Read Te Tusi Tapu I Te Gana Tuvalu Lomiga Lua ISAIA 43 Bible Online

ISAIA 43 - Te Tusi Tapu I Te Gana Tuvalu Lomiga Lua bible

ISAIA 43

¹Isalaelu, a te Aliki tela ne faite ne ia Koe ko fai mai penei, “Sa mataku, e fakasao ne au a koe. Ne fakaigoa ne au koe, a koe e a aku.

²Kafai e ui atu koutou i loto i vai 'poko, Au e fakatasi atu eiloa ki a koutou; Ka se toe taotaomaki koutou ne otou fakalavelave. Kafai e ui atu koutou i loto i te afi, E se mafai koutou o 'paku; Ka se mafai koutou o pakia i tofotofoga faigata kola e feagai mo koutou.

³Au ko te Aliki te otou Atua, Te Atua tapu o Isalaelu, Tela ne fakasao ne ia koutou. Ka tuku atu ne au Aikupito ke fakasaoloto ei koutou; Pela foki a Sutana [45] mo Sepa,

⁴Ka tuku atu ne au a malo ko te mea ke fakasao otou ola, Me i a koutou e taua ki a au, Ka ko au e alofa ki a koutou kae tuku atu Ne au te tulaga fakaaloalogina.

⁵Sa mataku, au e fakatasi mo koutou! “E fakafoki mai ne au ou tino mai i fenua i te saegala, Pela foki mai i te togala.

⁶Ka faipati atu au ki matu ke tiakina mai latou Pela foki ki saute ke sa taofigina latou. Tuku mai oku tino ke foki mai mai i fenua mao, Mai i kogā koga katoa o te lalolagi.

⁷A latou ko oku tino tonu, Ne faite ne au latou ke aumai ne Latou te fakaaloalo ki a au.”

⁸Muna a te Atua, “Aumai oku tino ki te fono. E isi ne olotou mata kae e kivi; E isi ne olotou taliga kae e se logo!

⁹Fai atu ki fenua ke o'mai ki te fono. Ko oi se atua i a latou e mafai o valo ne ia te mea ka tupu i aso fakamuli? Ko oi i a latou ne valo ne ia a te mea tenei ko tupu nei? A atua konei ke aumai olotou molimau Ke fakamaoni ei i latou e 'tonu, Ke molimau ki olotou pati me e 'tonu me ikai.

¹⁰“Tino Isalaelu, koutou ko aku molimau; Ne filifili ne au koutou ke fai mo aku tavini, Ko te mea ke iloa ne koutou au, Kae talitonu mai foki ki a au, Kae ke malamalama foki koutou i a au Ko te Atua e tokotasi. E seai aka foki se atua i oku tafa; E seki ai eiloa mai ana mua, E se toe ai foki eiloa ki te se gata mai.

¹¹“Ko au tokotasi ko te Aliki, Ko au fua e mafai ne au o fakasao koutou.

¹²Ne valo ne au te mea ka tupu, Ka oti aka, ko vau ei au o fesoasoani ki a koutou. E seai eiloa se atua fakaatea kai fai ne ia se mea pena; A koutou ko aku molimau.

¹³Au ko te Atua ki te se gata mai. E seai se tino e mafai o sao mai i toku malosi; E seai se tino e mafai o fuli ne ia a te mea e fai ne au.”

¹⁴A te Atua tapu o Isalaelu, Te Aliki tela ne fakasao ne ia koutou, Ne fai mai penei, “Ka uga atu ne au se kautau o taua atu ki Papelonia, Ko te mea ke fakasao koutou; Ka ofa ki lalo ne au a mataloa o te fa'kai, Ka ko te ka'laga fiafia o ona tino ka fuli ki te tagi.

¹⁵Au ko te Aliki, te otou Atua tapu. Ne faite ne au koutou tino Isalaelu, Tela la, au ko te otou tupu.”

¹⁶I aso mua, ne fai ne te Aliki se auala i loto i te tai, Se auala i loto i te vai.

¹⁷Ne taki ne ia te kautau malosi eiloa o 'ta ke mate, Se kautau e uke olotou kaliota mo solofanua. E 'siga ifo latou se toetu eiloa, Ko mate atu pela me se ulaga o te moli gako tela ne tamate.

¹⁸Ka ko te Aliki ne fai mai penei, “Sa taofi mau ki mea ne tupu i taimi ko teka Io me tausi ki mea ne fai i aso mua eiloa.

¹⁹Onoono mai ki te mea fou tenei ka fai ne au. Tenei e tupu nei, e mafai o lavea atu nei ne koutou! Ka fai ne au se auala i loto i te vao, Kae tuku atu ne vaitafe mō koutou i kona.

²⁰Ke oko foki eiloa ki manu vao ka fakaaloalo mai ki a au; A tiakolo mo ositelite ka tavae ne latou a au, Manafai ko faite ne au a vaitafe ke tafe i loto i te toafa, Mo toku fenua filifilia.

²¹A latou ne faite ne au mo oku, Tena la, ka usu ne latou a pese e tavae ei au!”

²²Muna a te Aliki, “Isalaelu, a koutou ko fiu i a au; A koutou e seki tapuaki mai ki a au.

²³E seki aumai ne koutou otou mamoe Mo fai otou taulaga sunu; E seki fakaaloalo mai koutou ki a au i otou taulaga. E seki fakafi'ta ne au koutou o fai 'soko atu Ke aumai otou taulaga, Io me fai 'soko atu ke sunu mai mea manogi.

²⁴E seki togi ne koutou ne mea manogi mō oku Io me fakafiafia au ki gako o otou manu vae fa; Kae ne fakafi'ta fua ne koutou au ki otou agasala; Au ko fiu i otou mea 'se e fai sale.

²⁵E ui i feitu kona, ka ko au ko te Atua tela E fakamagalo ne au otou agasala; Ne fai ne au te mea tenei me i toku uiga e pena eiloa. Ka se fakasala ne au koutou i otou agasala.

²⁶“Tatou ka olo ki te fono; fakaasi mai a mea kona e se malie ei koutou! Aumai te otou mataupu ke fakatalitonu ei i a koutou e tonu!

²⁷A te otou tupuga taumua[46] eiloa ne agasala; A otou takitaki ne agasala mai ki a au,

²⁸Mo otou tino pule ne fakalai'lai[47] ne latou toku fale tapuaki. Tena, ne fakamalaia ei ne au Isalaelu; Ne tuku atu ne au oku tino ke fakamasiasigina.”