Read Te Tusi Tapu I Te Gana Tuvalu Lomiga Lua ISAIA 50 Bible Online

ISAIA 50 - Te Tusi Tapu I Te Gana Tuvalu Lomiga Lua bible

ISAIA 50

¹Muna a te Aliki, “I tau fakatau, ne uga ne au oku tino ke olo keatea E pela me se tagata tela ko tiakina ne ia tena avaga? Ko fea la a pepa o te talaga o te fakatasiga? I te otou fakatau ne togi atu ne au koutou ke ave fakapagota E pela me se tagata tela e togi atu ana tamaliki ke fai mo pologa? Ikai, a koutou ne ave fakapagota ona ko otou agasala; A koutou ne ave keatea ona ko otou amioga masei.

²“Ai a ne seki saga mai ei toku fenua I te taimi ne fanatu ei au ki a latou o fakasao latou? Ai a seki tali mai ei latou i te taimi ne kalaga atu ei au? E se mafai ne au o fakasao latou? E mafai ne au o faka'masa pakupaku te tai i taku fakatonuga, Kae fai a vaitafe ke liu toafa, Ko te mea ke mate a ika i ei me ko seai se vai.

³E mafai ne au o fakapouli a te lagi, E pela me ko tagi fanoanoa ki se tino mate.”

⁴Ko oti au ne akoako ne te Aliki Sili ki muna e tau o fai ne au, Ko te mea ke mafai ne au o fakamalosi a loto o tino loto vaivai. I taeao katoa, e fai ne ia toku loto ke fiafia o fakalogo ki ana akoakoga.

⁵Ne aumai ne te Aliki ki a au a te malamalama, Ka ko au e seki 'teke io me fuli keatea mai i a ia.

⁶ Ne fuli atu toku tua ki a latou kola ne 'kini ne latou a au. E seki 'vao ne au latou i te oko'maiga o faka'itaita au, Pela foki i te oko'maiga o futi toku talafa Kae puaki mai ki oku mata.

⁷Au se mae i olotou muna faka'itaita Me i te Aliki Sili e fesoasoani mai ki a au. Ne fakamalosi eiloa au o kufaki olotou faifaiga se 'lei ki a au. E iloa ne au i a au e se fakamasiasigina,

⁸ Me i te Atua e pili mai, Kae ka fakamaoni ne ia i a au e se 'se. E isi se tino e manako o ave ne ia au ki te fono? O'mai ke olo fakatasi tatou ki te fono! Fai ki ei ke fakaasi mai tena tagi!

⁹Ko te Aliki Sili e pulu ne ia a au; Ko oi la e mafai o fakaasi mai i a au e 'se? A latou katoa kola ne ave ne latou au Ki te fono ka galo atu katoa; Ka galo atu e pela me ne laugatu ne Kai ne mogamoga.

¹⁰A koutou katoa kola e ava ki te Aliki Kae fakalogo ki muna a tena tavini, Kafai e sasale koutou i te auala pouli tagataga, Masaua o talitonu ki te Aliki kae faka'na Ki te otou Atua.

¹¹A koutou katoa kola e mafaufau o 'ta nisi tino, Ka malaia eiloa koutou i otou togafiti masei ne fai. Ko te Aliki eiloa ka fakataunu ne ia a te mea tena; Ka puapuaga koutou i se ikuga masei.