Read Te Tusi Tapu I Te Gana Tuvalu Lomiga Lua ISAIA 44 Bible Online

ISAIA 44 - Te Tusi Tapu I Te Gana Tuvalu Lomiga Lua bible

ISAIA 44

¹A te Aliki ne faipati mai penei, “Isalaelu taku tavini, toku fenua filifilia, Te gafa o Iakopo, fakalogo mai i te taimi nei.

²Au ko te Aliki tela ne faite ne ia koe; Au ne fesoasoani atu ki a koe talu Mai te taimi ne fanau ei koe. Sa mataku; a koe ko taku tavini, Ko toku fenua filifilia tela e alofa au ki ei.

³“Ka avatu ne au ne vai ki te laukele seai ne vai, Kae faka'tafe a vaitafe foliki i luga i te laukele malo. Ka ligi atu ne au toku mana ki luga i au tamaliki, Mo taku fakamanuiaga ka tuku atu ki luga i tino o tou gafa.

⁴Ka olaola lei latou e pela me ne mouku kola e fakasusu faka'lei, Pela me ne lakau ko uilou i tafa o vaitafe foliki.

⁵“Ka fai ake a muna a tino taki tokotasi penei, ‘Au e a te Aliki.’ Ka o'mai latou o kau mai ki tino Isalaelu. Ka tusi ne latou te igoa o te Aliki i olotou lima, Kae fai aka pela i a latou ko tino o te Atua.”

⁶ A te Aliki tela e pule kae puipui ne ia Isalaelu, Ko te Aliki Malosi, ne fai mai penei: “Au ko te kamataga mo te fakaotiga, ko te Atua e tokotasi; E seai ake foki eiloa se atua i oku tafa, Ko au tokotasi eiloa.

⁷E mata e isi se tino e mafai ne ia o fai a mea konei ne fai ne au? Ko oi e mafai o valo ne ia a mea ka tupu Mai i te kamataga ke oko ki te gataga?

⁸Toku fenua, sa mataku! E iloa ne koutou me ne valo faeloa ne au A mea ko pili o tupu, mai taimi mua eiloa ke oko mai ki taimi nei, Koutou ko aku molimau e uiga ki te mea tena. E a, e isi aka se atua fakaatea? E a, e isi aka se atua malosi tela e seki logo tala au ki ei?”

⁹A tino katoa kola e faite tupua e seai ne olotou aoga, a atua kona e tāua i olotou loto e seai ne aoga. A tino kona e tapuaki ki atua kona e 'kivi kae valea, ka fakamasiasigina latou.

¹⁰E seai se aoga e faite ei ne se tino se fakatusa fiti o tapuaki ki ei pela me se atua!

¹¹A tino katoa kola e tapuaki ki ei ka fakaseaogagina katoa. A tino kola e faite ne latou a tupua, ne tino ola fua. Tuku ke o'mai o tu i te fono, ka mataku latou kae ka puapuaga ona ko te masiasi ka oko ki a latou.

¹²A te tino galue i fiti e puke ne ia te potu fiti kae tuku i luga i te afi ke faite ki ei se tupua. E tuki ne ia te fiti tena ki te samala ke foliga ki te mea tela e manako a ia ki ei. I te taimi e fai ei tena galuega, e gasolo ake eiloa o fiakai, fiainu, kae fita foki.

¹³A te kamuta e fua fakalei tena laupapa, lomi ne ia se ata o te tino ki te penisina, ko katikati ei ne ia ki ana mea faigaluega ke foliga mai ki foliga o se tagata, se fakatusa gali o te tagata, ko ave ei ne ia o tuku i tena fale.

¹⁴E mafai o kati mai ne ia se alasi o faite ki ei tena tupua, io me se oka, io me se pelosi mai i te vao. Io me toki ne ia se lakau ko te laulele, ko fakatali ei ke to te vaiua tela e fakaola ne ia te lakau tena.

¹⁵A te tagata e fakaaoga ne ia te vaega e tasi o te lakau mo fai a fafie, ka ko te sua vaega mo faite se tupua. E fakaaoga ne ia a te sua vaega o faka'ka ki ei te afi e fakavelavela ei tena foitino, kae tao foki ki ei ana mu falaoa; a te sua vaega o te lakau e faite ei ne ia ki ei se atua ko tapuaki ei a ia ki ei.

¹⁶E faka'ka ne ia te afi ki te vaega e tasi o te lakau; e tao ana kano manu, kai, malie ei a ia. E fakamafanafana tena foitino kae fai aka penei, “Ko oko eiloa i te velavela gali! Ko oko eiloa i te gali o te afi tenei!”

¹⁷A te toega o te lakau e faite ne ia ki ei se tupua, tena la, ko ifo ei a ia o tapuaki ki ei. E talo atu a ia ki ei, ana muna, “A koe ko toku atua, fakasao mai au!”

¹⁸A tino pena ko oko eiloa i te valea, ko se iloa ne latou olotou mea e fai. Ko pono olotou mata mo mafaufau ki te mea tonu.

¹⁹A te tino tela ne faite ne ia te tupua ko seai eiloa sena mafaufau o fai aka penei, “A te vaega o te lakau ne fakaka ne au. Ne tao aku falaoa mo aku kano manu, kai ei ne au. A te toega o te lakau ne faite ne au ki ei te tupua. Au tenei e ifo atu ki te potu lakau!”

²⁰A te mea tena e pau eiloa[48] mo te tino e kai ki lefu. Ko fakase a ia ne ona mafaufauga valea, ko faigata o aoga se fesoasoani a se tino ki a ia. E se mafai eiloa o fai mai i te tupua tela i ona lima e se se atua.

²¹Muna a te Aliki, “Isalaelu, masaua te mea tenei; Masaua i a koe ko taku tavini. Ne faite ne au koe ke fai mo aku tavini, Kae ka se mafai o fakapuli ne au a koe.

²²Ne fue keatea ne au au agasala e pela me se kaumana. Foki mai ki a au; ko au ne fakasao ne au a koe.”

²³Kalaga mo te fiafia, koutou lagi! Koga poko o te lalolagi, kalaga! Kalaga mo te fiafia, koutou mauga, Mo lakau katoa o te vao! Ko oti ne fakaasi mai ne te Aliki a tena malosi I te fakasaoga ne ia o tena fenua ko Isalaelu.

²⁴“Au ko te Aliki te otou fakaola; Ko au ne faite ne au koutou. Au ko te Aliki, ne faite ne au a mea katoa. Ko au tokotasi ne fola ne au a lagi; I te taimi ne faite ei ne au a te lalolagi, E seai eiloa se tino ne fesoasoani mai ki a au.

²⁵ Ne fakaseaoga ne au a tino fakamatala mea tupu i aso fakamuli, Kae fakase ne au a valoaga a tino poto i fetu. E fakaseaoga ne au a muna a tino poto Kae fakaasi atu foki ne au i te lotou poto ko te valea tena.

²⁶Kae kafai ko fai se valoaga a taku tavini, Kafai ko uga ne au se avefekau ke fano o fakaasi aku fuafuaga, Ko au foki eiloa e fakataunu ne au a fuafuaga mo valoaga kona. Au e fai ki a Ielusalema me i tino ka toe o'mai o nofo i ei, Pena foki ki fa'kai o Iuta, me ka toe faite. A fa'kai kona ka toe faka'tu aka.

²⁷E fakamasapakupaku ne au a te moana, I taku fakatonuga.

²⁸ Au ne fai atu ki a Kulesa penei, ‘A koe ne fili ne Au ke fai koe mo pule kae fakatonutonu atu koe ne au; Ka fai ne koe a te mea tela e manako au ke fai ne koe: Ka fai tau fakatonuga ke toe atiake Ielusalema, Pela foki a te fakavae o te Faletapu ke faite.’ ”