Read Te Tusi Tapu I Te Gana Tuvalu Lomiga Lua ISAIA 49 Bible Online

ISAIA 49 - Te Tusi Tapu I Te Gana Tuvalu Lomiga Lua bible

ISAIA 49

¹ Fakalogo mai ki a au, koutou malo mao, Koutou kona e nofo i koga mao! Koi tuai au o fanau, ka ko au ko leva ne filifili Ne te Aliki ke fai mo ana tavini.

² Ne fai ne ia aku muna ke kai pela me se pelu. Ne puipui ne ia au ki ona lima.[51] Ne fai ne ia au pela me se matasana, E makaikai kae ko toka o fakaaoga.

³Muna a ia ki a au, “Isalaelu, a koe ko taku tavini; Ka tavae au ne tino ona ko koe.”

⁴Muna a aku, “Au ne galue, kae ko oko eiloa i te faigata! Ko palele toku malosi, kae seai se mea lei kai maua.” Ka ko au e fakatuaga ki te Aliki ke fesoasoani Mai ki te mea e taumafai au ki ei; Ka aumai ne ia se taui lei ona ko te mea tenei e fai ne au.

⁵Au ne filifili ne te Aliki ka koi tuai au o fanau; Ne fai ne ia au ke fai mo ana tavini Ko te mea ke fakafoki mai ne au a tino o tena fenua Ke fakafoki mai ne au a tino Isalaelu Kola e nofo salalau. Ne aumai ne te Aliki ki a au se tulaga fakaaloalogina; A ia ko te pogai o toku malosi.

⁶ Muna a te Aliki ki a au, “Taku tavini, e isi se fekau taua tenei e manako au ke fai ne koe. Ka aumai ne koe te tulaga takutakua Ki tino Isalaelu konei koi ola. Ka fai foki ne au a koe ke fai mo mainaga ki malo Ko te mea ke faka'sao katoa a te lalolagi.”

⁷A te Atua tapu o Isalaelu, te fakaola, Ne fai mai penei ki te tino tela e itagia ne malo, Kae se tavini a tino pule: “Ka lavea ne tupu a koe i te taimi e fakasaoloto ei koe, Kae ka 'tu mai katoa o fakaaloalo atu ki a koe; A pelenise e lavea foki ne latou, Kae ka ifo atu mo te ava ki a koe.” Ka tupu te mea tena, me i te Aliki ko oti ne filifili ne ia a tena tavini; A te Atua tapu o Isalaelu e tausi eiloa ki tena tautoga.

⁸ Muna a te Aliki ki tena fenua, “Kafai ko oko mai te taimi ka faka'sao ei koutou, Ka fakaasi atu ne au toku fiafia ki a koutou Kae ka tali atu foki ne au otou fakatagi mo se fesoasoani. Ka tausi kae puipui ne au koutou, Kae ka fai ne au se feagaiga mo tino katoa e auala i a koutou. Ka tuku atu ne au koutou ke toe nofo i te otou fenua tenei ko masei valevale.

⁹Ka fai atu au ki pagota penei, ‘Olo, koutou ko saoloto!’ Kae fai atu ki a latou kola e nofo i te pouliga Penei, ‘O'mai ki te mainaga!’ Ka pela latou me ne mamoe kola e kaikai i luga i mauga foliki;

¹⁰ Ka se mafai latou o fiakai io me fiainu. Ka se mafai latou o fi'ta i te vela o te la mo te vela o te toafa, Me i a latou e takitaki ne ia tela e alofa ki a latou. Ka taki ne ia latou ki koga e isi ne vaipuna i ei.

¹¹“Ka fai ne au se auala lasi i te fenua mauga Kae fakatoka se auala ke olo i ei a tino o toku fenua.

¹²A tino o toku fenua ka o'mai mai koga mao, Mai i matu pela foki mai i te togala, Pela foki mai i Asiuana[52] i saute.”

¹³Usu pese, koutou lagi! Te lalolagi, kalaga mo te fiafia! A mauga ke usu mai ne lotou pese! Ka fakamafanafana ne te Aliki a loto o tena fenua; Ka alofa a ia ki tino o tena fenua kola e puapuagatia.

¹⁴Ka ko tino Ielusalema ne fai mai penei, “A matou ko tiaki ne te Aliki! Ko se manatua ne ia matou.”

¹⁵Tela la, ne tali mai te Aliki penei, “E mafai ne se fafine o puli tena pepe, Kae se alofa ki te tamaliki ne fanau mai ne ia? Kafai foki la e isi se matua e mafai o fakapuli Ne ia tena tamaliki, Ka ko au e se mafai o fakapuli ne au koutou.

¹⁶Ielusalema, e se mafai o fakapuli ne au koe! Ko oti ne tusi ne au tou igoa i oku alofilima.

¹⁷“A tino kola ka toe faite ne latou a koe ko pili o oko mai, Ka ko latou kola ne ta fakamasei ne latou a koe ka olo keatea.

¹⁸Kilo aka ki otou feitu me se a te mea e tupu! A otou tino ko maopoopo — ko foki mai ki te lotou fenua! E pela eiloa mo te iloa tonu i a au ko te Atua ola, E pena foki te iloa atu i a koutou ka fiafia i otou tino ka o'mai, E pela eiloa me se fafine fatoa avaga tela E fakamatamata ona ko ana teuga tāua.

¹⁹“A te otou fenua ne fakamasei kae fakaseaogagina — Kae nei, ka to foliki, se lava mo nofo ei a latou kola ka o'mai o nofo i ei. Ka ko latou kola ne fakamasei ne latou a Te otou fenua ka ave o fakamao keatea mai i a koutou.

²⁰A tino o te otou fenua kola ne fanau i te fenua ne ave fakapagota ki ei latou, Ka fai atu ki a koutou i se aso penei, ‘A te fenua tenei ko to foliki — A matou e manako ki ne koga tai lasi aka mo omotou nofo!’

²¹Tena la, ka fai aka koe ki a koe eiloa penei, ‘Ko oi ne fanau ne ia a tamaliki konei kae aumai ma aku? Aku tamaliki ne galo kae e seki tau o maua Ne au ne tamaliki ke tokouke penei. Au ne ave fakapagota kae ne afuli keatea — Ko oi ne tausi aka ne ia a tamaliki konei? Au ne tiakina mai e tokotasi eiloa au, Ne o'mai mai fea a tamaliki konei?’ ”

²²A te Aliki sili ne fai mai ki tino o tena fenua penei: “Ka kalaga au ki malo Kae ka aumai ne latou otou tamaliki Ki te lotou fenua.

²³A tupu ka pela me ne tamana ki a koutou; A tupu fafine ka pela me ne matua. Ka ifo atu latou ki a koutou kae fakaaloalo atu ki a koutou; Ka fakaasi atu te lotou fakaaloalo ki a koutou mo te ava lasi. Tena la, ka iloa ei ne koutou i a au ko te Aliki; So se tino e fakalagolago mai ki a au E se mafai o se fesoasoani au ki ei.”

²⁴E mafai ne koe o fao malo a mea a se sotia? E mafai ne koe o fakasao mai se pagota mai i lima o se pule saua?

²⁵Ne tali mai te Aliki penei, “Tena eiloa te mea ka tupu. A pagota a te sotia ka puke o ave keatea, Ka ko mea a te pule saua ka fao mai i a ia. Ka taua atu au ki so se fili tela e taua ki a koutou, Kae ka fakasao ne au otou fanau.

²⁶Ka fai ne au a tino kola e pule fakasaua i A koutou ke fakatau tamate latou ne latou eiloa; Ka ko'na latou kae fia tatino mo te kaitaua. Tena la, ka iloa ei ne tino katoa i a au ko te Aliki, Ko au ne fakasao kae fakasaoloto ne au koutou. Ka iloa foki ne latou i au ko te Atua malosi o Isalaelu.”