Read Te Tusi Tapu I Te Gana Tuvalu Lomiga Lua ISAIA 42 Bible Online

ISAIA 42 - Te Tusi Tapu I Te Gana Tuvalu Lomiga Lua bible

ISAIA 42

¹ Ne faipati mai te Aliki penei, “Tenei taku tavini, tela ne fai ne au ke malosi Ko ia tela ne filifili ne au, Kae e fiafia foki au ki a ia. Ne fakafonu ne au a ia ki toku agaga, Kae ka aumai ne ia te fai mea tonu ki malo katoa.

²Ka se sona pakalaga a ia Io me faipati i te leo maluga i auala.

³Ka se fati ne ia se mouku piko, ka se tamate foki Ne ia se moli tela e kaka malie. Ka fakatumau ne ia te fai mea tonu ke oko eiloa ki te se gata mai.

⁴Ka se mafai a ia o loto vaivai, io me fakavaivai; Ka fakatumau ne ia a te fai mea tonu i te lalolagi. A fenua mao ko fakatalitali ki ana akoakoga.”

⁵ Ne faite ne te Atua a lagi, kae fola ne ia; Ne fakatulaga ne ia a te lalolagi mo mea katoa kola e ola i ei; Ne aumai ne ia te ola mo te manava ki tino katoa o te lalolagi. Kae nei, muna a te Aliki te Atua ki tena tavini,

⁶ “Ko au, te Aliki, ne kalagagina ne au a koe kae avatu ki a koe te mana Ke onoono koe ke tumau te fai mea tonu i te lalolagi. Ka fai ne au se feagaiga mo tino katoa e auala i a koe; Ka aumai ne au te mainaga ki malo e auala i a koe.

⁷Ka fakapula ne koutou a mata o tino kivi Kae fakasaoloto a latou kola e sagasaga i falepuipui pouli.

⁸“Ko au tokotasi ko te Aliki te otou Atua. E seai aka foki eiloa se atua e 'malu penei mo au; E se talia lele ne au se tupua ke Maua sena vaega i vikiga e aumai ki a au.

⁹A mea kola ne valo ne au ko taunu nei. I te taimi nei ka fakaasi atu ne au a mea fou, Kae koi tuai eiloa o taunu.”

¹⁰Usu atu se pese fou ki te Aliki; Usu atu ona vikiga, koutou te lalolagi katoa! Tavae atu ki a ia, koutou kona e folau i te moana; Tavae atu ki a ia, koutou mea ola o te tai! Usu, koutou fenua mao pena foki koutou kona E nofo i kona!

¹¹A te toafa mo ona fa'kai ke viki atu ki te Atua; A tino Ketala ke tavae atu ki a ia! A latou kola e nofo i te fa'kai o Sela, Kalaga mo te fiafia mai i ulu o mauga!

¹²A latou kola e nofo i fenua mao Ke avatu te vikiga mo te fakaaloalo ki te Aliki!

¹³A te Aliki ko fano o taua pela me se sotia; Ko toka kae ko oko eiloa i te fia taua. E kalaga i te kalaga o te taua; E fakaasi tena malosi ki ona fili.

¹⁴Muna a te Atua, “Ko leva eiloa nei te taimi ne nofo filemu ei au; E seki tali atu eiloa au ki toku fenua. Kae nei, ko oko eiloa ki te taimi ka gasue ei au; Au e kalaga pela me se fafine ka fai o fanau.

¹⁵Ka fakaseaoga ne au a mauga foliki mo mauga lasi, Kae fakamagemage ne au a mouku mo lakau. Ka fuli ne au a Vaitafe i vanu ke fai mo toafa,[44] Kae faka'masa pakupaku ne au a pugapugaloto vai.

¹⁶“Ka taki ne au toku fenua mata kivi I auala e seki olo eiloa i ei latou. Ka avatu ne au a te mainaga ki a latou, Kae ave keatea a te pouliga, Kae fakalaugatasi a te laukele masei i olotou mua. Kona aku tautoga, Kae ka tausi fakamaoni eiloa ne au.

¹⁷A latou katoa kola e fakatuaga ki tupua, Kola e fakaigoa ne latou a fakatusa ki atua, Ka fakaseaogagina kae fakamasiasigina.”

¹⁸Muna a te Aliki, “Fakalogo mai, koutou tino taliga tuli! Koutou mata kivi, onoono mai faka'lei!

¹⁹E mata e isi se tino e kivi atu i taku tavini, Kae tuli atu i te avefekau tela ne uga ne au?

²⁰Isalaelu, ko uke a mea ne lavea ne koutou, Kae se a la te uiga ki a koutou? E isi ne otou taliga mō fakalogo, Kae se a te mea ne lagona tonu eiloa ne koutou?”

²¹A te Aliki ko te Atua tela e fiafia o fakasao a tino, Tela la, e avake ne ia ana tulafono mo akoakoga, Kae e manako a ia ke tautali tena fenua i ei.

²²Kae nei, a tena fenua ko oti ne 'ta kae fao olotou mea; Ko ave o loka i lalo i ana Kae sai i loto i falepuipui. Ko ta kae fao olotou mea ne te fili, Kae e seai se tino e vau o faka'sao latou.

²³E a, e isi se tino e fia fakalogo mai ki te mea tenei? E a, ka fakalogologo faka'lei mai koutou i te taimi nei?

²⁴Ko oi ne tuku atu ne ia Isalaelu ke fakatakavale ne te fili? Ko te Aliki eiloa, tela ne agasala tatou ki ei! A tatou ne seki ola i te olaga tela ne manako A ia ke ola tatou i ei, E seki tautali foki tatou i akoakoga ne aumai ne ia.

²⁵Tena la, ne fakaoko mai ei ne ia te malosi o tena kaitaua Kae fakapuapuaga tatou i te taua. A tena kaitaua ko 'ka pela me se afi i Isalaelu, Kae e se iloa ne tatou a te mea e tupu; E seai eiloa se mea lei ne tauloto ne tatou mai i ei.