau mai Papelonia, kae fakaasi atu ne ia ki a latou a siliva mo aulo a ia, pela foki mo ana mea fakamanogi mo sausau, pela foki mo ana meatau katoa. E seai eiloa se mea i ana potu teu koloa mo koga katoa i tena malo e seki fakaasi ne ia ki a latou.

³Tena, ne fanatu te pelofeta ko Isaia ki te Tupu ko Hesekia kae fesili atu ki ei penei, “Ne o'mai i fea a tino kona, kae ne a olotou pati ne fai atu ki a koe?” Ne tali atu a Hesekia, “Ne o'mai mai i te fenua mao ko Papelonia.”

⁴“Ne a mea ne lavea ne latou i te palesi?” “Ne lavea ne latou a mea katoa. E seai eiloa se mea i potu teu koloa e seki fakaasi ne au ki a latou.”

⁵Tena, kae fai atu a Isaia ki te tupu penei, “A te Aliki Malosi ne fai mai

⁶me ka oko mai te taimi e ave katoa ei a mea i tou palesi, mo mea katoa kola ne teu ne ou tupuga ke oko mai ki te aso nei, ki Papelonia. E seai eiloa se mea e tuku.

⁷ Ka isi ne tino tonu o tou gafa ka ave o fai mo eunuka, ke galue i te palesi o te tupu o Papelonia.”

⁸A te Tupu ko Hesekia e leake eiloa nei i te uiga o pati a Isaia me ka maua te filemu mo te tokagamalie i aso o tena olaga, tela la, ne tali atu ei a ia penei, “A te fekau tena ko fakaoko mai ne koe mai i te Aliki ko oko eiloa i te gali.”