Read Te Tusi Tapu I Te Gana Tuvalu Lomiga Lua ISAIA 45 Bible Online

ISAIA 45 - Te Tusi Tapu I Te Gana Tuvalu Lomiga Lua bible

ISAIA 45

¹A te Aliki ne fili ne ia a Kulesa ke fai mo tupu! Ne filifili ne te Aliki a Kulesa ke fakatakavale ne ia a malo; Ne uga ne te Aliki a ia tena ke fakatakavale ne ia a tupu; Ko te Aliki ka tala ne ia a mataloa o fa'kai ki a ia tena. Muna a te Aliki ki a Kulesa,

²“Ko au ka fakatoka ne au tou auala, Ka fakalaugatasi ne au a mauga. Ka ofa ne au a mataloa o palesi Kae ofa olotou loka fiti.

³Ka avatu ne au a koloa mai i koga pouli, Mo koga funa; Ka iloa ei ne koe i a au ko te Aliki, Ko te Atua o Isalaelu ne kalaga ne ia koe i tou igoa.

⁴Ne fili ne au a koe ke fesoasoani ki taku tavini ko Isalaelu, Ko te fenua ne filifili ne au. Ko oti ne avatu ne au te tulaga maluga, E ui eiloa e se iloa ne koe a au.

⁵“Au ko te Aliki; e seai aka foki eiloa se atua i oku tafa. Ka avatu ne au te malosi e manako koe ki ei, E ui eiloa e se iloa ne koe a au.

⁶E fai ne au a te mea nei ko te mea ke iloa ne tino katoa, Mai i te sua feitu o te lalolagi ki te sua feitu, i a au ko te Aliki, Kae e seai aka foki se atua i oku tafa.

⁷Ne faite ne au te mainaga mo te pouliga; E aumai ne au te fakamanuiaga pela foki a mala. Ko au, te Aliki, e fai ne au a mea katoa kona.

⁸Ka aumai ne au te manumalo mai i te lagi pela me se vaiua; A te lalolagi ka tali ne ia, Kae ka maua ei te saolotoga mo te fai mea tonu. Ko au, te Aliki, ka fakataunu ne au a te mea tena.”

⁹ E mafai ne se ulo ne faite ki one o finau atu ki a ia tela ne faite ne ia a ia, Kae se ulo fua e pau mo nisi ulo katoa? E mafai ne te one o sili atu ki te tino faite Mea ki one me ne a ana mea e fai? E mafai ne se ulo o fai ki te tino Ne faite ne ia a ia, me i a ia e se poto?

¹⁰E mafai ne se tino o fai ki ana matua penei, “Ai a ne fai ei ne koulua au ke fai penei?”

¹¹A te Aliki, te Atua tapu o Isalaelu, Tela e pule i mea e tupu i aso fakamuli, Ne fai mai penei: “E seai se otou fekau e fesili mai ei koutou e uiga ki taku fanau io me fakatonu mai te mea e tau o fai ne au!

¹²Ko au ne faite ne au te lalolagi, Kae faite a tino ola ke nofo i ei. Ne fola ne au a lagi ki toku mana; E pule ne au te la, te masina mo fetu.

¹³Ko au ne fakagasue ne au a Kulesa Ke fakataunu ne ia toku fakamoemoega, Kae ke fakatonu foki a mea kola e se 'tonu. Ka fai ne au ke 'tonu a auala e fano ei a ia. Ka toe faite ne ia toku fa'kai ko Ielusalema, Kae fakasaoloto a tino o toku fenua kola ne ave fakapagota. E seai se tino ne togi ne ia a Kulesa ki se Togi fakakolekole ke fai ne ia a te mea tena.” Ko te Aliki Malosi tena ne faipati.

¹⁴Muna a te Aliki ki a Isalaelu, “A te maumea o Aikupito mo Sutana[49] ka puke ma koe; A tagata loa o Sepa ka fai mo au pologa; Ka tautali atu i a koe, mo olotou vae e saisai ki seni. Ka ifo atu latou ki a koe kae fai atu penei, ‘A te Atua e fakatasi atu ki a koe, Ko ia tokotasi ko te Atua.

¹⁵A te Atua o Isalaelu, tela e fakasao ne ia a tino o tena fenua, Se Atua tela e se lavea.

¹⁶A latou kola e faite tupua ka fakamasiasigina; Ka fakamasiasigina katoa eiloa.

¹⁷Ka ko Isalaelu ne fakasao ne te Aliki, A tena manumalo ka tumau ki te se gata mai; A tino Isalaelu ka se mafai eiloa o fakamasiasigina.’ ”

¹⁸Ko te Aliki ne faite ne ia a lagi — Ko ia ko te Atua e tokotasi! Ne faite ne ia a te lalolagi, Kae fakamautakitaki ne ia ke tumau ki te se gata mai. Ne seki faite ne ia ke fai mo koga se aoga, Kae ke fai mo koga e nofo ei a tino. Ko ia ne fai ake penei, “Ko au ko te Aliki, E seai ake foki se atua i oku tafa.

¹⁹Au ne seki faipati funa io me funa te mea tela e fakamoemoe au ki ei. Au e se manako ke sala au ne tino Isalaelu i se koga masei. Au ko te Aliki, au e faipati ki te mea tonu; E fakaasi atu ne au a te mea tonu.”

²⁰Muna a te Aliki, “Maopoopo mai koutou tino o malo, Tino kola ne sao mai i te takavalega o te malo; O'mai ki te fono ke fai se fakamasinoga! Tino kola e poleni mo olotou tupua lakau, Kae talo ki atua kola e se mafai o fakasao latou, A tino kona e seai se lotou mea e iloa!

²¹O'mai o aumai te otou tagi ki te fono; Ka ko tino kola e tu ki ei te tagi ke filifili fakatasi aka latou. Ko oi ne valo ne ia a te mea tenei ka tupu? E a, e se ko au, te Aliki te Atua, Tela ne fakasao ne au toku fenua? E seai ake foki eiloa se Atua.

²²“Koutou tino katoa i te lalolagi, Toe fuli mai nei ki a au, Ko te mea ke fakasao ne au koutou! Ko au eiloa tokotasi ko te Atua.

²³ A taku tautoga e tonu, Kae ka se mafai o fuli. Au e tauto fakamaoni eiloa: A tino katoa ka o'mai o totuli i oku mua Kae tauto i a latou ka tumau te lotou fakamaoni mai ki a au.

²⁴“Ka fai ake latou pela me ko au fua e Mafai o maua ei te manumalo mo te malosi; Ka ko latou kola e ita ki a au ka fakamasiasigina.

²⁵Ko au te Aliki, ka fakasao ne au a tino katoa i te gafa o Iakopo, Tena la, ka vikia ei ne latou a au.