Read Te Tusi Tapu I Te Gana Tuvalu Lomiga Lua ISAIA 40 Bible Online

ISAIA 40 - Te Tusi Tapu I Te Gana Tuvalu Lomiga Lua bible

ISAIA 40

¹Muna a te tou Atua, “Fakamafanafana atu a loto o toku fenua. Fakamafanafana atu latou!

²Fakamalosi atu a loto o tino Ielusalema. Fai ki ei me ko leva eiloa te puapuagaga o latou, Kae nei ko fakamagalogina olotou agasala.[39] Ko oti ne fakasala ne au latou ona ko olotou agasala katoa.”

³ Ne kalaga te leo penei, “Fakatoka se auala i te vao mō te Aliki! Faka'ma se auala i te toafa mō te motou Atua!

⁴Fakafonu atu a vanu katoa; Fakalaugatasi atu a mauga katoa. A mauga ke laugatasi, Mo te laukele se laugatasi ka faka'mole.

⁵Tena la, ka fakaasi mai ei te malu katoatoa o te Aliki, Kae ka lavea ne tagata katoa. Ko te Aliki eiloa ne tauto ke fai te mea tena.”

⁶ Ne kalaga te leo penei, “Folafola atu te fekau!” Ne fesili atu au, “Se a te fekau e folafola atu ne au?” Folafola atu i tino katoa e pela me ne mouku; E se tumau i se taimi leva, pela fua me ne pulalakau.

⁷A te mouku e magemage, pena foki te pulalakau, Manafai e fakaagi mai ne te Aliki a te matagi i luga i ei. A tino e se tumau pela fua me ne mouku.

⁸Ao, a mouku e magemage, pena foki a pulalakau, Ka ko te muna a te Atua e tumau ki te se gata mai.”

⁹Ielusalema, fanake ki luga i se mauga maluga Kae folafola atu te tala lei! Siona, kalaga atu mo te leo maluga; Folafola atu te tala lei![40] Faipati atu kae sa mataku. Fai atu ki fa'kai o Iuta I te lotou Atua ko vau!

¹⁰ A te Aliki Sili ko vau o fai tena pulega Mo tena mana katoatoa, Kae aumai ne ia a tino kola ne fakasao ne ia.[41]

¹¹ Ka tausi ne ia tena lafu e pela me se tausi mamoe; Ka fakamaopoopo mai ne ia a tamā mamoe kae tauave i ona lima; Ka takitaki ne ia a matua o mamoe mo te filemu.

¹²E a, e mafai ne se tino o fua te moana ki ona alofilima Io me fua te lagi ki ona lima? E mafai ne se tino o asu te one o te lalolagi ki se ipu Io me fua a mauga ki se fua mea mafa?

¹³ E a, e mata e isi se tino e mafai O fai ki te Aliki a te mea e tau o fai? Ko oi te tino e mafai o akoako ne ia te Atua, Io me fai ne ona manatu fakatonutonu ki a ia?

¹⁴Ko oi te tino e filifili fakatasi mo te Atua, ko te Mea ke iloa kae malamalama te Atua i mea valevale, Kae ke iloa foki ne ia o fai a mea kola e tau o fai?

¹⁵A malo e pela fua me ne mea seai i mua o te Aliki, E pela eiloa me se motiga o te vai; A fenua mao e pela fua mo te pefu i te māmā.

¹⁶A manu vae fa katoa i te vao o Lepanona E se lava mo fai te taulaga ki te tou Atua, Ka ko lakau i ei e se uke, tela la, E se mafai o 'ka se afi i kona.

¹⁷A malo ne mea eiloa e seai ki a ia.

¹⁸ Ko oi e mafai o fakapau ki ei te Atua? E pefea ona foliga?

¹⁹A ia e se pau mo tupua kola e faite ne tagata, Kola e ufi ki aulo ne tagata galue i fiti, Kae faka'tu i luga i tulaga siliva.

²⁰ A te tagata tela e se mafai o maua ne ia ne siliva io me ne aulo E fakaaoga ne ia a lakau kola e se mafai o pala. E sala mai ne ia se tufuga poto, Ke faite ne ia te fakatusa tela e se mafai O siga ki lalo.

²¹E a, e se iloa ne koutou? E seki fakailoa atu ki a koutou i aso ko teka? E seki logo koutou me ne mafua pefea a te lalolagi?

²²Ne faite ne te tagata tela e sagasaga i luga i tena nofogaaliki, I luga o te lalolagi kae mai luga atu o te lagi; A tino i lalo e pela eiloa me ne lo i te Foliki i tena kilo mai i te koga tena. E fola ne ia a te lagi pela me se pui laugatu, Pela me se faleie tela e 'nofo ei a tino.

²³E puke mai ne ia a takitaki malosi eiloa Kae fakaseaoga ne ia.

²⁴E pela me ne lakau fatoa toki, Kola e seki 'mau lei olotou aka. Kafai e fakaagi mai ne te Aliki A te matagi, ko te mea eiloa ko mage Kae agina keatea e pela me ne kausaito.

²⁵Ko oi e mafai o fakatusa ki ei a te Atua tapu? E a, e isi se tino e pela mo ia?

²⁶Kilo ake ki te lagi! Ko oi ne faite ne ia a fetu kona e lavea ne koe? A ia tela e takitaki ne ia latou pela me se kautau, E iloa ne ia te aofaki o latou, kae e isi katoa Ne igoa o fetu takitasi ne fakaigoa ne ia! A tena mana e se fakatau eiloa i te malosi — E se mafai eiloa o galo se fetu i fetu kona!

²⁷Isalaelu, ai a e muimui ei koe o fai pela i Te Aliki e se iloa ne ia ou fakalavelave, Kae se saga atu foki manafai e maua koe ne se puapuaga?

²⁸E a, e se iloa ne koe? E seki lagona ne koe? A te Aliki ko te Atua ki te se gata mai; Ne faite ne ia a te lalolagi katoa. E se mafai o vaivai io me fi'ta. E seai se tino e malamalama i ona mafaufauga.

²⁹E fakamalosi ne ia a latou kola ko vaivai Kae fi'ta.

³⁰Ke oko foki eiloa ki a latou kola koi talavou ko vaivai; A tamataene ko siga sale fua i te fi'ta.

³¹Ka ko latou kola e fakatuaga ki te Aliki mō se fesoasoani Ka fakafougina te lotou malosi. Ka eva latou i olotou kapakau e pela me ne aeto; Ka tele latou kae se mafai o fi'ta; Ka sasale latou kae se mafai o vaivai.