Read Te Tusi Tapu I Te Gana Tuvalu Lomiga Lua ISAIA 5 Bible Online

ISAIA 5 - Te Tusi Tapu I Te Gana Tuvalu Lomiga Lua bible

ISAIA 5

¹ Fakalogologo mai ke usu atu ne au te pese tenei, Ko te pese e uiga ki toku taugasoa mo tena togavine: E i si se togavine a toku taugasoa E tu i luga i te mauga foliki, Te koga tena e ola te laukele i ei.

²Ne keli ne ia te one kae ave keatea a fatu i te koga tena, kae toki ne ia a vine tafasili i te gali i kona. Ne faite ne ia se taoa e leoleo ei a te togavine, Kae keli ne ia te lua mo solo a fuagavine. Ne fakatalitali a ia ke sulu a fuagavine, Kae iku aka nei, e 'kona katoa a fuagavine.

³Muna a toku taugasoa penei, “A koutou kona e nofo i Ielusalema mo Iuta, fakamasino mai au mo taku togavine.

⁴E a, e isi se faiga e seki fai ne au ki taku togavine? Ai a la e fua mai ei ne ia a fuagavine 'kona kae se ko fuagavine kola ne fakamoemoe au ki ei?

⁵“Tenei te mea ka fai ne au ki taku togavine; ka ave keatea ne au a te pui i ona feitu katoa, kae ofa ki lalo a te pui tela e puipui ei, kae tuku ei ke lakalaka kae kai ne manu o te vao.

⁶Ka tiakina eiloa ne au ke ola te mouku i ei. Ka se velevele eiloa ne au a vine, se tanutanu foki eiloa ne au a te laukele. Ka tiaki eiloa ne au ke ola i ei a lakau makaikai. Ka se talia foki ne au a kaumana ke fakato ne latou a vaiua ki ei.”

⁷A Isalaelu ko te togavine a te Aliki Malosi; A tino o Iuta ko vine kola ne toki ne ia. Ne fakamoemoe a ia ke fai ne latou a amioga lei, Kae tela la, ko te tatino fua e fai ne latou. Ne fakamoemoe a ia ke fai ne latou te mea tonu Ka ko tino ne fakapuapuaga ne latou ko tagi mai ke fai te mea tonu.

⁸A koutou ko malaia! E olo faeloa koutou o togi mai a fale mo fatoaga o fakaopoopo mai faeloa ki fale mo fatoaga a koutou kola e uke. E se leva nei, ko seai ne koga e nofo ei a tino, kae ko koutou fua ka nofo i te fenua.

⁹Ko oti ne lagona ne au a te Aliki Malosi e faipati mai penei, “A fale lasi kae gali konei, e iku ki te maofa valevale.

¹⁰A vine kola e ola i te sefulu eka o te laukele, e maua mai fua i ei e tusa mo te valu lita o te uaina. A te selau valusefulu lita o fuaga saito e maua fua mai ei e sefuluvalu lita o saito.”

¹¹A koutou ko malaia! A koutou e ala malu o inu kava, kae e inu faeloa koutou i te afiafi kātoa ke kona koutou.

¹²I taimi e fai ei otou 'kaiga kae e isi ne kitala, samupelini mo faili, mo uaina. Kae e se iloa eiloa ne koutou a te mea ka fai ne te Aliki,

¹³tela la, a koutou ka ave keatea e pela me ne pagota. A otou takitaki ka mate i te fiakai, mo tino o te fenua ka mate i te fiainu.

¹⁴A te lalolagi o tino mate ko manako mai ki a latou, ko fakamaga tena gutu o folo latou. E folo ne ia a tino maluga o Ielusalema, fakatasi mo te vaitino kola e ua'te valevale.

¹⁵A tino katoa ka fakamasiasigina, mo tino fakamatamata katoa ka fakamalalogina.

¹⁶Ka ko te Atua Malosi ka fai ne ia te mea tonu, e fakaasi ei i a ia e takutakua. Ka fakaasi foki tena mana katoatoa o fakamasino tena fenua.

¹⁷A tamā mamoe ka kaikai i mouku i koga o te fa'kai kola ko oti ne ofa, pena foki a tamā kouti.

¹⁸A koutou ko malaia! Ko se mafai ne koutou o sao mai i otou agasala.

¹⁹E fai ake koutou penei, “Te Aliki ke na fakavave o fai te mea ne folafola ne ia me ka fai ne ia, ko te mea ke matea ne tatou. Te Atua o Isalaelu ke na fakataunu tena fuafuaga ne fai; ke onoono ake tatou me se a te mea e mafaufau a ia o fai.”

²⁰A koutou ko malaia! E taku ne koutou a amioga masei me ne mea lei, kae taku ne koutou a amioga lei me ne amioga masei. E fuli ne koutou te pouliga ke fai mo mainaga, kae fuli ne koutou te mainaga ke fai mo pouliga. E fai ne koutou te mea 'kona ke magalo, kae fai ne koutou te mea magalo ke 'kona.

²¹A koutou ko malaia! A koutou e mafaufau pela i a koutou ko oko eiloa i te poto.

²²A koutou ko malaia! Koutou ne tino e fina ki te uaina! A koutou e toa kae se mataku manafai ko oko ki te taimi e palu ei a kava!

²³E talia ne koutou a togi fakakolekole, ko fakasaoloto ei ne koutou a tino agasala, kae se fai ne koutou te mea tonu ki tino amiotonu.

²⁴Tela la, e pela eiloa mo te kausaito mo te mouku magemage tela e sunu kae ka i te afi, ka pena otou aka mo otou pula ka pala kae magemage kae ka agina keatea, me ne teke ne koutou a mea kola ne akoako mai ne te Aliki Malosi, te Atua o Isalaelu, ki a tatou.

²⁵A te Aliki ko kaitaua ki tena fenua, kae ko fakaoko mai tena lima o fakasala latou. A mauga ka polepole, ka ko foitino o tino mate ka tafola i auala e pela me ne kaiga. E ui eiloa i te mea tena, kae ka se gata eiloa te kaitaua o te Aliki; ka tumau eiloa te fakaoko mai o tena lima o fakasala tena fenua.

²⁶E fai ne te Aliki se fakailoga o kalaga ki se malo mao.[7] E 'fio atu a ia ki a latou ke o'mai mai i feitu kesekese o te lalolagi. Konei ko o'mai, ko makini faka eiloa, kae ko oko eiloa i te vave!

²⁷E seai eiloa se tino e mata fita, io me se tino ne siga. E seai eiloa se tino e fia moe, io me ne moe; e seai eiloa se fusi o se tino e matagataga, e seai foki se pakolo o se taka o se tino ne masei.

²⁸A olotou matasana ko oko eiloa i te makaikai, mo kausana ko toka o fakaaoga. A alofivae o olotou solofanua ko oko eiloa i te makeke pela eiloa me ne fatu filini, ka ko teka o olotou kaliota e teka eiloa pela me se vaeosio.

²⁹A sotia e gulu eiloa pela me ne leona kola ko oti ne ta te lotou manu kae ko ave ne latou ki se koga tela e seai se tino e mafai o toe puke mai ne ia mai i a latou.

³⁰Kafai ko oko mai te taimi tena, ka gulu latou i luga i Isalaelu e pela eiloa mo te gulu malosi o te tai. Kilo mai ki te fenua tenei! Ko te pouliga fua mo te fanoanoa! A te mainaga ko folo ne te pouliga.